منتديات الرحلات - قالواحكوبك قلت وش هم يقولون

قالوا حكوا بك قلت وش هم يقولون
وش قيـل فينـا يالوجيـه الفليحـه

شوفوا مردُ الهرج وش هم يطـرون
حتى نعرف مـزوره مـن صحيحـه

كان الكلام من المعادي على هـون
بعض المسبـه بالمجالـس مديحـه

تجيـه عربـانٍ مـن الله يخافـون
عن الظليمـه ينصحونـه نصيحـه

لو كل خلق الله على الحق يمشـون
كان القلوب من الخطـا مستريحـه

كم واحدٍ بعروض الأجـواد مفتـون
وهـو سلومـه يفضحنـه فضحيـه

وكم واحدٍ يطعن وهو فيـه مطعـون
يذم ريـح النـاس والشيـن ريحـه

بعض كلام الناس تهمـات وضنـون
قـولٍ تنميـه الوجيـه الوقيـحـه

الظلم لو فازوا هلـه مـا يدومـون
راع الظليمـه لاتباطـى مطيـحـه

والناس هذي الناس من عصر ذالنون
كلن علـى دربـه ركابـه مشيحـه

مقرود يامن بـدل اللـون باللـون
بعض الكلام يحرفه عـن صحيحـه

والصدق هو والكذب ماهو بمقـرون
كان إنها تـدرس بلهجـه فصيحـه

مايمدح الرجـال بالشكـل واللـون
إبحث معه لينـك تعـرف القريحـه

تراك تعرف عنـه وأنتـم تهرجـون
يبين لك مـن كـل جـودٍ نضيحـه

المستريح اللي من الشـك مامـون
مع كل خلـق الله علومـه مليحـه

كم واحدٍ حـيٍ لـه النـاس يثنـون
وإليـا توفـى قالـوا الله يبيـحـه

وكم واحد لو هو باالألحـاد مدفـون
ذكراه عند النـاس بيضـا صفيحـه

وكم واحدٍ يجمع ملاييـن وخـزون
مـالٍٍ تنميـه اليديـن الشحيـحـه

لا تشكره رملـى ولا فـك مديـون
ولا حل مشكلـة النطيـح ونطيحـه

ولا له على جاره من الفضل ماعون
لـو إن جيرانـه تشـوف الذبيحـه

وكم واحدٍ جيـران بيتـه يحمـدون
للجـار ريـف وللجماعـه منيحـه

وكم واحدٍ منـه العـوادي يخافـون
زبن المخيف اللي كثيـرن فحيحـه

ربعه نهار الضيـق فيـه يتـذرون
لا جا نهـارٍ فيـه لجـه وصيحـه

وبعض الرجال بهم شريفين وعفون
كلن علـى ماقيـل يرجـع لكيحـه

وبعض الرجال بضحكهـم يستغلـون
يجيبها مـن نـوع زلقـه بطيحـه

هذاك بين له مـن الهـرج مدفـون
خله إليـا شافـك يزيـن سميحـه

الهرج لـه نقـال والـرد للشـون
مزح الجزع يثـر بكبـدك جريحـه

هذا وأنا ماني من النـاس ملسـون
لاشك أرفض مـن تزايـد جميحـه

قلته وكل النـاس غيـري يقولـون
راع الظليمـه لا تباطـى مطيـحـه

الشاعر مرشد البذال - يرحمه الله
تقبلوا تحياتي للجميع