لغز

[ابو صقر]

انا اصلا عجزت اقراء اللغز

يصلح الشمس والقمر؟؟

[ابو صقر]

شكل اخونا النداوي انشغل عنا
ادري ان حلي صح
ياله من يبي يحل هاللغز الصعب


انشدك عن رجل مكبل ومسجون ... وربعه تخاطفهم سهوم المنيه
يطيع كل الناس عاقل ومجنون ... وما يطلقونه كود يذبح خويه


بالتوفيق

[أحمد العريني]

أخوي أبوصقر يمكن الرصاص في البندق

[ثامرالماضي]

بسم الله الرحمن الرحيم

يابو صقر الله يهديك حفرت مخّي لكن لي رمعه وأتوقع إنه صح بإذن الله ... وهي :

الأستبنه ( الكفر الاسبير )

تكفى قل صح ويكفي حفر مخ ...

لاهنت يالغالي ...

وننتظر المزيد ... من الألغاز ...

,,,,,,,,,,,,,,,,,,,,,,,,,,,,,, تحياتي لك ,,,,,,,,,,,,,,,,,,,,,,,,,,,,,,,,,

[النداوي]

صحيح هو الكفر الإسبير حق السيار
أو مثل ما يسمية البعض الإستبنى
لكن لغزي ما أنحل الى الأن يا أبو صقر
أنتبه تتعدى مرة ثانية هههههههه

أخوك أبو عبدالله

[ابو صقر]

قلم رصاص
والله ودي ياخوي
بس مع الاسف الحل غير صحيح

الغالي ابو شعلان
ماشاالله عليك حلك صحيح


النداوي
ياهلا يامرحبا يامسهلا
وينك يالغالي تصدق قلقت عليك
ترا حلي الغلط له حوالي الاسبوع
يوم مارديت قلت اكيد انك مستحي تقولي صح
وايقالي فهمته وجبت لغز ثاني
السموحه ياخوي

[النداوي]

سامحتك بس لا تعودها مرة ثانية
أنت رجال طيب أكيد ما فيها شك
على شان كذى أنا بأشرح لك اللغز

ويش الي يوم جلست قام رجال ### وأرضى مقاديم الحضر والبوادي
وأقفت وهو في مجلسه لازال ### والإ شبيه البنت في كل وادي


ويش الي يوم جلست قام رجال
يعني حاجه جلست وفي نفس المكان الي جلست فيه قام رجال

وأرضى مقاديم الحضر والبوادي
يعني هذا الرجال الي قام مكان البنت أرضي ( من الرضى الي هو ضد الزعل )
أرضى مقاديم أي من يقدم عليه من وفود الحضر والبوادي

وأقفت وهو في مجلسه لازال
البنت أقفت أي ذهبت فنت راحت أما الرجال فلا يزال في مكانه

والإ شبيه البنت في كل وادي
أي أن هذه البنت يوجد من نوعها واجد وفي كل وادي تقريباً

إذا عجزت عن الحل أحله لك وترى اللغز مبني على معلومة تاريخية

أخوك أبو عبدالله

[ابو صقر]

ابو عبدالله
تراني ياخوي فاهم الابيات
مانيب بنقالي
بس ماعرفت الحل
و الالغاز نقطنه وحله لقطه
بس ابي ارمع عليه

يصلح حبة المطر والعشب ؟؟

[النداوي]

حياك الله أخوي أبو صقر
العشب يروح ويتغير مع الأيام
لكن هذا باقي من أكثر من 14 قرن
وبأقرب لك زيادة البنت كائن حي

أخو أبو عبدالله

[ابو فراس]

اخوي ابو عبدالله مهب هي الناقة

[النداوي]

أبو فراس أي ناقة حدد
ويش الرجل الي قام مكانها
وترى ما أنت بعيد

أخوك أبو عبدالله

[ابو فراس]

ابو عبدالله

هي ناقة النبي صلى الله عليه وسلم

القصواء

[النداوي]

ويش الرجل الي قام وكيف ومتى
عطنا المعلومة كاملة

[ابو فراس]

ابو صقر يبدو ان ابو عبدالله يبيك انت تحل اللغز

اخاف اقول القصة من يوم هاجر النبي صلى الله عليه وسلم من مكة الى ان سكن بيت ابي ايوب الانصار رضى الله عنه

ومن ثم يسالنا سؤال ثاني ويمكن ثالث وووووو

خلاص يابو صقر جاوب عنا الباقي وخل حبيبنا ابو عبدالله ينبسط

[النداوي]

أبو فراس أنت تجاوب بالقطارة
أول شئ قلت الناقة والنياق واجد
ثم قلت القصواء ناقت الرسول
ولكن الى الأن ما ذكرت الرجل الي قام

لكن الصراحة أنت داهية من دهات العرب
عرفت كيف تخرج من الموضوع لكن أنا وراك
ولاني مخليك يا الداهية ويش الرجل الذي قام
مكان البنت حدد

أخوك أبو عبدالله