صور رحلتنا يوم العيد الموافق 1/10/1433هـ اكثر من 200 صورة ويوجد فيديو .
حياكم الله يامشرفينا ويا أعضاءنا وزوارنا الغالين وكل عام وانتم بخير وسلامه وشلونكم عساكم بخير . حبيت أعرض عليكم رحلتي المتواضع يوم العيد الموافق 1/10/1433هـ مع رجال شرواكم ومافيهم الردي لان الروحه والجيه ودك تحرص مايكون الردي له معك مجلاس .وكانو أعضاء الرحلة راعي المجاهيم ابوعبدالله والشاعر ابونعيم وابوعبدالله خالد وابوسما عبدالكريم وابوفهد سليمان ومحدثكم الطرس ممدوح وفقدنا ابوبدر عبدالرحمن وابوعبدالله وليد كانو بيرحون لكن الظروف اجبرتهم بعدم الرحله معنا ونقولهم الجيات اكثر . وابذكر بعض الديار اللي مرينا بها ومابي احد يزعل من اهل اللي لم نذكرها لأنها واجد وانتم تدرون فيه مدن ومحافظات ومراكز وقرى وهجر وكانت بداية الانطلاقة من بريدة – عفيف –الطائف –الباحه –النماص –بالجرشي- ابها – رجال المع – محايل – متزه السود - السحاب السحاب - وغيرها لم يحظرني اسمائها. والمسافة التي مشينها تقريباً 3300 كم .
وهذي قصيدة شاعرنا ابونعيم بالرحله .
حب الخلا ومطارد الصيد ثنتين ... بين الضلوع العوج نعلن مقرها
أشفق وأطالع راعي الطيب بالعين ... وأخذ وصوف الجود ماحد احتكرها
ومرافق اللي لأظلم الليل يضوين ... يضفي على دنياي قولة قمرها
إحرص على الطيب ورافق هل اللين ... اللي على الرفقه يقوم بعبرها
رفقة هل المعروف دايم عناوين ... وإعرف ترى العنوان بان بسطرها
مقيولتن قبلي منول وهالحين ... مالك ومال اللي قليل ثمرها
رافق هل النخوات جلاية البين ... محزمك بالشدات حزت خطرها
اللي على درب المناعير ماشين ... اللي تقود الجيش لأظلم سفرها
وجنب دروب الشجر والثعابين ... أنصحك لاتمشي وجنب لأثرها
ماملك ومال اللي مسمين غاوين ... هذي نصيحة يالفتى وإعتبرها
ومن عقبها دوكم رسالة وتثمين ... الطرس ياهل العلم جايب صورها
بالتغطيه من بين ذيك الميادين ... دار الجنوب اللي طويلن عمرها
بين البراد وشوفة البرق بالعين ... وبين الربيع وظلعها مع سمرها
ناخذبها سجة من الوقت للحين ... نطردبها ظلم الليال وقهرها
مع ربعي اللي للمهمات ظارين ... ربعي بني عمي طويلن شبرها
أفخر بهم يوم أفتخر للميامين ... وأسعدبهم يوم اللقا وأعتبرها
وختامها صلوا على خاتم الدين ... الناصح اللي ماعتقد هو ذخرها
وآسف على الأطاله ياجماعة وعذروني على القصور . وهذي لحظة خروجنا من بريدة والتزود بالبانزين بسم الله توكلنا على الله
وبعدها انطلقنا إلى عفبف للعشاء ولله الحمد وصلناها وهذي مقتطفات من الجلسه والعشاء بس ياجماعه نبيكم معنا بالعشاء
زبطنا العشاء فراخه يحبهن قلبك منقيهن ابوسماء الله يعطيه العافية
وهذولا الشقردية يتشاورون هل نواصل او ننام في بالطائف وبعد التشاور مع اميرنا راعي المجاهيم تم الاتفاق بالأجماع على النوم بالطائف
خلصن الفراخه وقلنا خلنا نقعد الراس بكوب من مرقتهن بس انا خابر اللي يقعد الراس الشاهي شكل الجوع ذبحن
حطينا الفراخه بالصنيه حلوه والله لتحمير
كبينا الرز وابشركم خلص العشاء ويالربع تفضلو على المقسوم وعذرونا على القصور
وبعد العشاء صحصحنا وتوجهنا لطائف للنوم وبعد الوصول اخذنا فاكه
هذا ابوسماء وابوفهد والشاعر جهزو الفطورياجماعه تفضلو الله يحيكم
الحمدلله نعمه تبي شكر براد ورجالاً شرواكم وربيع
وبعدها قالو الربع فيه خط ودنا نلقي نظره عليه زي كرا يربط الشفاء بمكه والله اعلم لكن اول مادخلنا الخط طبعاً تحت الانشاء ونلاقي قلابي عدمانم ادري مدحدر وضارب حصاة ام ؟؟!!
