مروحه السوبارو احترقت

[(راعي الباترول)]

السلام عليكم

ندخل بالموضوع على طوول

انا عندي باترول ربع موديل 88 وحاط عليه مراوح سوبارو

امس وانا ماشي ارتفعت حرارت السياره وصله لل اتش


وقف الى اشوف نااار شابه من احد المراوح واطفي السياره


وطفت النار فكيت المروحه لقيتها ذايبه على الدينمو حق المروحه محترق

والدينمو مجيم


عااد الله لا يهينكم

من وين اجيب دينمو ومروحه لحاله لان الجرم عندي

ووش سبب احتراق الدينمو هل فيه خلل في التوصيل ولا كذا صدفه


مع العلم اني شابكها على السرعه الثانيه على طوول


ياليت تنورون موضوعي بالردود

[حامد الغامدي]

راعي الباترول:

سبب الحريق قد يكون من عدة أشياء منها ان الأسلاك قريبه من مصدر حراره، أو الأسلاك ضعيفه ما تقوى تحميل الكهرباء، أو الكتاوت من النوع الرخيص اللي ما يتحمل الجهد الكهربائي، أو الدينمو صار به خلل، أشياء كثيره، لكن الشيء الأساسي هل انت حاط فيوز، والله يسلمك من كل شر.

الدينمو تحصله عند قطع الغيار أو التشليح.

[الشيخ قوقل]

السلام عليكم ورحمة الله وبركاته

أولا أسأل الله العلي الكريم أن يعوّضك عن الخسارة

هذه مشكلة مراوح الكهرب ولا شك أن فوائدها جمّة وكثيرة ولكن مقابل ماذا !!!!!!!؟؟؟؟؟؟؟

مقابل خطأ بسيط لا تصل قيمته لـــ ريال واحد أو أقل فتعمل هذه المصيبة مشاكل وخسائر باهضة

ولا أخفيك أنا أمتلك باترول 2004 فتك ولم أفكّر بتركيبها للسيّارة لحظة واحدة علماً أنها موجودة لدي بالمستودع جاهزة بأسلاكة والمطلوب عند التركيب فقط أن أفك أصابع البطّاريّة وأركّبها

نعم فلو حصل مثل ما حصل لك .... وبكم مكينة الباترول
فما أحلا وآثق من مروحة المصنع إذا لم يتقن المهندس تركيب مراوح الكهرب أو تكون أنت من الناس الذين يغفلون عن مؤشرات الحرارة وجميع الأمبيرات

فقط وجهة نظر

[(راعي الباترول)]

اخوي حامد
ما يجيك الشر ان شا الله

الفيوز مدري فيه ولا لا بس ما اتوقع فيه فيوز والكتاوت احسن شي بالسووق

بس المشكله انا عندي مروحتين وحده منهن الي احترقتت والثانيه الحمدلله شغاله تمام

مشكور على المرور

[(راعي الباترول)]

الشيخ قوقل

مشكور على المرور الطيب بس مراوح الكهرب ما نستغني عنها تريح الموتر

انا لي مركبها سنه ونص وما فيها اي مشكله بس هالمره مدري وش فيها

[عروق المظهور]

السلام عليكم ورحمة الله وبركاته

اولا الحمد لله علا سلامك ولا المروحة بدالة مروحة

الترهيم لة ايجابيات ولاكن سلبياتة اكثر

وسبب المشكلة يصعب تحديدة دون رؤيتة

وانصح اصحاب الرحلات بالابتعاد عن الترهيم والسبب انة مو كل محل يتقن الترهيم

وسبق ان حصل لي مثل هذا الموقف ولاكن موحريق بل عطل مروحة ترهيم وكان المحل بعيد

حينها قلت يازينك يا الوكالة

إ ذا كنت تبحث عن قطع غيار

رح إلى تشليح العجلان او القفاري مدينة بريدة

او إ ذا كنت من الرياض تشليح الصناعية القديمة وسط الرياض

[(راعي الباترول)]

مشكور على المرور اخوي

عروق المظهور

[عبدالرحمن الدرويش]

راعي الباترول.. هلا بك

بداية الحمد لله على السلامة
وزين اللي التأثير كان بالمروحة ولا تأثرت المكينة
يالغالي المراوح الكهربائية مهم فيها انك تحرص على الأسلاك ذات النوعية الممتازة لان فيه بعض الاسلاك تحتر وتذوب غير كذا لازم تستخدم كتاوت بالإضافة إلى فيوزات نوعية ممتازة تكون كبيرة شوي ، واجابة على سؤالك فالقطع اللي تبغاها كلها في الصناعية القديمة عند اللي يبيعون قطع تشليح
عن نفسي ولله الحمد معاي ربع 2004 وعدلت فيه الى ما قبل
والمراوح استخدمت مروحة الشيروكي
والآن مراوح السوبارو وبجد فرق قوي
أخيراً أخوي أنصحك تتوجه لمحل معروف على الأقل للإطمئنان من ناحية الشغل
فيه بالصناعية القديمة محلين ان كان لك خاطر ارسل علشان ادلك عليها

والله يعوض عليك.. أخوك أبو فهد

[أبوخالد التويجري]

هلابك عزيزي وعذرا ع التأخير



السبب بين من الآن وهو :-

مع العلم اني شابكها على السرعه الثانيه على طوول

هذا الحمل الكبير وفي هذا الحر الشديد صعب تتحمل المراوح السرعه الثانية دوم والخطأ الأكبر هو إنه مافيه فيوز ولو كان فيه كان ما احترقت ويمكن يكون موجود فيوز بس اكبر من مقاسه وبذلك يحترق المروحه خصوصاً إنك حارقه بالسرعه الثانية على طول دون تريحه


هذا وانصحك إنك ماتركب المراوح إلا عند ناس خبيرة بها مثل الخطيب وغيره




الله يحفظك وجميع المسلمين




ابوخالد

[احمد التويجري]

الحمدلله على سلامتك اولا


لكن اتمنى انك ترجع نظام المروحة زي ما كان شد بلد بكلتش ومروحة على السير دام ان السيارة ما ترتفع حرارتها


وشوف لك مروحة اضافية عند الشبك لكن اتوقع الباترول فيه مروحتين خارجية

[(راعي الباترول)]

مشكورين على الردود يا شباب وابشركم لقيت مراوح وركبتها

شريت المروحه ب90 ريال

والحمد لله زبطت
تحياتي