![]() |
الفزززززعة ....... يا أهل الرحلات
بسم الله الرحمن الرحيم
في بداية كلامي وفي أول مشاركة لي في منتداكم المبارك أرحب بكم أعضاء وزوار اجمل ترحيب وأتمنى ان يطيب لي المقام معكم وكيف لا ؟؟؟ و.. في بداية : الفزعة في العنوان مجازاً والا لها قصة أرويها لكم بس تحملوا هالفيلم الهندي هههه طلعت انا وربيع لي أثنين (( شيباني)) لكن بروح الشباب مثلي ههه أهل بر وصيد ووناسة كان خروجنا فجر الاربعاء من القصيم نبي نشوف طريق الشمال قبل الدراسه الله ييس اتمام انشائه على خير وبعد ما تمثنينا بالطريق وقفنا قبل شعيب حميان بالعدوة وأفطرنا وكملنا مسيرنا ويوم ركبنا الطريق بعد حائل ومشينا لنا شلقة كيلوات قالوا الربع المضحى!! قلت المضحى؟؟؟ هه الساعة فوق الـ12 الظهر!!! وتقولون المضحى قالوا نبي نتقهوا ونصلي .. نبي لنا نفيّد نكسّر من هالحطيبات الزينه ونستانس قلت أفا عليكم وانا أبو إبراهيم أبشروا وأطمر (ذاك النفيّد) اللي به ذيك الشجيرات من الارطا ما ودك الا وتمرح عندهن ما لكم بالطويلة شبينا ضويتنا واركبنا المعاميل قدعنا وتقهوينا وصلينا وعينا من الله خير يوم مشينا وفركت الموتر وصار الطريق بوجه الموترقال أبد هذا مكاني يا عدل يا بدل قال وربك واحد هذا مكاني نسمنا الكفرات لما بطحناهن ما به الا اللي به بعد ما حاولنا كم مره ... المهم طلعنا الموتر ... راحت السكرة وجت الفكره ... هههه مثل عندنا ركبنا الاسفلت نبي نسحب بس ما هنا كفرات يعتمد عليها قلنا لراعي الموتر يا ابو عبدالله وين ماطور الهواء قال نسيته بالبيت ... افاااا ... وش السوات اشر يا ولد! قعدنا عشر دقايق نشر للي يمرون لكن يمروننا مثل لوحة رافقتكم السلامه ههههه قلنا نمشي ونسأل عمال مقاول الطريق اللي يشتغلون بكل مكان نمشي وناقف المهم أخذت هالسالفة من الساعة 1.30 الى الساعة 4 العصر ولا مشينا الا 60 كيلو جت قصة الفزعة وحنا ماشين لقينا ظولة سيارات لكن من شكلهم تدري انهم اهل بر لكنهم بالسايد الثاني قلنا ولو... نبي نروح لمهم ولا هم مقصرين وصلنا السلام عليكم السلام يا ولد نبي هواء لو سمحتوا تناقزوا الشقردية كل يقول عندي مير انزل لهم والا ذاك الرجال يقول .. ابو ابراهيم ما اشوفك بالديره أشوفك بالنفود الكبير والا منهو اثره اخونا ((( ابو فراس ))) @@ تراي والله ما أعرف معرفه الى الحين ولا وش موقعه بالمنتدى @@ للمعلومية ابو فراس صديق حميم وأخ اعرفه معرفة تامة الشباب الله يجزاهم عنا خير وقاموا بالواجب وهم اللي عبوا لنا الكفرات بايديهم قعدت اسولف معه قلت عرفت واحد من ربعك بس الباقين ما عرفتهم قال لي هذولا بعض :smailes44: :smailes44: أعضاء الرحلات :smailes44: :smailes44: قلت ما يسوي هالسوايا الا الشقردية ودعناهم وواصلنا رحلتنا للشمال وهم دخلو النفود بعد ما ساعدوا ناس ثانين غيرنا احبتي بعد ما تابعتوا هالفيلم الهندي والفيل ما لقى أمه ههههههه اقول لكم جزاكم الله خير على فزعتكم لي ولغيري وتقبلوا أخوكم ابو ابراهيم (( البرّي )) عضوا في منتداكم المبارك لعلنا ان نوفيه بعضا من حقه علينا |
ههههههههههههههه
والله يانت رهيب ورايق وحابك السالفة الله مير يحييك معنا وياهلابك أخوك هزيم الرعد تقدر تقول من كبارية المنتدى ...وتسد غلبت 20 عضو من الأعضاء هنا بلعبة الكيرم على طول أول ما يلعبون أفرقع وأجيب الخمسين وغطاه مع بعض مع جخرن واحد :1aa: ياهلابك |