تلاحظون الخط ماكمل
بعدها توجهنا للباحه مع الخط السياحي روعه مناظر حلوه مثلكم
وصلنا الباحة الحمدلله واتجهنا لحديقة رغدان الجو روعه جداً وتنقط خفيف وغيوم وحكرنا الشاهي ولزم الشاعر ابونعيم إلا يطبخ قلنا كثر خيرك والجلسه تذكرك بالجبل الأخضر اللي بندونيسيا ههههههه مثلاً
ابشركم وصلنا الحمد لله ابهاء وتوجهنا لحديقة السوده طبعاً براد ويقال السودة هي أعلى قمة في المملكة العربية السعودية .
إرتفاعاها و حسب بعض المصادر أنه 3300 م ،
والأخرى تقول أن ارتفاعها 3250 م ،
ومصادر أخرى تقول 3015م .
أما بالقدم فتقدر المصادر ارتفاع قمة السودة بـ 9550 قدماً عن سطح البحر .
وكما تلاحظ أن الإرتفاع عموماً لا يقل عن 3000م عن سطح البحر
المهم صلحنا العشاء والذي جهزه الشاعر جزاه الله خير الجزاء تفضلو يالربع قهوه وشاهي واللي مشتهي فاكه ياكل الله يحيكم دام العشاء يجهز
تفضلو يالربع العشاء جهز مع مرقة فراخه حبها قلبك من ادين الشاعر ياسلام ولا يهنون الربع
يوم صار الصباح تقهوينا وتوجهنا إلى المطل اللي في السوده وهو يطل على رجال المع وقلنا خل الفطور منتزه السحاب
هذي صوره لرجال المع
توجهنا إلى متنزه السحاب وهي منطقة جميل الأرض ممطوره وربيع
اخترنا المكان هذا للفطور وهو يطل على جبال خضراء جميله
وهذي القميريه لعيونكم وعلى معتقد ان القميري عندهم مستوطن وشاهتها في اكثر من موقع
وتم تحميل العفش بعد الفطور والتوجه للحبله
وبعد مانزلنا من السحاب قال الشاعر خابر مسجد قديم جداً خلونا ناقف عنده طبعا المسجد مجدد وباقي بعض الأثار وعلى معتقد ان من ضمنهن المحراب والله يكرمكم المواضي
والمحراب مكتوب فيه التاريخ قربوا لصوره وتشوفونه
هذا الموقع ليفوتكم للي يبي يروح ربيع يفتح النفس بين ابها والسوده
وبعد ماوصلنا الحبله مافقنا يماني من المتسللين الصراحه وضعه يضيق الصدر واقف يشحد واول ماوقفنا لننظر ماذا يريد لانه رافع يده واول ماطاحت عيوننا عليه كيس يحمله على جنبه الايسر وخروج منه رجلين طفل وفي خصره حليب قلنا له وشو اللي بالكيس قال هذي بنتي تعيبت امها قبل فتره قصيره وماتت وانا الان اتنقل بها لي اترزق الله ولا استطيع تركها .
