فــــقـــع ... قـرقـاص ... حميّض .. وقريب من الرياض ما اصدق رحلة مصوره .راعي الهــدد

[راعي الهدد]

تحملوني يالربع
أخوكم طلع بأهله ووسع صدورهم يم شغايا بنبان الي توالي الرياض
وهو مكان جميل جداً جداً وممتع بكل ماتعني الكلمه
وميزته الوحيده التي لن تجدها في غيره
أنه قريب من الرياض تخيل من البيت الين تآصل المحل 60 كيلو او اقل يعني مناسب للعوايل حيل
بس مشكلتنا الي ذابحتنا هي اهمال الناس في تنظيف اماكنهم اصلاً هذا المكان كان محمي حسب افادة اخونا معاند الليل لي كان محمي وتوه مفتوح هذي السنه ومع ذلك مافيه احد يقدر غدياتهم وعشياتهم مرميه
عموماً خذ عيالك ورح يمه ووسع صدرك عشب كثيف وشجر طيب بالحيل ومسايل توسع الصدر وحزيمات طيبه بالحيل واشوف الناس هناك تدور فقع والقطو فيه شي طيب
عموماً لقطت لعيون الأعضاء الكرام كم صوره بعد الطقاق ومحاولة الأفشال من أحد الأنساب (( ابو معاذ )) الله يهديه يبي يخرب علي التصوير كل ما اجي اصور وصرت اخت ختات وهو مايدري ههههه
1 - الصورة الأولى سيارة ابو حمد ودليل الرحله (( الخرّيت )) الذيب منكم يعرف وش الخرّيت وكلكم ذيابه بتعرفونها ولاشك
الظاهر نيسان لو تدري عن الصوره اسرقتها مثل الجزيره الي مشتغله فينا اعضاء مكشات ولا احد يدافع عنا (( ههههه واثق ))

2- وهذي لقطة طيبة للعشب الي هناك وكثافته تصدق في بعض الأماكن يغطيك تغطيه

3- وهذي وحده مستحيه كل ما اجيها مع جهه تعيي تقول ارجوك ارجوك الله يرحم والديك لاتصور قلت تراه حلال ولستي من ذوات الأرواح حتى تقولين لاتصورخلاص ولايهمك ويوم قفت كشحت لها هالصوره هههههه

4- وهذي لقطة أخرى للعشب هناك مع تخريب ابو معاذ الله يهديه

5- وهذا تعبث مني ابي اسوي مثل بعض المحترفين وعجزت اظبط الأعدادات توني شاري الكمره واتعبث انواع التعبث الله لايوريك

6- ابشركم طلعتنا صارت بوقت دفوه ولله الحمد بس الوالد الله يحفظه لزم علي الا تشب لنا ظويه قلت سم واليني جايب معي غضا حاطبه قبل اسبوعين وشبيتها له

7- وهذا طرف من مطبخنا الفاخر تشوفون فرن قليم قاز هههههههههه اي قليم قاز الله يرحم والديك كسرة قز وانت الصادق

8- وهذي مرقة اللحم طفينا عنها وجاهزه لكب الرز (( المعذره يا أخوان ابو معاذ حياسني حوس وتراه اقوى مني والا كان صورة لكم كل شي عن طبختنا وعن امورنا ))

9- وهذا الرز مخمور وجاهز للطبخ يازين شكله حتى وهو ني

يتبع >>>>>>
ارجوك لاترد اصبر شوي باقي كم صوره تكفى تكفى لاترد

لاترد تكفى

[راعي الهدد]

تابع <<<
10- وكانت السلطه عضو مشارك في الرحلة المباركة (( احرصو على السلطه تراها طيبه حيل ))

وللفاكهة طعم خاص في البر تآكل فيها ماتقول لا بس الله الله في ابو صره تراه على كيف كيفك يالله الجنه



11- آآآه يابو معاذ الله يصلحك والله اطقاق الين صورة هذي يالله يالله لحقت تو الكشنه طايره من علو القدر

12- وهذي الكشنه معزولة على جنب وشغل يحبه قلبك

13- وهذي الحيمات نعيمي طيب قولو ماشاء الله

14- وهذا الصحين جاهز للألتهام وهو بعد قليل في طريقه لمكان الرجال شرواكم لأن تعرفون عندنا ترتيبات يحبها قلبك مكان للطبخ ومكان للجلوس وبدون هالترتيبات تطلع الرحله ملح هههه ياقدمه ملح

15- وهذا المفروك الي يحبه قلبك البر لابد منه في طلعتك للبر لاتنساه

16- البصل يا أخوان خشمً طيب لايفوتك البصل الأخضر (( الزماليق او بصل زماليق ))

17- ومثل ماقلت لكم في موظوع سابق عن القرقاص لابد منه ولا يغادرني ابد وهذي بياله محكوره قرقاص عقب تناول الغداء خليت القرقاص يرصص الباقي هههه ياسللالالالالام سلم

وبعد تناول الغداء ضفينا العفش والبزارين والحريم وقلنا وينك يارياض معه ووشت على طريق المطار ووشت على طريق الدايري الشرقي ووشت على البيت والله يا اني قديم اليوم من الي يقول فيكم وشت هالأيام
18- وهذي صورة مغيب الشمس تكلفت واجد الين طلعت كذا والله خربطت ثم خربطت الين طلعت كذا والعذر والسموحه

