بسم الله الرحمن الرحيم الله يعطيك العافيه اخوي جناح تبوك معلومات قيمه ومفيده خصوصاً لنا حنا اهل نجد مانعرف للبحر والغوص بس ماهوب على اخيك <<<<<<ملك اللقافه والمغامرات لي تجربه سابقه مع الغوص فيها من الطرافه الشي الكثير ترا ماهوب اجباري خرابيط نبي نوسع به الصدر في هالشهر الفضيل كنت مع ولد خالتي في رحلة عائليه لشرق اسيا وفي مره من المرات اللي رحنا فيها للبحر وانا اشوف هاك الاعلان عن اشياء كثيره منها تعليم التزلج على الماء و الشراعي الفردي والغووووووص واخييييك مطير عيونه والله سن ولد الخاله حس بقتراب الخطر ومن قبل اقول شي قال اصحى تفكر في الموضوع لامن قريب ولا بعيد المهم ما اطول عليكم يابن الحلال ماراح تموت ولا راح يصير الا الخير ترا البحر مثل البرسه حقت المزرعه يمين يسار لين اقتنع المهم رحت افاصل الجماعه وهات يامكاسر واخيك مايدري وش القصه وهم يسألون عندك شهاده غوص وانا اقول انا استاذ غوص الزبده اتفقنا وبدو يوزعون العده وحنا طايره عيوننا ماندري وش نسوي بهن وخويي كل شوي يقول شكلنا رحنا للموت برجلينا شكلنا نبي نذكر بالديره بيني وبينك انا عقب هرجه ويوم صار الموضوع جد تقل دخلن الماء وبديت اناظر البويب مادريت الا اللي يجرن ويلا ايش مقاسك . وشو مقاسه ويقعد ايناظرن ويتامل فيني شوي قلت وش عنده ذا مادريت الا يوم معط هاك البدله حقت الغوص انا يوم شفت البدله تقل شايفن مناير مصر من الفرحه لأني ماعمري شفتهن الا بالتلفزيون. قال ادخل هاك الغرفه وبدل ملابسك قلتله اوكي ايقالي معلم في الشغله طبعا الجو حول البحر رطوبه وحر وشكل نظراته ماكانت ثاقبه يعني يبيلي مقاس اكبر شوي هوش انا وهالبدله لييييين كتب الله الانتصار وقدرت اللبسه يوم طلعت وانا احس نفسي كولمبس بس ابي قرش اتهاوش معه ولا حوت اتعشى عليه وهم يطيحون من الضحك خير وش السالفه اكيد شكلي غلط انا وهالبدله ولا ذكرتهم بحد من ربعهم وش السالفه ياشباب قالو انت لابس البدله بالمقلووووب قلت لا.....هين عاد شكلكم تمزحون وانا اتمقل البدله قلت ماعندكم سالفه ياخي السحاب (السسته)من قدام وين الغلط قال ايه السحاب لازم يصير من الخلف قلت عاد يااااااااااله قدرت اللبسه اما افصخه صعبه شوي عادي خل نمشي بس يارجال واشوف الخوي ولا الحال من بعضه قلت اشوى الفقع حول الرقه والله ياشكلي طولت يكفي اليوم هالقدر الحلقه القادمه كيف تعاملنا مع العده وركوبنا القارب وحنا ما نقدر نمشي من هاللي برجلينا