ناسن يقولون الخلا للمهابيل=يا حيف قولن ما عليه الدلايل
وش البلا قالوا سموم وغرابيل=حتى الهوا ثاير بروس النثايل
قلنا لهم يا ناس ما فيه تحليل=هذا ولع ما يرمى بالطبع مايل
باحساسنا حدر الطلاح المظاليل=مثل براد جنيف لفح القوايل
قالوا يجينا الذيب لعسعس الليل=واليا عوا يمكن بالانجاد صايل
قلنا لهم سرحان خاوا الرحاحيل=الذيب هتاشن بالاقفار جايل
اليا استلج بخالياتن مطاويل=نطرب لصوته مع صياح الثعايل
قالوا حيايا والعقارب مخاتيل=معها الخنافس والقعر والنمايل
قلنا لهم من يقرا بالورد ما نيل=فلا ينوشه في مساريه طايل
قالوا بعيدن ما يجي فيه كوكتيل=ولا نشوف الا النياق الهمايل
قلنا لهم مشروبنا البن بالهيل=على لهيب الرمث والدعب سايل
ومطعومنا صيد الجبل والغراميل=يا حلوها تسوا من الضان حايل
قالوا عديم من الكنب لرتخى الحيل=حتى السرير سليب هاي وظلايل
قلنا الكنب جرفن على جاله نقيل=والا السرير براس طعسن تهايل
قالوا ديارن ما بها قال مع قيل=ولا نشوف من المخاليق دايل
قلنا فضول الهرج ما فيه تفضيل=غير النميمه والمكر والحبايل
يكفي عزيف الريح بين الجناديل=والطير لغنا وابو فلان شايل
قالوا نريد سلومكم يا رجاجيل=اليا نزلتوا خاليات الدهايل
قلنا الكرم والخير ما فيه تمهيل=ومقدرين اهل الفعول الصمايل
وانريد حامل دين زين التماثيل=صميدعن مبداه طيب الفعايل
ونزرا على اللي بالخلا يلوي الذيل=مشاكس ربوعه سويد العمايل
قالوا خلصنا ما نقول المخابيل=الا رجالن من قروم القبايل
لاصارت علوم الخلا ما بها ميل=يسلم هواكم يا عيال الحمايل

وعليكم السلام ورحمة الله وبركاته

صح لسانك يالغالي

أبيات قمة في الروعه

وبيض الله وجهك على طرح القصائد الرائعه والجميله والله يعطيك الف عافيه

خالص الود والتقدير والمحبة

أخوكــــــ عبدالله

ولسان حال الرحالين

يقول ::

قلنا لهم مشروبنا البـن بالهيـل
.....................على لهيب الرمث والدعب سايـل

وصفك بهالبيت يكفي http://www.alrahlat.com/vb/images/icons/icon14.gif

لاهنت

,,,,,,,,,,,,,,,,,,,, تحياتي ,,,,,,,,,,,,,,,,,,,,,

المشاركة الأصلية كتبت بواسطة فتى الرابيه (المشاركة 119137) صح لسانك على الابيات الجزله ماقصرت --- تقبل تحياتي

المشاركة الأصلية كتبت بواسطة عبدالكريم اليوسف (المشاركة 119148) جزل وما تجيب الا جزل عساك على القوة يالامير وصح كلك اخوك

المشاركة الأصلية كتبت بواسطة abdullah k. Al-hassan (المشاركة 119162) وعليكم السلام ورحمة الله وبركاته صح لسانك يالغالي أبيات قمة في الروعه وبيض الله وجهك على طرح القصائد الرائعه والجميله والله يعطيك الف عافيه خالص الود والتقدير والمحبة أخوكــــــ عبدالله

المشاركة الأصلية كتبت بواسطة ابو فراس (المشاركة 119180) صح لسانك وابيات جزلة وتبي الحق والله بعض الاحيان يجينا نوع من الهبال بس نبي نطلع للبر ولو حر ويشوي الطير

المشاركة الأصلية كتبت بواسطة الشيخ قوقل (المشاركة 119195) أبيات جميلة تشكر على نسخها يا عمنا ولسان حال الرحالين يقول :: (( ما جابت على غير أهله )) .