طرا لي على وقت المسا فايتن قد راح=الا يا هوا بالي ربيعن زمانه زيح
ولا لي من الذكرى سوا قافي المياح=يغوص بمجمة خاطري نازلن ويميح
تهاوا على بعض السوالف كما الاشباح=يريح الخفايا عن هجايس مدابيح
غشاني حنين الشوق بالبال كالمصباح=اليا زاد فيه النور فاح بنسيم الشيح
فلا لي سوا صبري واعدي على اللولاح=واقول القوافي واستوي بالرجوم مريح
انادي على نجم النعايم طبيب جراح=اليا بانت بروق المناشي لها تلويح
على عالي الامزان واخشومها طفاح=كما باين سيوفن تبارز سما واتطيح
انا خاطري ضرا على عازلن مرتاح=تواسا وحيدن والليالي علي تصيح
اليا زانت اوقاتن لها ذابحن سفاح=عسى خالق الدنيا يزيد الخفا تفريح
اساير مقامي لو بدا فايحه لفاح=واسامر عميق الروح لو ناشه التشويح
واسير بصحاري ديرتي وارسم الابطاح=لما تاضح الجره وهي للقدم تصريح
وانا قلبي يزرا نوب ونوبن يجي مزاح=اليا ضاق دلا يرتخي حاجره ويسيح
فلاكن ربيع البال ينسج عليه وشاح=لما يمسي النوار مثل المواضيح
ترا هذي الدنيا حمامن عليها سلاح=تشوف النواظر فيها دمع التماسيح
حذاري شجايرها ولو طلعها التفاح=عبادن جلو عنها تراهم مرابيح
يوسف الخليفة ( أبو عبد الله )
طرا علي وقت المسا فايتن قد راح 0000000 الا يا هوا بالي ربيعن زمانه زيح
العرض المتطور
