كيف توصف المطر وتنقل علومه ((بالمصطلحات الشعبيه ))

[سعود الراشد]

	بسم الله الرحمن الرحيم كيف توصف المطر وتنقل علومه ادرج الموضوع لهدف ولموقف حصل لاحد الاصحاب وكان موقف محرج له حين ما سأله احد ;كبار السن عن علوم المطر والارض اللي جا منها وشكى لي من الاحراج اللي واجهه وهنا وجدت انه من المفيد طرح هذا الموضوع على حسب معرفتي التي اعتبرها قليله ولكنها تقيك بعض الشي من منقود شيبانا موضوعنا يتكلم عن كيف تنقل علوم المطر والخير بذرابه وبوصف يكون دقيق وفي محله من اكثر الاشياء اللي تنتقد كبار السن في شباب ذا الايام هي جهلهم في بعض الاوصاف والمصطلحات اللي استخدامها يعتبر في بعض الاحيان مامنه بد ومنها كيف تنقل علوم المطر والخير خاصه ان جيتهم من ديره بعيده او رحت عساس او كشات راح تواجه السؤال التالي :: وش وقع الارض وش علومها وش علوم المطر أرب الارض ممطوره خاصه اذا كانو يتحرون الخير هنا لازم تكون ملم في بعض الاوصاف والمصطلحات اللي تعتبر مقياس لانك مو معقوله تقوله واجد او شوي لان الواجد والشوي وصف عام ولا يشفي قلب النشاد واذا اللي يسأل شايب تلقاه يا بيصد عنك والا يمكن يقولك منتاب من اهل العلم ومراحك زي مجيك نبدا في الاوصاف بترتيب في مايخص المطر اوله هو مصطلح " مابل الدمن " وتتبعها بقول من هالاقوال ماعند الله بزهيد او الله يجيب الخير والمصطلح هذا يرمز الى ان المطر كان قليل لدرجة انه الله يكرمكم ما بل الدمنه وينقال بطريقه هاذي والله مامن مطر يذكر رشه مابلت حتى الدمن وماعند الله بزهيد والله يجيب الخير ويرزق المسلمين الثاني " دم الارض " وتتبعها بقول من هالاقوال ماعند الله بزهيد او الله يجيب الخير والمقصود منه انه بل الارض حتى تساوى لونها وصار شيفة الارض دل انها مبلوله وينقال بطريقه هاذي والله مامن مطر يذكر رشه دمت الارض وماعند الله بزهيد والله يجيب الخير ويرزق المسلمين الثالث هو ::: " شد الوطي " وتتبعها بقول من هالاقوال ماعند الله بزهيد او الله يجيب الخير وشد الوطي هو انه الارض مايظهر بياضها اذا وطيت سواء كانت وطيت ادمي او مطيه او غيره ولو حفرتها بتلقى ان الماء يكون ماتعدى نص كف هذا يقاله شد الوطي اما اذا تعدى له وصف ثاني وينقال بطريقه هاذي اللهم لك الحمد جتنا رشة طيبه ولحقت شد الوطي وان طرح الله فيها البركه وجاها رجع و ولي طيب بتحل بركتها مقايس الحفر وهي للارض الدماث الرمليه اما الصخريه لها مصطلحات ثانيه بعد هالمصطلحات يجي مقياس الحفر والواحد ان كانه داري انه بيوجه احد من ذا الشيبان لازم يتجهز له بالعلوم اللي تسره ولازم تحفر وتشوف الحفر واذا زاد عن نص الكف او لحق الكف يذكره لهم وينقال بطريقه ذي جانا مطر زين وحفره لحق الكف او دونه شوي واذا امكن يعلمهم بحدود المطر .. وهم بيقولون حدوده وين وش دياره هنا يا انه يقول كذا وكذا والا يقول والله ماعلمنا بحدوده ولا واجهنا المخبر ويخلص نفسه وبعدين الحفر اللي اكثر من الكف هو ملتحم الذراع وهو الرسغ في المنطقه اللي يغيب فيها العظم وينقال جانا مطر طيب وحفره ملتحم ذراع دونه او زود شوي والله يجيب الولي وترجع الارض وعقبه حفر الى الكوع وينقال كذا المطر معاد عنه منشود جانا مطر طيب وحفره حول الكوع والله يطرح فيه البركه ويرجع الارض وجملة ماعاد عنه منشود هي كنايه ان الخير جا ولاعاد تنشدون عن حفر ولا غيره في الامطار اللي بتجي عقبه لان الارض بتنبت ولاهيب محتاجه الا اللي يقوي عود النبت وهذا اقل شي يكفيه وكل قطره بها حيا الحفر اللي ازود من الكوع مبالغه ولا له داعي وضياعه من راعيه <---------- شايب يوم سمع ولده يقول يبه الحفر مترين وصف السيل في الارض الرمليه سالت وانقعت الارض والمقصود هنا مهيب مواطي الارض لا تخربطون بينهم المقصود الارض المستويه تكون فيها نقع يعني حار الماء والارض روت ... وملاحظه مهمه ترى اللي بيطالع المواطي والا النقع اللي حول الزفلت بيكون علمه مهوب دقيق الان الما يتجمع حول الزفلت لو ينزل ادناة الدون ويقال في الوصف له وقياسه سيل اظهر روبة الارض ( من جريان الماء في الارص وفي روس الصياهد يطلع الرمل الناعم الابيض ويقلب الارض ) ويقال في اقوى درجاته فتق الجحور وشق روس الصياهد انه من قوتها هدم الجحور وسو مجاري ماء في المنحدرت من روس الصياهد اما الارض العزاز والصخريه يقال حار الما وزاعته الارض وامتلت الخباري وسالت الشعبان ومن صعب وصف الارض الصخريه لانه صعب الحفر بس عين الخبير تعرف توصف لانها تغر الواحد منقول

