يا حمامه لا يصاليك السموم=لا تظنينه مطر هذا عسام
واصرفي قوقاك عن صوتن يلوم=استمع لحداك قلب المستهام
جيت طلحه قفرها دون الحزوم=في شعيبن هملت فيه الرهام
مبرضات فروعها ملفا القروم=ظلها الواسع مثل سود الغمام
في هضابن كاثره فيها الرجوم=من تعلا في حصاها ما يلام
عندها قلته عثت فيها الوسوم=سيل مزنن تمكث ايامن ركام
اشهد ان النفس ما عنها تزوم=عزلتن غنا بها جوز الحمام
طارت ام غرير بالحاجر تحوم=والحصى النابي عليه الطير حام
ساحتن تبعد هواجيس الهموم=حتى لو يعوي بها ذيب الظلام
نبتها النوار والقار معدوم=تنبهر من ضلعها وقت الجهام
ما ترا فيها سوا لمع النجوم=والبدر نصف الشهر غادي تمام
صاح فيها هجرسن مع صوت بوم=واستلج الذيب من بين الثمام
بالدعايب هايماتن والردوم=سارحاتن مع زواحيف الهوام
موقدن ناري خلاوي دون نوم=مستلذن عند كيفي يا سلام
عندي الرسلان باسفلها الرقوم=في حشاها الهيل له فيها التطام
في فراغ الوقت ما عندي لزوم=لا ارتباط ولا وعود ولا دوام
العشا وبران ما عندي بحوم=واحدن يكفي مع الخبزه ويدام
والغدا صايد خرينق به شحوم=من طوارف حرتن فروه سحام
ساهرن بالبيدا قصادن جزوم=واسلا بالقرقوف عن كتم الزحام
احلا من ملاد مداح الرخوم=مستلجن لا فتاة ولا غلام
ضاحكن وجهه وقلبه ريح ثوم=اسود النيه مع صفوف اللئام
لبتدا المذن ينادي ما يقوم=الصلاة اثقل من النير وسنام
رفرف الخفاش ما عز الخشوم=يروي البهتان محزوز اللثام
ناقل الفيوم قطاع اللحوم=تايهن بالدار لو كانت هدام
يحسب انه مع مواليه معصوم=والحقيقه في ضلالات الهيام
منكرين الحق لاوين الزقوم=غارقينن في زخاريف الحطام
يالله المخراج من علمن جثوم=صارت الدنيا عجاريف وكتام
دوبحت فيها تعاريف السلوم=ما يدوم الحال لله الدوام
يوسف الخليفة ( أبو عبد الله )
يا حمامه لا يصاليك السموم 0000000 لا تظنينه مطر هذا عسام
العرض المتطور
