***ماذا واجهك من مشاكل وانت في البر***

[حمد الجبيرى]

اخوي اسد الرحلات حياك الله ومشكور على المرور
اخوي عون شرفني مرورك ومشاركتك الله يستر عليك ويبارك فيك

[ابو فراس]

وعليكم السلام ورحمة الله وبركاته

اللي مرن واجد ولكن اقربهن اللي صار العام الماضي بالنفوذ الكبير وتعطلنا يومين

[عبدالكريم اليوسف]

الغالي
موضوع مهم للغاية
وتبادل الخبرات هنا في هذا المنتدى
وفكرةالموضوع وطرح الزملاء
في غاية الجمال حتى يستفاد منها

والقصص كثيرة ولكن ستر الله فوق كل شي
لاعدمناك يالامير

اخوك

[رعد المدينه]

فكرة الموضوع رائـــــــــــعة

[الشيخ قوقل]

الموت الموت الحمر وعذاب الخويا
ومدمّر الرحلات / هو العجز نعم العجز وكل شيئ أقبل به إلا العجز
يعني ما معك بيسات بسيطة ما معك عربيّة هم مومشكلة إلا العجز
يوجد من ابناء عمذي العجّاز والباقي نشامى وشرواكم النعم
لكن هو الوحيد اللي اقبله بالديرة لكن بالرحلات لا لا لا و1000 لا
كثيراً ما اتعمّد الهروب عنه ولو كانت الطلعة قليلة العدد
وأنا أسمّي هذا النوع ومن على شاكلته
يسأل السائل كيف قاضب الفرشات
أقول (( كأن علينا هبوب الهواء والفرشة جالس وخايف عليها العجّاز تطير ))
أقول هذا الشخص لا يرحبون به أصحاب الرحلات ولا يطيقون طبعه المشين
وعندما أناقش البعض في شأنه ؟؟؟؟

يقولون هذا طبع !!!!! ياللعجب كيف هذا ومن يكون هو كي لا يتحرّك ؟؟؟؟

أخوتي أعضاء منتدى الرحلات

انا للأسف لم أقرأ كل الردود على موضوع الأخ جزاه الله خير

لكن لنا اكبر دليل في خدمة الأصحاب والنشاط والحيويّة ..... هو الحبيب المصطفى عليه أفضل الصلاة وأزكى التسليم عندما قال لأصحابه (( ....... وأنا عليّ جمع الحطب )) راجعوا القصة المشهورة

يسمح للشخص ان يمسك الفرشة لا تطير لعدّة أسباب !!!!

1 ـــ أنت لست أبي كي أخدمك
2 ـــ أنت لست ضيف عندنا
3 ـــ أنت لم تكن مريضاً أو مكسور اليد والرجل
4 ـــ أنت لست كبير في السن ++++ ولنا اكبر دليل في النشاط والروح الرحلانيّة عمدة المنتدى (( أبو فراس )) طير شلوى أنظروا إلى الغضنفر النشيط .... كيف يكون عمدتنا في الصورة
إنه قمّة في خفّة النفس وقدوة كبيرة (( دقشة )) يُحتذا به

ولا يهونون باقي الطاقم على الرابط

http://alrahlat.com/vb/showthread.php?t=7815

في النهاية تحذير :: ـــ أربض عند أميمك أحسن لك خل الرحلات لأعضاء الرحلات
وتقبّلوا خالص تحيّات الشيخ قوقل

.



.

[سعود الراشد]

