***ماذا واجهك من مشاكل وانت في البر***

[حمد الجبيرى]

السلام عليكم ورحمة الله وبركاته :
حياكم الله مما لاشك فيه انه قليل منا من لم تواجهه مشكله وهذا من فضل الله اثنا رحلاته البريه . وللفائده تم طرح هذا الموضوع وهو عن نوع المشكله طريقة حلها المعدات المستخدمه والوقت المستغرق لحل المشكله واذا كان هناك زياده من قبلكم او ملاحظه على الموضوع اتشرف بها والفائده للجميع هذا الموضوع بختصار ارجو التفاعل وابدأ الملاحظات لكم الشكر والتقدير

[أبوعبدالعزيز]

وعليكم السلام ورحمة الله وبركاته

مشكور اخوي جلمود على طرح هذا الموضوع لتعم الفائده للجميع

القصص كثيره ساذكره قصتين وسأدعم احدها بالصور ان شاء الله قريبا

الاولى عام 1426هــ في ام عشر امطار غزيره لمدة يومين لم تتوقف السماء عن المطر وكان الطين بالمرصاد

والاخرى قبل سنه في نفود ام حزم وليلا وهوى الموتر وكان امامنا قص ومن شدة القص دخل الرمل مع الباب ولطف الله عز وجل و7 سم ويضرب الباب الارض وتنقلب السياره

[حمد الجبيرى]

اخوي ابو عبد العزيز الله يسلمك من كل مكروه انت واخواننا المسلمين جزاك الله خير واشكرك على التفاعل وفي انتظار الصور

[حمد الجبيرى]

في قصه سبق وان اوردتها . كنا طالعين انا واحد الشباب الى الدهناء وكان الجو بارد فا امرحنا في نقره بسلام تلك الليله وفي الصباح وبعد القهوه والحليب وفطور خفيف جيت اشغل السياره وكان جيب شاص موديل 1412سنة84 ولا ماحولك احد يعني ماشتغل حاولت عدة مرات ولكن دون جدوى طلعت فوق الطعس يمكن اشوف احد يساعدنا ما شفت احد نزلت لخويي وقلت له ابرفع الكفر الخلفي وبا ادوره (الفه) بقوه والى قلت لك انتع انتع قلتله انتع ونتع الموتر وشتغل فكم في ذالك من انتع ههههه( امل ان يتم التفاعل لتعم الفائده) لكم شكرى وتقديري

[ثامرالماضي]

بسم الله الرحمن الرحيم

وعليكم السلام ورحمة الله وبركاته

الحمد لله على السلامه يابو علي ...

بصراحه الموتر الواحد يخوّف والله ... حتى لو كنتو أكثر من شخص ...

طيب وش رايك باللي إنكسر معهم الدفرنس ههههه ... صحيح والله الدفرنس إنكسر مع النص ... أنا داري إنا ماتدخل العقل ... لكن هذا اللي صار ...

كنا قانصين في هريسان ... وفاكين للطير حامامه ... وصوّت واحد من الربع قال تعطل موتري ... وجيناه إلا والله الدفرنس نصفين ... المشكله يوم جمعه العصر ...

المهم دخل واحد من الربع للخرج ... وأرسل سطحه إلين جت عند الموتر ... وحملنا الموتر ...والوعد الرياض ...

0 إفرض لو كنا موتر واحد وش بنسوّي ...
0 حتى جوال الثريا ... دايم ننسى الشاحن حقه


طبعاً هذا من أغرب ماحدث معنا بالبر ...

مشكور يابوعلي على هالموضوع ... المفيد ... والهادف ... بإذن الله ...

,,,,,,,,,,,,,,,,,,,,,, تحياتي ,,,,,,,,,,,,,,,,,,,,,,,

[عبدالرحمن الدرويش]

السلام عليكم ورحمة الله وبركاته

كان يوم أربعاء وصادفت إني بإجازة إضطرارية وخلصت الشغل من بدري اتفقت مع اخوي نطلع لنفود الطوقي (طلعة خفافيّة) كنّا بالطريق واتفقنا ناخذها قطوع وتمشية لأن الجو يشجع وبقوة وطبعا اخوي يسوق موتره والموتر شيروكي (نكبه نوعاّ مّا) فجأة الموتر وقف مكانه وكما هو مشتغل عدل بدل من هنا من هنا مافيه امل يتحرك لا غراز ولا علامات احتراق كلتش او غيره مباشرة تم الإتصال باحد الشباب له خبرة بالشيروكيات وافاد بان المشكلة ممكن تكون من الدبل يعني بالعربي يكون (عمود صغير) انفصل وفعلاً بعد التأكد تبين ان هذه هي المشكلة والمشكلة الاكبر من هذه اصلاحها بسيط لكن ياخذ وقت ونظراًَ لصعوبة تحريكه لضيق المساحة أخذ وقت طويل جداً من قبل العصر بوقت إلى قبل وقت العشاء ونحن نحاول أخيراً تم تحريك القطعة وإعادتها إلى مكانها الصحيح ومباشرة العودة إلى الرياض.

