تجمع في أم رقيبه !!!!! ولكن من نوع آخر
 

حركنا من السيل الكبير بعد العصر، وصلينا المغرب والعشاء في ظلم، ثم كان وصولنا الى الدوادمي الساعة العاشره ليلا وفي ضيافة أخ كريم وهو غالب العتيبي(ابو عبدالله)، حيث كان في انتظارنا على العشاء بعد شرب القهوه والشاي في مجلسه بيت الشعر، وهو ايضا من محبي القديم ويملك احداها وهي سياره من نوع شفر أمبالا موديل 1970، يقرض الشعر ويقول انه لم يذهب لأم رقيبه من قبل وقد حضر الى أم رقيبه في اليوم التالي.

الحمد لله على السلامة يابو فهد
رحلة موفقة وتقرير مصور رائع
بصراحة استمتعنا معك بهالرحلة وكأننا صاحبناك فيها.

وماشاء الله على الفرت قطع مسافات طويلة ... على فكرة كم سرعتك في الخط وهل هناك مشاكل فنية ؟

بارك الله فيك.

راعي الذوق:
يامال الغناة، شكرا على حضورك وردك، وانت سالم وغانم.

السلام عليكم
هلا ببو فهد هلا بالغالي رحله وجمعه مباركة والله يكتبلكم الجمعه في الدنيا والأخرة بالجنه وياكم والمسلمين اجمعين آمين.

راعي كيف
ابو ناصر

ما شاء الله تبارك الله ، الحمد لله على السلامه ، وش هالزين ما شاء الله عليكم تسلم يا مهراس ، وترا ما نسمح تجي من جده وتمر شقراء ولا نشوفكم ونقوم بالواجب ، لا تعودها مره ثانيه ، والله يحفظكم في حلكم وترحالكم .

شكرا لك اخي مهراس على التقرير الرائع بروعة صاحبة الذي يذهلنا دائما بمواضيعة الرائعة

كانت رحلتي من جده الى مكه ثم الطائف، ظلم، عفيف، الدوادمي، شقرا، المجمعه، الأرطاويه وأخيرا أم رقيبه، والله مشوار لكن متعه.
مهراس مالك حق تمر الدوادمي ولاتمرنا عطنا خبر اقل شي فنجال قهوه وطيب. سامحك الله.

السيارات القديمه شيء جميل ممتع وعندنا شباب بالدوادمي عندهم نفس الميول.
لاهنت
عليم العطش

ماقول الا جزاك الله خير وكثر الله من أمثالك يالطيب


والحمدلله على السلامة يامهراس تقرير جميل والصور أجمل

صقر:
شكرا على تنويرك الموضوع يابو أحمد وردك الطيب، كم تمنيت المرور عليكم في بريده لو اني لحالي، وعد لكم زياره في استراحتك العامره،
انا أمشي بالونيت 110 كم بالساعه، وأحيان اذا الهوا شمالي 120-130(سفينه شراعيه ههههه)، والمشاكل الفنيه لا تذكر ولله الحمد معظم القطع أصليه والتشييك على السياره حسب جدول زمني في دليل المالك.
راعي كيف:
الله يجزاك خير على دعاءك، أشكر لك التكلف بالرد والتشريف، والله يجمعنا وياكم على مرضاته.
أبو عبد العزيز:
هلا براعي شقرا، الله يطول بعمرك، اسمح لنا المره هذي، وان شاء الله نراكم اذا مرينا شقرا ويشرفني ذلك ايما شرف شرط بدون تكاليف أعط النفس هواها مثل ما يقولون، الله يحييك شكرا على هذه الأريحيه من شخصك الكريم.
كان:
الشكر لك على ردك وتشريفك الموضوع، هذا كرم منك وتقدير لنا يامال العافيه.
عليم العطش:
حياك يابو سيف، والله انك على بالي وكان في خاطري أمرك لو كنت لوحدى، رؤياك تسرني وتسعدني غالي وعزيز علينا انت واللي يعز عليك. شكرا لك على التنويه بالشباب اصحاب الميول للسيارات القديمه، والله يجمعنا وياكم قريب.
ريع الدياب:
أهلا بالغالي أبو اسماعيل، اسعدني تواجدك المبكر وردك الحلو، أم رقيبه تجمع سنوي كل سنه يتجدد ومناسبه طيبه لرؤية الأصدقاء والأصحاب من كل مكان، السنه هذي كان الجو دافىء والمربعانيه في أولها، ياليت يصير تنسيق السنه الجايه ونسوي طلعه محترمه ونشوف العمده.
أبو شعلان:
ياألف مرحبا بابو شعلان، تحيه مني لك على هذا الرد المكلف، والحضور المتميز لا هنت يامال الغناة.
قناص الحبارى:
شكرا لك على المواصله الطيبه لا عدمناك يابو عبد العزيز.
سيد النشاما:
الله يسمع منك ويخليك لعين ترجيك، هلا بك واسعدنا رضاك عن الموضوع.

