ارسل لي ورديت..

[جمعان الخثيمي]

هذا خوي لي يقاله أبو نايف الله يمسيه بالخير لي عنه مده ما قنصنا سوا وهو راعي طير وأنا راعي الثلاث((الطير والبندق والسلق)) وكن الرجل اشتاق وحست من أبياته أنه في حاجه فأرسل على جوال هل الأبيات..

أبطيت عن ربع المروات الجود=الطيبين أهل الكرم الوفى والكرامه
عز الرفيق اللي للأضداد بارود=منهم رجال ينطحون الجهامه
واخص كساب الثنا راعي الفود=اللي تعلا فوق راس الغمامه
سلام حال ينثر المسك والعود=ينصا الرفيق اللي فقدنا سلامه
مافيك يا ليث الرجاجيل منقود=إلا السماحه والندى والشهامه
مادام راسك تلفحه هبت النود=فانا بخير وصحتين وسلامه

ومن الأبيات حست أن الرجل جاه كلام من منافق وراعي مشاكل الله يهديه((طبع حريم))..

فردبت عليه وقلت..

حييت يا رجل به الخير موجود=قصرت في حقك عساك بسلامه
ابشر بعون وعز لا صرت مضهود=أجيك في جيش رفيع مقامه
كسبي رضاك اللي به الحيل مجهود=رجل مثيلك مكسبي في احترامه
سلام اعداد مامشى راعي الذود=ينصا الديار اللي عليها الغمامه
الحر يسكن في ذرا عالي الطود=وإلا الصنادق مسكن للحمامه
سلمك رب عالم خير معبود=من شر مغبون كثير كلامه

وسلامتكم

[حمد الجبيرى]

اخوي قنيب الذيب يامال العافيه ابيات جميله -لكن تقل البيت الاول فيه كسر مجرد ملاحظه مشكور

[النمرالتميمي]

موفق بإذن الله ... لك مني أجمل تحية .

وصح لسانك

[محمد المعارك]

صح لسانك وصح لسان ابو نايف
ابيات قوية وجزلة وتدل على شعراء بمعنى الكلمة .


الشطر الأول في البيت الأول في قصيدة أبو نايف وهو:

أبطيت عن ربع المروات الجود الطيبين أهل الكرم الوفى والكرامه

كأني ارى انها ناقصة حرف الواو

بحيث يكون هكذا:
أبطيت عن ربع المروات و الجود

بارك الله فيك.

[رحال بريدة]

أبطيت عن ربع المروات الجود

الطيبين أهل الكرم الوفى والكرامه

0
0

مثل ماتفضل به مشرفنا القدير صـقر من أن الشـطر الأول ينقصه حرف واو
وأما الشـطر الثاني فلعل الشـاعر أراد أن يقول ( الطيبين أهل الوفا والكرامة )

00
وفي بيت آخـر :

سلام اعداد مامشى راعـي الـذود

كأن هذا الشـطر يحتاج إلى تعديل ,,

وأنا لاأشـك في أن من كتب هذه الأبيات شاعر جزل ويمتلك
إحساساً مرهفا , ولكن لعل السـرعة في الكتابة جعلته ينسى
بعض هذه الأحرف والكلمات أو يزيدها دون قصد
وهذا يجب أن لاينسـينا جمال هذه القصيدة وماتحمله من معانٍ
سـامية رائعة ,,
صـح لسـانك يالغالي ,, منتظرين أن تسـيل القريحة مرة
أخرى لنســتمتع سـوياً بمثل هذه الرائعة ,,
لك خالص الود ,,

[جمعان الخثيمي]

صحيت يا صقر أنا اللي ماكتبت الواو والعتب على الكي بورد وأما ((سلام اعداد))فالغلط هنا لا أغتفره أبدا لنفسي لأن الكلمه((سلام مني ما مشى راعي الذود))