دنياك بحر و أنت في البحر قارب

[ولد روق]

هذي قصيدة لزميلنا في أستراليا فهد القحطاني من تجاربه في الحياة عسى أن تنال اعجابكم...

اخذت من دنياي علم وتجارب =والتجربة عند العرب خير برهان
دنياك بحر وانت فالبحر قارب=تلعبك الامواج مع كل الاركان
ودنياك مثل الخصم وانت المحارب=والنصر ماياتي بلا دين وايمان
والعمر يمضي مثل عد العقارب=وقت يحين وباقي وقت ماحان
ومن لايواجه مشكلة عاش هارب=واجه ظروف الوقت والعمر ميدان
ومن لايعرف التنس ماصار ضارب=صنعتك في ايدك يمكن الوقت خوان
ومن لايغامر ما يدسم الشارب=غامر ترى الايام رابح وخسران
ومن حاربك بالسيف واجه وحارب =حارب بسيف الحق والحق سلطان
وان صارت الافكار عندك تضارب=شاور لبيب يعطي الشور باتقان
واشرب قراح الماء ليا صرت شارب=تروي ظما كبدك ليا صرت ظميان
وسافر مع اهل الشرق واهل المغارب=ترى السفر فيه الفوايد بالاثمان
وان كان لك معروف بد الاقارب=الاقربون اولى من الغير باءحسان
وخلك مع ضيفك بشوش وطارب=الضيف له عند الرجاجيل ميزان
والعلم يحقق لك طموح ومارب=تقطف ورود ضمها كل بستان
ولا الجهل يهدم قصور ومحارب=يهدم بيوت مالها اليوم سيسان
والحمل ما يقوى الحمل كل غارب=لا صار ماجاله مع الصبر عنوان
وراس الفتى يبقى على طول تارب=لا صار ما يلبس من العز تيجان
واحذر ردي النفس منه تقارب=ترى الردي ينفخ من الكير دخان
والله لو تسقيه من سد مارب=ما اسقاك لو جيته مع الوقت عطشان
ولا عزيز النفس من جد عارب=يعزف علوم الطيب مع عذب الالحان
وخلك مع خصمك عطيب المضارب=واحذر ردي النفس لو كان ما كان
يلسع جنوبك مثل لسع العقارب=ما يظهر لك الدم وتموت شفقان
وناسب عريب الجد صافي المشارب=اللي ليا من جيت يضحك وطربان
وجنب نسيب دايم الدوم كارب=بعض النسب يورث من الذل حقران
وعاشر هنوف سنها مايقارب=عشرين عام وجسمها الفذ فتان
حنا بدو عشنا مع اهل المضارب =وهذي طبايعنا قديمات الازمان

[حمد الجبيرى]

ابداع صراحه الله يعطيكم العافيه وصح السان الشاعر

[عبدالكريم اليوسف]

كل الشكر لك يالامير
على نقل هذه القصيدة الجميلة
والشكر موصول لشاعرها

تقبل كل الود

اخوك

[ولد روق]

أخواني...
جلمود الجبيري
راعي الذوق

شكراً لمروركم العذب و جزاكم الله خير...

[ثامرالماضي]

بسم الله الرحمن الرحيم

هلا وغلا بخوي ولد روق ...

ماشاءالله قصيده وافيه بالحكم والنصح ... بارك الله فيك على هذا النقل المفيد والرائع ...

وصح لسان الشاعر فهد القحطاني ...على هذه الرائعة ...

مشكور يالغالي ... ولاهنت ... وترجعون لنا بالسلامه ...

وننتظر المزيد ... والمزيد ...

,,,,,,,,,,,,,,,,,,,,,,,,,,,,,, تحياتي ,,,,,,,,,,,,,,,,,,,,,,,,,,,,,