ركبني في الصندوق
 

الاخ الغالي
ابو فهد
السلام عليكم
اخي الحبيب ابداع ك العادة في كل سنة تنقلنا في صندوق الموتر لنشاهد مهرجان ام رقيبة
اخي الحبيب اشكرك جزيل الشكر علي هذا الطرح
اخوك
خشم الحصان
............
نغزة............ اجل لقيت ((ماجلان)) عطنا احداثي مسانة
دقشة............ كل عام يمر مهرجان ام رقيبة........ ومنتدي الرحلات لا يستفيد من هذا التجمع
صدمة ........ هل نشاهد مرة مخيم منتدي الرحلات في ام رقيبة............
همسة ......... ابسط الامور الاجتماع ........ وتبادل الخبرة
...........
ابو فهد بما انك من محبي هذه السيارات القديمة نود ان تشرح لنا عنها وعن صيناتها وكيف يمكن لك الحصول علي القطع
مجرد توضيح فربما تجذب البعض الي هذه الهواية الجميلة

مهراس للمرة الثانية لم اتمكن من المقابلة

والله يكفيك شر الثالثة التي لا بد ان تكون ثابتة السنة الجاية ان شاء الله ويكون الجو يشجع

و لم اتمكن من الاتصال بكم

ملاحظة ان الزوار هالسنة اقل من السنة الماضية فعلا لاحظناه وربما كان العجاج يوم الاربعاء والخميس والجمعة سبب في ذلك

خشم الحصان:
مشكور ومجمل انك عديت علينا يالغالي، شرفني ردك اللي بوه نغزات ودقشات يازينها،
نغزه: ............... لقيت ماجلان وكنت انا وياه على عجل أشكرله التعرف علي من خلال السياره.
دقشه:.............. السنة الجايه سوف يكون هناك تخطيط لمقابلة الأعضاء في أم رقيبه ان شاء الله.
صدمه:............ اذا صار فيه تجمع للأعضاء حتما سيكون هناك مخيم أو خيمه.
همسه:............نعم ابسط الأمور الأجتماع ويكفي الربوع بعد الدوام، والخميس والجمعه خير كثير.
من ناحية موضوع صيانة السيارات القديمه فكل شخص على حسب ميوله ومخباته، وان شاء الله سوف افرد هذا الأيضاح في موضوع خاص تلبية لرغبتك ورغبة الجميع.

سعود:
اشكرك على المرور الكريم والرد المتواضع،
أبو فراس:
الثالثه مقبوله بخيرها وشرها، شوفتك بابو فراس تستاهل العنوه، شكرا على الرد والمرور، كما قلت كان الجو غير مناسب لأي طلعه، قضينا وقتا ممتعا يومي الثلاثاء والأربعاء، في رعاية الله.
ولد نجد:
(وبعد تحسن الجو بعد العصر بحثت عنك لاتشرف بلقياك ولكن للأسف لم اجدك
وان شاء الله نلتقي بمناسبة اخرى)
مثل الثلج على قلبي ياولد نجد، الشى اللي يقهر اننا كنا في مكان واحد وقريبين من بعض، شكرا على المجامله الرقيقه تسلم يالغالي.
فارسة العتيبي:
حياك الله وأهلا بك شكرا على تنويرك الموضوع بكلماتك المؤثره، روحي الله يحفظك من كل سوء.
عبد الله:
الله مير يخليك على هذا الرد الطيب، ابداعنا من ابداعاتكم عساكم تسلمون، شكرا على الحضور المميز.

أخي مهراس

رحلة موفقة والله يغيثنا

الله يعطيك العافية أخي أبو فهد وما قصرت بارك الله فيك ، والحمد لله على السلامة ..

وصلت لام رقيبة ليلة الخميس ، وتجولنا صباح الخميس لساعة ونصف فقط ، حيث بدأ العجاج المزعج ، فغادرنا بسرعة ..

شكرا لك عزيزي ويعطيك ربي العافية ..

الغالي ابو فهد


يحبيلك انت ومواضيعك


ليتي داري بجيتك كان اخرتها للخميس


الثاني بس الجايات اكثر


شكرا لهذا الصور الرائعة

الله يعطيك العافيه يابو فهد
وربي يقويك
ماشاءالله عليك موسع الصدر على هالفرت وبالك طويل على المشاوير
الله يزيدك على الطاعه
تقرير ممتاز وصور رائعه
وتعريف بتجمع اصحاب السيارات القديمه عساهم على القوه

مشكور يابو فهد

A.K.H.:
عزيزي عبدالله، تقبل شكري وتقديري على ما خطت اناملك في ردك الرائع، ومرورك الغالي، حضوركم الدائم ما نستغني عنه، وهو وقودنا للرحلات.

قلم رصاص:
الله يوفقك ويغيث المسلمين، لك الشكر على المرور.

أبو سمر:
يالله ان تحييه، من زمان عنك يابو سمر، وين الناس، لعلها خيره ما شفنا بعض، يزيدك شرف شرفتنا بهالزياره في هالموضوع، ما قصرت على التواصل، ربي يرعاك.

سهيل:
الله لا يحرمنا من شوفتك، كلفت على نفسك وعلى قولك الجايات كثر الله يجمعنا وياكم على محبته ورضاه، وهذا كرم كبير منك ابداء شعورك الصافي. سلامي لك.

أبو صقر:
ياعسى ربي يسلمك ويسعدك، نعم بالي طويل على هالفرت (عشقه) مثل مايقولون زي اللي يربي حمام، والمشاوير والله مانوصل الا وظهورنا مكسره مع انه خط سريع ولكن 100- 110 كم/ساعه والمراتب تقول كراسي قهوة من اللي أيام زمان، بس المتعه في الطريق والناس كل من مر يطالع أو يأشر أو يسلم ويضحك وخذ من هالحكي. الشكر لك على التنوير والتشريف، الله يجزاك الخير على هالكلمات الزينه.