الادوات المستخدمة عجيبة لكن هذه هي صورها..

- مفتاح أعمال شاقة



- مفتاح مقاس 16



- مطرقة



والحمد لله على كل حال. شُكراً لك يا جلمود الجبيري وبارك الله فيك.

أبو فهــد..

[ممتر البران]

ألسلاام عليكم والله المشاكل واجد لكن ربك ساتر ولله الحمد
اقرب مسكله صارت بنشر ولا درينا عنه الا بوسط الرباضه يعني غرز الموتر وكان لواحد من العيال شاص 2005
والعفريته ما رفعت وكان معنا صاج ولا نفع والحمد لله كان معي لساتك تريلات ماخذه للرباضه والحمدلله نجحت الخطه وارتفع وغيرنا البنشر خذ حوالي ساعتين ونص لين طلعنا من التغريزه
والمشكله الثانيه هي
تكسرت التروس اللي بالدفرنس الخلفي دون مكه وبعد جده والسبب مغرز وساحب الجلنط باقوا شي لا نه كان مايل مغرز على حافة عباره والا وصل الصيه بيزحف ويطيح بوسطها فربطت الجلنط لا يهوي
وعقب ما شبكت الونش دقيته بواحد وثقيل وفجرته ونسيت الجلنط وكانت النتيجه اجزاء الدفرنس الخلفي
وعقب ما طلعت دقيته بالدبل وتليته للرياض وكلفني حول السبعه والحمدلله كان رانجلر 2006
والمشكله الثالثه
انقلاب السياره باحدى فياض الصمان وكانت شاص 98 وكنت انا واحد لحالنا عن طريق جراره حول ال30 وعن حسنا مثل
والسبب فرمل ومحمل جراكل ما وبنزيم وبنشر احد الكفرات
كسرت القزازه وضهرت وضهر رفيقي
وعدلنا الجراكل وطفينا الموتر طبعا وظبطت ذيك الدله ام المسمار اللي يصقع بالراس
وحاولنا تعديل السياره بالونش والعفريته وحفر تحتها لكن كل الطرق فشلت والسبب ثقيله وحنا اثنين
مع العلم انه كان معي ثريا ولا حبيت اعني احد من الرياض وكانت الخطه اني احتري احد يجي يفزع والا اضلم اللي واعدنا لنا احد يجي فبحثنا حولنا ولا لقينا احد
والا هاك الشاوي الي جانا هو وصبيه وبيض الله وجهه ربطنا موترنا وتله وتعدل وبنشرناه وكملنا مقناصنا بسلام بل ما زان المقناص الا بالرمي من الدريشه الاماميه
المشاكل واجد وان جازن لكم ابشرو بالعلم الغانم والمشاكل الدسمه ههههههههههههه
الحمد لله على كل حل مبسوط ومتعافي وكلها على ما قال ابتلاء واختبار والله يعين
تحيتي لكم
ابو سعد

[الشيخ مسكين]

السلام عليكم ورحمه الله وبركاته000000000 قرات بعض المواقف من الاخوان وشدني هذا الموضوع واشكر على من قام بطرح هذا الموضع الاخ جلمود الجبيري فالمواقف مثل هذه شيقه وحبيت ان اشارك معكم بهذا الموضوع بهذا الموقف

