يوم نويت اكتب موضوع اتصل قال اطلع لي
 

بسم الله
بسم الله عليكم وراكم مطيرين حجانكم !!

السلام عليكم

ارتاحو

نويت اكتب موضوع وتحيه وسلام
واول مابغزت الايقونه ويتصل بي ابو عبدالرحمن يقول مبطي ماشفتك ولهانن عليك
قم اطلع انا احتريك عند الباب

والحين ابطلع
في امان الله


اخوكم ابو علي

ههههههههههههههههههههههههه

موفق يابو علي وسلم على ابو عبدالرحمن

بس ترانا ننتظر الموضوع :)

ياكشات
بهالقوايل طلعة ... وين تبون ؟

لكن زين اللي شفناك وسمعنا حسك (هههه)

طيب وش ملامح موضوعك ؟
ووش مواريه

عجل علينا ترانا نحتريك يالغالي.

بارك الله فيك.

ههههههههههههه



معليش يوم جيت ارد اذن المغرب ابأروح افطر.......





وحده بوحده

هلا بوعلي ماودك نشرك لك سلك على الانتل ;) علشان يمشي معك الانطر:confused: نت ماوين تروح .... أنهج

علينا ترا مواضيعك رهيبه يابونسب

بسم الله
السلام عليكم
هلا وغلا بالكل
واحد واحد ورحال رحال

الموضوع ومافيه اطال الله اعماركم

كل راعي بر يتهيض من يشوف ظلال الشمس بدا يطول
وبمصطلح اهل العرف بداية سهيل حين تبدا الشمس بالاتجاه جنوب خط الاستواء(لاحد ينقز لي) توي اعرف هالمعلومه:cool:

المهم كل واحد من السابق ذكرهم يبدأ باول خطوات التهيض وهو التفكير
اول مايفكر بالمطر والخير (الله يرزقنا من واسع فضله)
يفكر بالموتر هو والم وجاهز للبر
يفكر بالخيمه والمعاميل
يفكر حتى بالاطناب
ومنذ تلك اللحظه وهو يعايش احلام تدغدغ مشاعره وتهيض اشجانه

وكأني به وهو يتلهف لطلعة البر حاله كحال العاشق الولهان
ولعلمي ان فيكم الكثير من الشهبان اللي مايدري وشهو الحب والعشق
ابقول له وشهو وانتم يالي تعرفونه طفو نوركم شوي

كيف تعرف انك عاشق محب

هو انك تتنهد ايلا حل طاري محبوبك التنهد لا ارادي
ويخليك تسج بخيالك يم اللي تحبه
هو اللي يخليك تنام بدري عشان يمر الوقت بسرعه وتشوف محبوبك
هو اللي يخليك تنبز من الصبح قبل ترن الخراشه اللي تعودت تحطه بالقدر فوق راسك

خلصنا من الشهبان (كودهم فهمو)

البر وطلعاته وسعة الصدر اللي به شي مايعرف وش زينه الا الي جربه وعاشه
واكيد كل من جرب هاللذه يبي يعيشه ويتهنى به كل سنه وكل طلعه
الله يعطينا القوه والصحه والعافيه ويهنينا بهالطلعات والاجواء الربيعيه

وطبعا الموضوع مافيه محور محدد اتكلم عنه
الا اللهم لذة انتظار المعشوق والاستعداد له

مجرد التفكير والاستعداد للبر لذه بحد ذاته
فما بالك بالكم الهائل من السعاده الغامره وانت متجهز للطلعه وتشوف خيال الغيم مقبل عليك
والا وانت واقف عند اخر محطه على الاسفلت وبتفرق منه للبر
والا وانت محدر يم قاع مابه احد وريح الربيع ينوخش جيوبك الانفيه قبل تشوفه(مشاعر خروف صايم)

الله لايحرمنا الجنه ويجمعنا في الفردوس الاعلى

اخوكم ابوعلي

والله يابو علي اثر التوت عمل عمايله معك
وخلاك تكتب لنا موضوع من أجمل المواضيع التي قرأتها وبصراحة حفرلوجيا وابو فالح بيفرحون لأن جالهم ثالث يكملهم.
هههههههههههههههههههه

لكن تبي العلم الأكيد

ترانا نبي من هالنمونة ... خوياك يحبون السواليف اللي مثل تسذا

بارك الله فيك.

هلا وغلا بابو صقر
ياخوي بغيت اسلم عليه بس اشغلتنا السوالف عن السنبوسه وكنافة البنغالي(الواثق من نفسه)

اشكر لك مرورك وتعليق يابوووووووو صقر

صقر
ابو احمد
ياخي تصدق الامثال الشعبيه والحكم ما تنقال الا من واقع تجارب واحتكاك في معطيات الحياة(يمديك على التسحيبه لاتستعجل)
المثل يقول " يدلّك على السلع اثمانها" وانت يابو احمد غالي علي بالحيل
مير لو اني اعمى واصمخ وابكم ابعرف اصلك وفصلك ووش انت متسحر من ثاني سطر كتبته
اول جمله مبين انك بديريتن لاعبن بعلابيبه الغبار وشمسه اللهم ياكافي بحيث ان الواحد اذا راح لصلاة العصر مايروح للمسجد اللي عن بيته غرب او شرق عشان ماتصمخ جبهته الشمس اما بالروحه او الرجعه(استنتاجي من واقع تجربه)