أهلا بك أخونا البري، صار قابلت أبو فراس بالصدفه، ياحظك نحنا شوفته عندنا حلم، والله الساعة المباركه وعشان كذا زنوا عليك وقالوا سجل بالمنتدى،
الله مير يحييك ويا حظنا فيك خوي وصديق في منتدانا عساه يعجبك ان شاء الله و يصير بيتك الثاني. تقبل أحترامي وتقديري. أخوك: مهراس. |
اخوي هزيم الرعد هلا بك اخوي جميل الكلام ما يطلع الا للي يستاهله وانتم تستاهلونه اي والله ما تدري !! يوم اقبلت على ذيك الظولة وش قد فرحت :smailes79: :( اجل ان شفت واحد خام له كيرم أدري انه انت :1aa: ولو قال لي العب معي ابقوله : نلعب وبحجري الخمسين والا لا :( :smailes79: تقبل دعائي لك اخوي بالتوفيق اخوك البرّي |
حيا الله اخوي مهراس
تشكر على المرور والتعليق وهو محل تقدير عندي ابو فراس اخونا الكبير وله عندي احترام وتقدير خاص اما قالوا لي سجل ... فلا انا اللي سألت عن اسم المنتدى وأول ما جيت سجلت لكي أرد ولو قليل مما قدموه لي وانا بحاجته ولكي يعرف أعضاء وزوار المنتدى منهم ربعهم ووش يسوون وان علومهم غانمه تقبل داعاء اخوك البرّي لك بالتوفيق والسداد |
ههههههههههه أخونا الحبيب البرٌي حللت أهلاً ووطئت سهلاً يا هلا و الله و مسهلا أسفرت وأنورت أسعدنا تواجدك بيننا ..وحياك اللهفي الرحلات .. و ياهلابك مليووووووون بين أخوانك ... بنتظاااااااااار أبداعاتك ومشاركاتك ... اسأل الله لك ولجميع المسلمين التوفيق السداد..وإلى الأمام دوماً إن شاء الله تقبل مني خالص الود والتقدير والمحبة أخوك عبدالله |
ومن قال ..من الفرحه به نهلي
اهلا باخي عبدالله نورت الموضوع ونثرت فيه الزهور وتعطر بمرورك المبارك اخوك البرّي |
الحمد لله على السلامة يالبري اجل تقول صارت لك فرصة انك تعرفت على اعضاء الرحلات الشقردية هالاعضاء اللي قابلتهم من كبار المنتدى وحالهم من حال الاعضاء بمساعدة الاخرين والقصص كثيرة عن ذلك المهم نبي تفصيل عن رحلتكم الى الشمال الله لا يهينك وهل هي للصيد ام للفسحة |
مرحبا مرحبا ملـيون ترحـيـبه @@ عد من حج بيت الله وصلى به جيتك مثل المطر زان تصبيبه @@ منـتدانا بالفــراح هــج لك بابه مرحبا ملايين شرفت منتداك زاد النور نور سعدنا بتواجدك المشرف وانت من اهل الدار بمجرد تسجيلك الغالي ابو فراس صورة مشرفة لكل منتمى لهذا الصرح وباذن الله سوف تجد كل مايسرك اخوك |
يا هلا ومية هلا بالبري ويشرفنا الأنضمام الى النخبه مثلكم وشرواكم
|
ياهلابك اخي البري بين اخوانك و الحمدالله ان اخوانا في المنتدى وهذا المعروف عنهم انهم ماقصرو معك و لا مع احد غيركم الله يجزاهم خير الجزاء على هذا الانطباع الذي يتركونه عند الغير
|
حياك الله وبياك أخي البري
كم يسعدنا ويشرفنا انضمام امثالك للمنتدى |
الغالى أبوابراهيم البرى الفيلم الهندى رائع ما قد شفته من قبل وأنا من صغرى مدمن أفلام هندية ... ياحسافة ان الفيل ما لقى أمه بالأخير هالسالفة لحالها شعلة نور تتقدم تسجيلك بالمنتدى مع اخوانك الشقردية |
حياك الله يابو ابراهيم
في منتداك وبين اخوانك وماودي اقول الله يبارك بالماطور اللي خلاك تلتقي مع الربع الشقرديه حللت اهلا ونزلت سهلا |
أولاً حياك الله في منتداك منتدى الرحلات ونشكرك على التسجيل معنا ونتمنى ان تفيد وتستفيد.