بسم الله الرحمن الرحيم
السلام عليكم كل باسمه
انا حصلي موقف غريب وعجيب انا اعرف ان الكثير لن يصدق ولكن هذا الي صار
ولكن ارجو ان تكون القراءه من اول القصه حتى تتعرفو على معاناتي في تلك الرحله
كان في يوم من الايام عندي الاخ الفاضل محمدالمعارك(صقر) وكان الوقت بعد العشاء وكان مدار حديثنا حول جبل الاصبعه غرب القصيم واثناء الحديث طرأ على بالي موقع غرب الاصبعه وهي بلدة ابقيعا المهجوره المهم طلع من عندي صقر اوبديت اجهز للرحله المقترحه بعد صلات الفجر ولم اخبر صقر حتى يكون الموضوع مفاجأه له في المنتدى وكنت انوي اذهب لوحدي حملت جميع مااحتاجه من القشان ... قبل اطير صاروخ لفراشي جهزت جهاز القارمن والكمره واكملت جميع استعداداتي قبل ان انام
كنت اسيربكل شوق للموقع ولكني اسير بكل بطء ولا اعرف ليش المهم وصلت الى الموقع
اوقفت سيارتي تحت احد الاثل وترجلت منها وكمرتي بيدي اليسرى ووجدت نفسي ان مثانتي ممتلئه بالبول اعزكم الله فوضعت الكمره على حجر بجانبي وبعد ان فرغت الخزان التفت الى الكمره فلم اجدها يمين شمال فوق تحت الكمره اختفت ..الحجر الي وضعت عليه الكمره عليه حاجه بيضاء مطاطه تشبه الصمغ قلت سبحان الله وش السالفه التفت يسار ورجعت نظري الى الحجرمثل البرق لاني سمعت صوت فاذا الحاجه البيضا الي عليه اقتلبت قطعه من الدم ويسيل على جوانب الحجر حتى صار الحجراحمروما يزال الدم منهمر بغزاره وكانه من ذبيحه الصراحه تمالكني الخوف وصار كل عرق في جسمي ينبض اوكل عضم ارتعد
رجعت اركض للسياره يوم وصلت السياره مالقيت المفتاح ابجيبي المهم كانت هذي الصاعقه الثاني وفجأه ظهر صوت لايمكن ان احدد جهته يشبه صوت طياره f16 طيران منخفض جدا فعضيت ثوبي اوهات ياركض الى احد الخرابات ودخلت وانا اركض بكل ماأملك من سرعه وعند دخولي وبسرعه خياليه يسدعلي باب الغرفه بقطعه من السينكو واردت ان اصرخ ولكن لم استطع لاني صرت اطرم .. الغرفه مظلمه ولكن يوجد دريشه صغيره مدورة الشكل والغريبه اني استغربت منها لانها وضعت في زاويه بالغرفه وكان يدخل منها نور الشمس وكان يسطع هذا النور على كتاب قديم جداوعليه اثار الغبار حتى ان لون ورقه تحول الى البني وهو عباره عن مجلد سميك .. حاولت ان اتعرف على هذا الكتاب ولم اجد عليه عنوان سوى جمجمه اسفلها ساقين متقاطعين برسم متقن مسحت الاتربه عن هذا الكتاب . فتحت اول صفحه وكانت الطامه العظمى نقطه من الدم الجديد مره ثانيه يظهر تحتها رسم فاخرجت منديل من جيبي لأمسح تلك الدم لاتعرف على الرسم الي تحته وعندما حاولت ان اضع المنديل على الدم انتقل الدم بسرعة البرق الى احد زوايا الصفحه وظهر الرسم وهو عباره عن هيكل عضمي صغيروعندما بدات انظر اليه بدا يكبرويكبر ويكبر ويكبر حتى انتشر في انحاء الصفحه وانفجر الكتاب مثل القنبله وبدات اصرخ ولم احس الى بضربات على شقي الايمن واذا بصوت ام العيال تقول وشفيك ياسعود وشفيك ياسعود واذا انا اصحو من حلم مزعج واذاهي تقول اقتلب على شقك الايمن وسم بالله
ولم انتبه الا بالمنادي ..الصلاة خير من النوم.. وبعدها عدلت عن فكرت ذهابي لبقيعا وقلت عسى المانع خير

[عبدالحميد الحربي]

الله لايجيب مشاكل

بس منغصات الرحلات كثير

لكن انا ودي اشتكي من الجوال ...

رغم مافيه من فوائد ولكن بالطلعات البريه دائماً مايحمل لنا الأخبار السيئة

فيخرب في دقيقة ماتم الترتيب له في أيام

ولكن ......

انا من دعاة قفل جوالك وإشتري دماغك

والدنيا ماراح تطير ولابيجي غير المكتوب

[الشيخ قوقل]

جميل طرح هذا الموضوع وأشكرك عليه مرّة اخرى

وهنا بدالي إضافة أردت أن أطرحها

البر على وجه العموم مشكلة كبيرة كانقطاع المياه
عن البعض وعطل سيارة الرحلة
حسبُك إذا أساء الإنسان تصرّفه
وما أحلاه إذا تقيّد الشخص بالأصول والأدبيّات ومن يقول أن البر ليس فيه مشاكل ... كلامه فيه نظر
أما المشاكل التي واجهتها هم الشباب الصغار في السن ومن الكبار
الذين لا يحسنون التصرّف كالتنافس الغير لائق عند التصويب والتسديد
بحيث يتسابقون إلى الصيدة أيهما أول وذلك بعد سقوطها إلى الأرض








.