ومن خلال السطر زااااته يبين انك متسحر عصير حبحر وينغنش لاهاتك حتى اللحظه
الوكاد يابو احمد ابعرف منين انت بمجرد النظر الى اخر كلمه من السطر الثاني(لاتعدل ردك:confused: وتحوس الدعوه)
طبعا هذه عينه عن باقي الرد اللي يقوطر (حباً للأستزاده من العلم)
الله يصلح كل قصيمي ;) ويغفر لك مسلم

تسودت عليك يابعدي وسعدي انت استعذرك سمحاً(استمحيك عذراً) يابو احمد لاتلومن لك بشغاف القلب مكانه رغم شهابة الشهبان

والله يابو نواف ماعندك لعب
تكتب بقلم عريض بعد :p يابو نواف ولد اللجه هاجن بي يقول استحي اشري كنافه لحالي
بعدين تمغطت الكنافه ووصلت لمرحلة سنبوسة الليل ونكتفي بهذا القدر والا سنعرج على جرة الفول وقليب التميس المسمسم

ابوهندي
لاهنت على الرد ذو سعة الصدر
اشكر لك تعليقك يا حبيب ال B


هلا وغلا ابو عبدالله
ياخوي شركة الاتصالات من عق مانزلو مودم اريكسون الواير لس والنت غادين اسهل من الجوال
مير اني مابي سلك انطر نط
ابي موسم رحلات وطلعات ماتخلو منك ولا من قفشاتك(الله يكفينا شره)

تسلم ياعديل الروح

اقصد ياعديل اخوي ;) نسايبكم مامثلهم الله يخليهم ويرزقهم ويكثر خيرهم


ابو احمد
حفرلوجيا من عرفته وهو يحارش جنوبه
مابه موضوع ماحطن فيه قدّيه وقعد يرمي علي
الله يسامحه ويغفر لأبيه واميمته واخوانه وكل اللي حوله
وانت الصادق يابو احمد العصير عصير يوسفي بدون حب :D بس لاتجربه الا وانت قده


اخوي ثهلان
بحكم ان ردك جاي متأخر وانا مثل موتري ديزل ان صخنت(سخنت)ادهر زود
فاسمح لي ادهر معك لأن مواريك سميييييييييح بالحيل ونفسك خفيفه ومنها بالمره نطيح الميانه بيننا ويقال اني اعرفك من زمااااااااان

شف يا ثهلان السهران
المثل يقول من جا بلاعزيمه نام بلا فراش
ابوعبدالرحمن صحيح اني ماشوفه من تالي كثير
بس اني اعتبره مثل الماء اذا حظر ابطل التيمم (صعبه؟؟) حفرولوجوه

والله ياثهلان وانا اكتب هالعباره اتخيل حزة عصير وانت مقبل على هالمكان وتسنع امورك وتشب ضويتك ولا تسمع حسسسسسسسسسسس ابد ماغير مبحلق عويناتك برقص الضو وهي ترقص فوق الجميرات وتسمع صوت اللهب من شدة الهدووؤ


الله يسلمك ياولد نجد
والله يرزقنا من نعيمه ولايحرمنا من فضله وجوده
اشكر لك تعليقك الجميل بارك الله فيك



والله يانا مسكت بكم خط مافيه فتحه اديور معها

على العموم كثر الهرج يطلع فيه اغلاط ان شفت غلط صلحه بينك وبين نفسك وبلا فضايح :o
واللي يفهم كلامي غلط يكون احسن لأني اقصد اللي فهمه :confused:
كم باقي على الاذان؟

ولد عمكم :- ابو علي

:mad: >>>>>>>>> واحد من الشهبان اللي مايدرون وش السالفه :D

حياك الله يابوعلي
أجل متصل عليك أربع إلا شوي وقال إطلع لي
مشكلة اللي يروحون يصلون بالمحطات :(
شف ياخيي ودي أقول إن تعريفك للعشق مهوب لم سالفة
شف خلك معي << كشات جالس متكتف وهزيم واقف جنب السبورة ومعه القلم هذاك اللي ينمط ويصير مؤشر

كيف تعرف انك عاشق محب

هو انك تتنهد ايلا حل طاري محبوبك التنهد لا ارادي
التنهد هذا يصير لغير العشق والحب ..مثلا مثلا اللي عليه دين ..إلامنه تذكر الديانة تنهد ذيك التنهيدة اللي من قوته يطيحن الأوراق اللي بمخباته << صارت طحلة مهيب تنهيدة :confused:
ويخليك تسج بخيالك يم اللي تحبه
الخيال والسجة دايم مهوب لازم للمحبوب والعشيق ..وماهنا أكثر من سجات المهابيل :(
هو اللي يخليك تنام بدري عشان يمر الوقت بسرعه وتشوف محبوبك
طيب واللي يكون شاربن أكتفيد بين عشاوين ..هذا مير أول مايحط راسه يشاخر بساعته .. يعني مهوب لازم يكون عاشق .. أو اللي تعبان ومرهق وكارف يومه كله هذا ينام بدري بعد ..واللي يبي يسافر ووراه طريق طويل من الفجر ينام بدري
هو اللي يخليك تنبز من الصبح قبل ترن الخراشه اللي تعودت تحطه بالقدر فوق راسك
هذي تصير للي عنده مديرن أقشر يحسم عليه كل يوم لمين بالأخير يصير مديون
.
.
.
وبالنسبة للمطر والربيع نقول يارب ياكريم لاتقطعنا من رجاك ونقول يارب إنه سنة خير وبركة وأمطار وربيع بكل مكان يسعد بها الإنسان والبهم والطيور
مشكور يابوعلي