بعدها اتجهنا للسوده اشتقنا للبراد وبين ابها والحبله وقوفنا نصلح القهوه والشاهي
مسكت الشباب إلا نأخذ برشومي
بالعافيه ياشباب
وعقب تبهير الدله بالهيل والزعفران تذكر كلام الشاعر الله يرحمه محمد القاضي
كبه بنجر يسمعه كل مشتاق = راع الهوى يطرب إلى دق بخفوق
واحشه بدلة مولع كنّها ساق = بلورة مربوبة تقل غرنوق
خله تفوح وراعي الكيف يشتاق = إلى طفح له جوهر صح له لوق
أصغر قموره كالزمرد بالاشعاق = واكباره الطافح كما صافي الموق
زله على وضحا بها خمسة أرناق = هيل ومسمار بالأسباب مسحوق
مع زعفران والشمطري إلى انساق = والعنبر الغالي على الطاق مطبوق
إلى اجتمع هذا وهذا بتيفاق = صبه كفيت العوق عن كل مخلوق
بفنجال صين صافي عنه الارماق = تغضي وكرسيه غدان لمعشوق
تفضلو يالربع ترا القهوه جاهزه الله يحيكم كل اللي تبيه موجود اللي يبي تمر واللي كوكاو واللي يبي طحينه طب وتخير ماشاء الله هذي بقاله ياشباب ههههههههه وهذا ابوفهد الله يجزاه بالخير متواضع يقهوينا
وبعدها كملنا المسير لسوده ولزم ابوعبدالله خالد العشاء علي تصليحه على لحيمة حاشي وهذا من تواضعه
تفضلو الله يحيكم يالربع العشاء جهز مع فلفل الجو بارد لان درجة الحراره بالليل 18
وفي الصباح حكر ابوعبدالله خالد القهوه والله كفو فنجال يحبه قلبك مع التمر العضوي من راعي المجاهيم الله يخلف عليه تفضلو يالربع وتشاورو الشباب لذهاب لرجال المع وتمت الانطلاقه لكن مع طريق غير اللي تحت السوده مع محايل قلنا نخلون نفطر ونكمل المسير
هذا ابوسما جزاه الله خير شاري عسل وقال ابذوقكم منه
وبعدها رجعنا لسوده علشان السحاب ضربها والمطر كذلك المظر لايوصف يدخل عليك السحاب بالسيارة وغطاء متزه السحاب
قرب لنا السحاب والناس مستانسه سحاب ومطر نعمه الحمدلله
واجهنا حاجه غريبه وصدق المثل الحاج هام الأختراع وهي لجاء حرامي وشلون يحرسون بيتهم شوفو النافذه اللي يمن فوق وعددها الثالثه فيها سلسله وفي اخرها كورة من حديد يحذفونها على الحرامي من فوق يعني اللي بتطيح لعليه يروح بخبر كانا
الحمدلله أبشركم وصلنا للقمع وهي أعلا مكان في جبال السروات وهذه قرية القر التراثية متربع فوق جبال السروات ومطل على العقبه وتحتوي على موقع فلكي شمسي وفلكي قمري ويوجد فيه 360 عمود تمثل أيام السنه وزين بأكثر من 3مليون زخرفة اسلامية و2 مليون حجر ويوجد على سقفه 7 قبب تمثل قارات العالم كم يوجد على سقفه 3 ابراج فلكية وهذه لحظة التوجه لها
لحظة دخولنا للقصر وهو يتكون إلى ثلاثة ادوار الاول اثار والثاني كذلك اثار والثالث مخطوطات
وشوفو اللي المخطوطه الحجرية التي على العمود عمرها 1400 سنه على مقرأنا والله اعلم
وبعض السيوف قديمة جداً وهذه خيمة من سعف
جازتلي هذي الدله شوفو الممساك حقها من جلد الله واعلم حق غنم فيه شعر
عاد وصلنا لدور الثالث وهو القسم الاهم ويوجد فيه مخطوطات قديمه وكل غرفه فيها نقوش أندليسية قديمة وتختلف عن الاخرى
الغرفة اللي واضح بابها بين المخطوطات هذي يقول ثاني ناس يدخلونها لان فيها مخطوطات قديمه وثمينة من ظمنها صحيح البخاري وهذا الشاعر يتصفه ويوجد كذلك بلوغ المرام
وهذي مخطوطه موضوع فيها شعوذه
وهذا مصحف جميل شكله ومحكم ليفوتكم شكله وكم طبقه علشان تاصل له وهو يعتبر من مخطوطات أندلسية عمره 1200 سنه والله اعلم
ويقول هذا علم الأبعاد الغرب وصلو فيه البعد الثالث والمسلمين وصلو السابع صحن فيه آيات
وشوفو تسجيل زيارة للشخ العلامة ابن جبرين رحمة الله عليه
وتم تسجيل زيارتنا
وبعد ذلك خرجنا لننظر للملحقات لقينا يوجد شقق ومطعم مطل على العقبه لكن المطعم تحت الانشار
وجزاه الله خير صاحب قرية المقر وهو محمد بن المقر الشهري على تواضعه وشرحه الوافي
بعدها انطلقنا للباحة للمبيت وفي الصباح تقهوينا وافطرنا وتوجهنا إلى الشفاء للغداء لنأخذ حقنا من البراد لان ديارنا حر وابشركم وصلنا وثر الجو صحو الشمس حاره قلنا خل نأخذ شليه نريح ونتغداء وهذي لحظة خروجنا من النماص
وهذي العقبه التي تطل عليها حديقة رغدان
لزم ابوسما الله يجزاه خير انا اللي يبي يزين الغداء لكم تفضلو يالربع الله يحيكم وهي الكبسه الختاميه
وبعد الغداء تم الانطلاق مدينة بريدة وهذ لحظة نزولنا من الشفاء
صور رحلتنا يوم العيد الموافق 1/10/1433هـ اكثر من 200 صورة ويوجد فيديو .
العرض العادي