أخوتي الفضلاء تقبلوا فائق الأحترام والتقدير وانتظرو القادم فهو اشد وأنكى موظوع صارخ ينتظركم احبتي
محبكم يا أعضاء ياحلوين
ابو حمد

[ابو أحمد]

ماشاء الله رحلة موفقه خاصة ان فيها الوالد والعائلة الله يخليهم لك ويخليك لهم
الموضوع ما فيه صور للفقع لا تقول ما لقطت شي
وصورة الورده مبين انك ما شغلت الماكرو :d

[راعي الهدد]

ابو أحمد ياحبي لك والله انك رهيب تبين اعرف ماكرو وما ماكرو عساني اعرف اضغط حق الفلاش ههههه والله يا أني ضغطت فيها الين قلت بس ماخليت زر الا وضغطته بس ياحيلة الله هههه

وأما الفقع والله مالقطت لأن أنت عارف الأهل معك ودقشت هالبزارين تبي توسع صدورهم بمزح وملاحق وخليتهم يوسعون الصدر ووسعت الصدر معهم والفقع ملحوق عليه

تقبل فائق المحبة والتقدير

[الليل]

ياسلام ..
رحلة مصورة منوعة جميلة .
وكأننا شاركناك تلك الرحلة من خلال الصور والتعليق .

[خليف العيد]

اخوي ابوحمد
ماشاء الله عليكم
اجل اناسه وفلة حجاج
لا انتم بعد اللي تطبخون
عندي سؤال الله لايهينك
الدجيجات اللي على الرز وشوله ؟؟
وانتم معكم نعيمي الله يهديك
علا العموم فيه العافية إن شاء الله
تحياتي
اخيك : ابوسامي

[ابوريان]

ماشاء الله عليك
حقيقة تقرير مصور رائع وتكتمل الروعه بالأهل وخاصة الوالدين الله يرزقنا وإياكم برهما.
يعطيك العافية راعي الهدد

[راعي الهدد]

أخوي الغالي الليل شاكر مرورك الله يجزاك الجنه

الغالي ابو سامي ياهلا بك ويامرحبا والدجيجات من باب التنويع هاه شوي من ذا وشوي من ذا

ابو سامي شكلك ماتبي غير اللحم تدق فيه دق زاد اقول وشفي الرجال دايم علومه سفره (( العلوم الي انت خابر )) ههههه

الغالي ابو ريان شاكر مرورك يابعدهم

ويشرفني والله

[الرحال]

مشكور ابوحمتو . على التقرير الرائع والرز الاروع ..

ولحم النعيمي ماشاء الله . . ماقصرت يالغالي ..

وننتظر صاروخك .

[راعي الهدد]

المشاركة الأصلية كتبت بواسطة الرحال

مشكور ابوحمتو . على التقرير الرائع والرز الاروع ..

ولحم النعيمي ماشاء الله . . ماقصرت يالغالي ..

وننتظر صاروخك .

الله الله

تكفى يارحال لاعاد تقول لي ابو حمتو

والله انك شعفت قلبي تذكرني بواحداً غالي علي حيل حيل الله ييسر امره يارب ويجمعنا به في الأيام القريبة ياربي

الرحال شاكر مرورك ياغالي

[عاشق المطر]

راعي الهدهد
موضوع جميل تشكر عليه..........................

[راعي الهدد]

الغالي عاشق المطر شاكر مروروك

ومقدر لك ذلك

وحياك يا أخوي

[ثامرالماضي]

بسم الله الرحمن الرحيم

الغالي راعي الهدد ... ماشاءالله عليكم ... وناسه وفلّه الله يديمها عليكم ...

والصراحة تقرير رائع بالحيل ... بس أبو معاذ ضّيق صدورنا كلنا (( شفلك صرفه معه بالتقرير الثاني )) ههههههههه

عموماً الله لايهينك وبيض الله وجهك ...

وننتظر المزيد ... من الجديد ...

,,,,,,,,,,,,,,,,,,,,,,,,,,,, تحياتي لك ,,,,,,,,,,,,,,,,,,,,,,,,,,,,,,,

[راعي الهدد]

المشاركة الأصلية كتبت بواسطة أبو شعلان

بسم الله الرحمن الرحيم

الغالي راعي الهدد ... ماشاءالله عليكم ... وناسه وفلّه الله يديمها عليكم ...

والصراحة تقرير رائع بالحيل ... بس أبو معاذ ضّيق صدورنا كلنا (( شفلك صرفه معه بالتقرير الثاني )) ههههههههه

عموماً الله لايهينك وبيض الله وجهك ...

وننتظر المزيد ... من الجديد ...

,,,,,,,,,,,,,,,,,,,,,,,,,,,, تحياتي لك ,,,,,,,,,,,,,,,,,,,,,,,,,,,,,,,

حياكي اخوي الغالي وشاكر مرورك وردك الجميل يابعدهم

وابو معاذ ابشر والله من يأدبه الروحه الجايه مايروح معنا ابد وش تبي بعد هههه

[راعي الشاص]

الف شكر اخوي راعي الهدد
طلعة ربيع موفقة ، والله يوفكم يارب