من المواقف اللي حصلت لي كان عام 1404 ه تقريبا كنا في رحله للقنص وكان الجو بارد جدا تلك الليله فتحركنا من الرياض تقريبا الساعه العاشره مساء وكانت سيارتي ونيت جمس والسياره الاخرى مع زميلي بليزر فعندما مسكنا الخط باتجاه صلبوخ قبل مايفتح خط القصيم السريع ومشينا مسافه 40ك من الرياض وكان باقي على صلبوخ تقريبا 20 ك بنشر البليزر فقمنا برفع السياره بالعفريته وانزال الاسبير حصلنا ان الاسبير برضه مافيه هواء بنشر فقلت اعطوني الكفرات الاثنين اصلحا في صلبوخ وارجع فذهبت بها وتم اصلاحها واخذ مني الوقت اكثر من ساعه على العموم تم تركيب الكفر والاسبير وتحركنا وعندما وصلما الى مفرق ارويغب والبليزر كان قدامنا واذا به يتوقف فاعتقدنا انه يتحرانا قلنا بالله نمشي قال الكفر مبنشر يارجال قل غيره المهم انزلنا الاسبير واركبنا ه وتحركنا واصلنا السير باتجاه رويغب حتى وصلنا المفرق الى روضه نوره وكانت النيه في مقناصنا ذلك الوقت الى العصل واراضي القاعيه وكانت الساعه تقريبا الثانيه صباحا وبعد مطلعنا على الخط تقريبا 300 م توقف خير انشاءالله قال بنشر على العموم معاد معنا اسبير قلنا نزلو الاثنين نرقعهن المهم فكيناهن ورقعناهن ومشينا والجو كان بارد جدا واخر الليل تخيل البراد كيف يكون فبعد مامشينا تقريبا نصف ساعه توقف ويش العلم قال بنشر على العموم مابغاء اطول عليكم حتى وصل البناشر تلك الليله 16 بنشر اخر شي صلحنا البنشر كلها وصلنا الى شعيب العصل دايخين قلنا مانبي الاشاهي والنوم وعندم صلحنا الشاهي وكنا في ذرا السيارات نضحك على ماحصلنا من بناشر والتعليق على صاحب البليزر ونمزح مع بعض والجو بارد اذا بالكفر يبنشر وخروج الهواء منه بسرعه مثل اللي ماخذ سكين وغارزها بالكفروالسياره واقفه تصورو ان السياره واقفه وبنشر الكفر اللي احنا عنده قلنا يربع خلوه لباكر نصلحه قالو لا باكر ورانا مقناص يالربع اي مقناص هذا هذا مقناص بناشر على العموم قلنا انسوي قرعه على بين اثنين واثنين حيث كان عددنا اربعه سوينا القرعه وصارت علي وعلى زميلي اللي معي بالسياره الونيت وراعي البليزر سلم هو وزميله
هذه القصه ليس فيها مبالغه بالبناشروعددها ولكن الصحيح السيارات خجم اللي معنا ذلك الوقت وحنا شباب اهم شي نطلع للبر والغريبه في الامر ان من بكره ماحصلنا ولابنشر حتى رجعنا ولانعلم تفسير ذلك الموقف حتى الان ليه البناشر ماجت الا تلك الليله على العموم اكملنا رحلتنا ومازلنا في بعض الوقت انجيب سالفة البناشر
هذا واحد من المواقف مابقاء منها الاالذكريات والتعب منسي
تحياتي للجميع والله يحفظكم

[عصا الترحال]

مشكور جلمود الجبيري على الموضوع القيم والرائع والمهم في نفس الوقت
وليت نتمكن من طرح بعض المواقف في المستقبل إن شاء الله

[حمد الجبيرى]

اخواني ابو شعلان ؛ ابو فهد الدرويش ؛ ممتر البران ؛ الشيخ مسكين ؛ اشكر لكم مروركم ومشاركتكم جزاكم الله خير على المعلومات والأفاده -- اخوي عصا الترحال شرفني مرورك وفي انتظار بعض من ما عندك لاتبخل علينا دمت بود

[حامد الغامدي]

يوم اني قريت قصص الأخوان وخاصة ابو البناشر شفت نفسى ماش، أكثر شى حصل لنا بالبر فقط تغريز وهذا امره سهل، لكن من ناحية طريقة اخراج السياره من التغريز حصل لي موقف طريف في حائل على طريق جبه:

ايام أول مهرجان تحدي للنفوذ الكبير 1426هـ ذهبنا الى حائل مع بعض الزملاء، وحصل انا كنا نتمشى في طعوس النفوذ مع الناس اللي خرجوا يشوفون السباق، غرز الونيت وكان معي خوي عجزنا نحفر وما معنا عده، وبوسط النفوذ مستحيل تطلع اذا ما معك دبل، المهم شفنا مجموعة شباب كاشتين وطلبت منهم يساعدونا في اخراج السياره وكانوا أربعه جا واحد منهم وعلى طول راح للكفر ينسمه، قلت ورا اخوياك ما يجوا يساعدون، قال ليش، قلت نحفر أو يدفوا السياره معانا، قال مايحتاج قلت كيف قال نسم الكفرات وتطلع ان شاء الله،
خوينا نسم الكفرات على 15 وقال اطلع وقل بسم الله، ومثل ما اقول لكم ياخوان طلعنا من التغريز بدون أي عده، وسرنا نتمشى في النفوذ كنا على مرتبه سرير، وبعدها اشتريت لى منفاخ واستعملت هذه الطريقه عند كل تغريز.