ثانياً ابو فراس ( عمدة المنتدى) شخص كل ن يحب يخدمه لطيب معشره وسمو أخلاقه وحبه للآخرين والسهر على خدمتهم. وماشاء الله وصلت خير بلقائك الإخوة في النفود. أتمنى ان تتواصل معنا ولا تحرمنا من مداخلاتك وخبرتك . وبارك الله فيك. |
اقتباس:
اهلا بأخي الأنيق الله يسلمك من كل شر اي والله تعرفت على ناس يحبون خدمة الآخرين وهم للمنتدى كالعنوان للكتاب بالنسبة لحالهم وحال الاعضاء الآخرين ..فنعم أكثر أهل البر على هالحال ولكن سردت هذا الموضوع : اولا عربون تسجيلي عند اناس كرام ثانيا ليتعرف الاعضاء والزوار الذين لا يعرفونهم مع من يتعاملون على العموم رحلتنا كانت طويلة المدى قصيرة الأمد نبي نتعرف على طريق الشمال وقصرناها مع المنصفة حيث لفينا جهة عرعر عن طريق الجوف اللي بتنا بها ثم واصلنا الى عرعر ومنها الى رفحاء ومنها قيلنا بفيضة أم العصافير همن مرينا لينه على تربه اللي بتنا بها تلك الليلة يوم اصبحنا وعينا من الله خير توجهنا للشعلانية .. ((أهل كرك)) ولا لقينا شيء بس ما خليناها كذا تركنا اللحمة اللي جايبين وأدمنا غدانا بـ (قوقسي) اللي هو صيد المفلسي هههه همن قفلنا راجعين بحمد الله وحفظه الى أهلينا ووصلنا مع صلاة العشاء هذي تفصيل الرحلة ما شفنا لا مطر ولا ربيع الله يجيب الخير تقبل دعاء اخيك البرّي لك بالتوفيق |
اهلا براعي الذوق الله ينور دربك بالحسنات ويمحو عنك السيئات ما يقول((سعدنا بتواجدك المشرف ... وانت من اهل الدار)) الا الكرام وأنت ان شاء الله من الكرام فبوركت وبورك منتدى يضمكم اما ابو فراس 00 لا أعلم والله ما أقول فيه لكن سوف أبالغ في الثناء عليه (جزاه الله خير) أخوك البرّي |
مرحبا الف يا راعي الشاص 2008
شاكر لك الترحيب ومحل تقدير فجزاك الله خير اخوك البرّي |
اهلا بك اخي كان
فهل معرفك نسبةً الى: كان ... الخبر خبر كان أو كان ....المدينة الفرنسية والله ما ترددت دقيقة في ان اسجل في منتدى يضم هذه النخبة الطيبة .. وفي كل خير اخوك البرّي |
اخوي ابو سديم
جزيت خيراً الشرف لي انا اخوك البرّي |
اخوي ريع الدياب اهلا بك ومسهلا ..... شفت وش طول الشريط لو تفله تعدى النفود الكبير الله ينور حياتك بالإيمان وطاعة الرحمن اخوك البرّي |
اخوي ابو صقر
جزاك الله خير على المرور والتعليق فهو محل تقدير الماطور وغيره أسباب تلتقي بسببها مع الطيب والردي لكن العاقل منا واللبيب ومن يميز بينهم ويختار الأمثل البرّي |
اهلا بأخي صقر جزاك الله خير على الترحيب اخوي جئت لأستفيد من المنتدى كما استفدت منه قبل أن أعرفه ولن أقصر فيما لو وجدت عندي ما يفيد الغير ولن انقطع عن التواصل ان شاء الله وش خليت بأبي فراس فبارك الله فيه وفيكم اهلاً كراما واخوة محبين ومتحابين اخوك البرّي |
أهلا وسهلا بك اخي البرّي
أسعدنا تشريفك وانضمامك في منتدى الرحلات |
المهلي ما يولي .. هلا والله أخوي أبو أشرف الله يشرف مقدارك تقبل دعائي لك بالتوفيق والسداد البرّي |
مسيك بالخير ............
وشلونك عساك طيب ................ الحمدلله أنك شرفتنا بالمنتدى وهذا المكسب .... ( بس أترك عنك كراهت الدوج ومن يتكبرون على الدوج أذا رجعوا للديره ) . ;) :1aa: :smailes42: |
اهلين اخوي ابو عبدالله(شايب الصمان)
شرفت الموضوع الشرف لي بمعرفة هالوجيه الطيبه هههه عساك شفت القفشه هههه اما الدوج ما جربته ولا شيء لكن المشهور عنه قوة المكينه من بين السيارات الامريكية كلها والدليل الكلزرر الله يطعمك من خيره ويكفيك شره وشر غيره تقبل دعائي لك بالتوفيق والسداد البرّي |
| الساعة الآن 12:18 AM |
Powered by vBulletin® Copyright ©2000 - 2026, Jelsoft Enterprises Ltd. TranZ By
Almuhajir