[فهدالدوسري]

الاخ الغالي
سعود
السلام عليكم
بعذر الشيباني يتصددون عنا سنهم مروحة قعادي اثرهم مايلقون علم منا
ولا ودهم يقلون ميدنا ماعندكم علم
لكن ياخيي هالمصطلاحات هي موجوده الي هالحين
ولا اذا جينا نطلع للبر خذ صجه ولجة وشد العفش من شافنا قال هذولا سنهم لاجئين
من كثر العفوش واذا رجعنا للديره ونشدونا وش علم المطر والارض
اثر حنا علي غير يمة
سعود الله يرحم والديك امين وينك من ذو مبطي ................متاخر علينا بهالخبر
اخوك
لي يتصددون عنه ولا ينشدونة
خشم ........
الحصان
.................
نغزه............ ولا راز خشتي اذا جيت ابشرح عن المطر سني واحد يتهايق مع الطاية

[ثامرالماضي]

بسم الله الرحمن الرحيم

الحين ماظن فيه أحد يشرح حالة المطر إلا الشيبان ... أما الشباب يصورون بكميراء وإلا بجوال وإذا جاء عند الشيبان قالهم شوفو المطر ... ومايحتاج يوّصف ...

لا بعد والمشكلة ... إذا جلست عند شيبان كبار كبار ... وقاموا يسولفون عن المطر تطلع لهجات غريبة ماهيب بالقاموس ...

الله يجيب المطر ... خابرلي دكّه في الرياض يجتمعون فيها شيبان ويتسدحون ويطلّعون رجليهم من فوق الدكّه .. واللي يجيهم من بعيد يحسبهم في برتسة ...

الصراحه ودي أتبيخص عليهم بكل هالمعلومات اللي قريتها ... وأبشوف وش يقولون ...

مشكور أخوي سعود وننتظر المزيد ... من كل جديد ...

,,,,,,,,,,,,,,,,,,,,,,,,,,,,,,,,, تحياتي لك,,,,,,,,,,,,,,,,,,,,,,,,,,,,,,,,,,,,

[سحمان السبيعي]

شكرا اخي سعود على هذا النقل الذي يحمي الثقافة الحالية من الاندثار وتعليم الناس كيفية النطق بالعلوم والسوالف التي ينتظرها الناس من امثال محبى رواد البر والرحلات لانهم سوف يسالون الشخص اذا كان توه جاي من رحلة .

[محمد المعارك]

مشكور اخي سعود على هذا النقل الرائع والجميل .
بارك الله فيك.

[المغترب]

مشكور اخوي ..
سعود..
على النقل الجميل والهادف ...

[سعود الراشد]

خشم الحصان
ابوشعلان
كان
صقر
المغترب
اشكركم على المرور والتعليقات
تقبلو تحياتي

[ابو صقر]

الله يعطيك العافيه اخوي سعود على هالمعلومات التراثيه القيمه

وذكرتن بسالفه تضحك عن هالموضوع

كان واحد مثلنا مسافر وكان عليهم مطر في الطريق
المهم حصله واحد من حبايبنا في محطة بانزين والرجال متلهف لمعرفة علوم المطر
السلام عليكم
عليكم السلام
وش اخبار المطر يالحبيب
الحمد لله زين
وشو من مطر؟
مطر زين
ايه وشو
مطر مثل العادي
يابن الحلال هو رش ولا سيل
ايش؟؟
هو يسيل التلاع ولا يدفن الجره
يابن الحلال مطر.... هو حجر مويه نازله من السماء
اييييه (وهو مقفي) مابلحمظ احد
!!!!!!!!!!!!!!

كوده ماتصير بايخه بس

ومشكور يالغالي

[سعود الراشد]

ابو صقر
مايطلع منك شي بايخ
ههههههههههه سالفه مضحكه
تشكر اخي على هالمرور والدعابه الهادفه
تقبل تحياتي .