والبركه في منتدى الرحلات اللي تعلمنا منه الكثير،

شكرا لك أخي جلمود على هذا الموضوع المفيد

[ساري الليل]

السلام عليكم ورحمة الله وبركاته


اما علا سالفه التنسيم هذي نصيحة قال لي أياها واحد من الشباب الخبيرين بالبر والتطعيس

يقوول ياطويلين العمر إذا بغيت تخش في النفوذ ولا غرزت وكان هوا الكفرات 35 تغريبا ولا حولها عد وأنت تنسم إلين مية عد سريع شوي مو كثير وبأذن الله تطلع زي السلام عليكم يعني تغريبا توصلها 15 وحولها



وأما سالفه النكبات يالحبييب حنا كنا سته رايحين علا دتسن 95 وناوين نخيم حول النعيرية سبوع وعليها كان فيها ربيع الله يرده لها يالله

وماشين من الفجر ووصلنا علا الصبح والشباب مواصلين كلهم والخوينا اللي يسوق كان تعبان شوي ومواصل ولانام في اليوم اللي قبله زين فنبيه يريح ولايتعب نفسه في نصبة الخيمه وتنزيل الأغراض


وكان عندنا واحد من الشباب راعي نكبات وهو كان المسؤول عن الخيمه ووهو اللي ماخذها وجايبها لنا كتوزيع المهمات علا الشباب


المهم وننزل الخيمة وكانت 4x6 يعني فيها عامودين المهم وش يسويا أخينا راعي النكبات ويشيل عامود من العواميد وحنا لاهين بتزيل الأغراض عشان خزان الما بيملونها من استراحه حولنا ويجينا ويغمز لنا يعني أفهموا ولا أنتبه راعي الموتر اللي موااصل يومين وزاقه الأخلاق معه ويقوول افاااا العامود نسيناه وتزق معه زوود يلعن أمها حاااله بعد كل هالمشواار وكان شكله وده يصااارخ من القهر وحنا ماسكين الضحكه لا ولا أكتفا بنسيان العاموود لا يقوول يلا شباب دورو لكم لوح ولا شوفو لكم صرفه وبعد ماقال كذا حنا ضحكنا ضحك وذاك حقد عليينا بس في الأخيير رووق وضحك


وانشاء الله نجيب لكم بعدين نكبات حقيقيه بس هذي اللي في بالي


وأشكرك أخوي جلمود الجبيري علا الموضووع ربي يعطيكم العااافية
السلام عليكم ورحمة الله وبركاته

[حمد الجبيرى]

اخواني مهراس ؛ ساري الليل اشكركم على مروركم ومشاركتكم بارك الله فيكم

[أسد الرحلات]

فكرة الموضوع رائـــــــــــعة

[عون العون]

السلام عليكم ورحمة الله وبركاته ...

أسعد الله جميع أوقاتكم بالمسرات ..

هذه أول مشاركة لي في هذا المنتدى الرائع

والشكر موصول لإدارتنا الرائعة ولكاتب الموضوع المتميز ..

حصل لي موقف العام الماضي في نفود الثويرات وهو شق في الرديتر من شجرة كبيرة( أعتقد إنه العاذر) ما انتبهت إلا وأنا راقيها نظراً لأني كنت أناظر القارمن وأدخل إحداثية ...

الموتر طبعا هايلكس .. وبحمد الله كانت معي شنطة العدة ومن ضمن أغراضها غراء لحام ( اللي يجيك اثنين ويخلطن جميع ) وأفك الأديتر وأطلعه من السيارة لأن فيه عدة ثقوب .. وبعضها صعب تشوفه ..
وأخلط الغراء وألحم الأديتر وأخليه ربع ساعة ينشف وأركبه وأركب الليات وأعبي نصفه ماء وأشغل الموتر وأكمل الماء ...وما شاء الله تبارك الله يمشي الموتر معي زي الحلاوة إلى يومكم ..

ودمتم بود ...