[حمد الجبيرى]

بارك الله فيكم واشكركم على ردودكم ولكن نبي الشئ المستفاد منه مثل عطل وكيف تم اصلاحه ونقص وكيف تم تدبيره و مثل كذا لا عدمتكم

[Abdullah K. AL-Hassan]

وعليكم السلام ورحمة الله وبركاته

جزاك الله كل خير أخي أبوعلي

موضوع قمة في الروعة وتجارب ومواقف الأخوان استفدنا منها كثيراً

لي عودة قريباً بأذن الله

أخوكـ عبدالله

[حمد الجبيرى]

فيه الكتاوت في الباترول والسيارات الأخرى يقال حين يتعطل تخليه لين يبرد وتحاول التشغيل مره ثانيه او تطقه طقه خفيه كذالك طرمبة البنزين عند ما تتعطل تطقها طقه خفيفه وتحاول التشغيل مره ثانيه وكذالك السلف نفس الطريقه وفقكم الله لكل خير

[راعي محل]

مشكوووورين من اولكم الى تاليكم على القصص الممتعه
تحياتي

[الصغير]

السلام عليكم ورحمة الله وبركاته اشكرك اخوي جلمود على الموضوع اما بالنسبه الرد على الموضوع فالمواقف كثيره من اهمها إستخدام صابون اللكس لتهريب الزيت والبنزين .الموقف الثاني كنت في رحل الى سورياقبل 5 سنوت وفي احد اليالي خرجنا انا وابو حاتم لأرض وعره وليله بارده جدا موت وصقط ذراع الدرقسون ومع الاسف انه لا يوجد معنا اي شى في السياره ماعد سكين وقمنا بقص حزام الامان وربطنا الذراع وتوكلن على الله

[عاشق الدهنا]

بصراحه المشاكل كثيييره وواجد وعد واغلط لاكن اشدها والعنها صارت لي قبل 5 يعني 2007 وبموتري الجديد سييرا المهم مسكت بروح للدهنا يعني بروح ركبت العفش وودعت الوالد والوالده ودقيت السلم ومشيت ..

يوم وصلت عرق الحمراني نزلت ونسمت الكفرات وتوكلت على الله وقصيت الصيهد وجلست بنقره يحبها قلبك وشبيت ناري ونصبت خيمتي وكنت مشغل الكنود واغير من موجه لموجه اشوف فيه احد حولي او لا الا واسمع واحد ينادي بصياح ويقول احد يفزعلنا ياناس تكفون المهم انا فز قلبي قلت فيها شي السالفه ذي ورديت عليه قلت له ارسل ارسل ورد علي قالي اللله يرحم امك وابوك افزع لنا قلت له امر قال انا لي 3 ايام ومعي 2 من عيال عمي واحد منه منغمي عليه ومابه ما الا مويه الرديتدر قلت انت وينك قال انا بعرق الحمراني واناظر بالكنود ولاقريب بس وينه مدري قلت لو تطلع فوق نفود او شي عشان اشوفك يوم كذا وادق سلفي وادور بالمنطقه لين قربت لمة يوم دريت وانا طابن عليه .. الموتر هلي داخل بالنفود وصراحه لو تشوفها تمسك راسك تقول وشلون تبي طلعه المهم فزعت لهم وعطيتك مويه وركبت خويهم معي وركبو معي وادز للرياض باقصى سرعه المساعدات شوي وتتكسر من قوه اللعن الي جا الموتر يوم وصلت للرياض والله ياعيال انه تقول واحد مطلعه من موت او شي كبيير شوي ويقول هات رجلك احبها عقبها تعلمت اني مااروح الا ومعي على الاقل تانكي مويه واحد وعده كامله بالموتر الحين تحت المرتبه واسعافات اوليه .. لني عرفت ان البر مهب لعب لضعت ضعت مره ..

المستفاد من القصه ان الواحد ياخذ حيطته ياناس ولايحسب الوضع لعب خصوصا لصرت بمكان ماحولك احد ابد زي الدهنا او الربع الخالي ..

[ebrahim]

بارك اللة فيكم موضوع شيق