|
أول مقناص حباري لنا مع دخول الوسم ..... أبوشعلان
بسم الله الرحمن الرحيم أخواني الأعزاء في منتديات الرحلات ... أعضاء وزوار ... السلام عليكم ورحمة الله وبركاته : في إجازة عيد الفطر المبارك ... كان أول مقناص لنا لأن الوسم يدخل في وسط الإجازة ... والوسم يدخل في 16إكتوبر ... وهو نفس اليوم الذي تبدأ به هجرة الحبارى الفعليه ... وبهذا اليوم يبدأ يعتدل الجو ... وكانت الرحله عباره عن سعة صدر مع العلم إن أغلب الطيور مابعد جهزت ... ومع إنها وناسه إجتمعوا بالرحله أكبر عدد من الربع مررره وحد ... وهم حسب نداءاتهم : أمير الرحلة ــ الفاضل , 75 خمس وسبعين , أبوصالح , أبو راشد , أبو عيسى , محيسن , أبو إبراهيم , الحوت , الروسي , أبو عبدالرحمن , أبومتعب , شقردي , أيمن , الصقار , أبوزيد , طويق , أبوشعلان وثنين من الربع قنصوا 3أيام ورجعو وهم : أبوعبد الرحمن , وأبومشعل وكانت الرحله رائعة جداً ياربي لك الحمد ... وكان الليل براد ... وأما النهار من الساعة 9 لازم تدورك مضحى أو تطق شراعك ... لأنه حرّ وأما أخر الرحله صرنا مانوقف إلا الساعة 11 الضحى ـــــــــــــــــــــــــــــ إتفقنا أن نمشى بيوم العيد بعد العصر ... وفعلاً حركنا مسّيان بعض الربع دعو طيورهم والبعض وجه للمكان المراد ... وبعد مافرقنا عن الخط مشينا حدود 30 كيلو لمكان نوم معروف لدينا من قبل ... وكانت هذه الليله رائعه جداً لأنها أول طلعه بالطيور ... وبدينا المقناص من بكرى ولكن من دون جدوى ... ويوم جت الساعة 9 الصبح نادانا واحد من الربع ... قال أبشرو بمكان مسكّت للغداء ... هبلنا نحسب عنده جرّه ... اليوم الأول مالقينا شي واليوم الثاني مثل ... وفي اليوم الثالث بعد ماقمنا من المغدى ... صوت واحد من الربع قال أبشرولكم بجرّه ... وكل الربع وجهو يمّه ويوم إجتمعنا وبدينا نقصها مع إنها قديمه شوي ولكن شفقه وبعد مامشينا معها شوي لقيناها مقصوصه قبلنا وأثاري المواتر مقطعين لها واجد ... طابت النفس منها وبعدها لقينا جراير كراوين ولهينا فيها إلين لقيناهن طايرات ... دورنا مراح وأمرحنا واليوم الرابع مالقينا شي واليوم الخامس مثل ويوم الإربعاء إجتمعنا وقت صلات المغرب طلباً من أمير الرحلة ( الفاضل )... وقال لابد أن نغيّر الأرض هذي وقال كل واحد يعطينا رايه ... وإتفقنا على مكان يبعد حوالي 70 كيلو من محلنا ... وتوكلنا على الله ... وحوالي ساعة وحده وحنّا جالسين نتقهوا بالمراح (( شوشليه )) ... ومن بكرى بدا المقناص الفعلي ... وقبل طلوع الشمس نادانا الأمير الفاضل ... وقال أبشرو بجره بس تراها قديمه قديمه ... قلنا إن شاءالله إن تستجد ... وتوجهنا لمّه وبدينا بقصها ولقيناها طايره وقطعنا لها ولقينا مطبها المهم طارت وطبت يمكن ثلاث مرات ... وأخر شي لقينا جرتها جديده .. ويوم تحمسنا لقينا المواتر قاصينها وهادين عليها ... (( الله يرزقنا وإياهم )) ... ودورنا مكان للمضحى ولقينا غار رايق ومفصّل على المزاج مكان للنوم والتبطّح ومكان للطيور ... وهذا مكان الطيور وبعد ماتغدينا وشبعنا ياربي لك الحمد ... أول من حرّك أخونا الغالي 75 خمس وسبعين ... وشوفو وش سوّا واحد من الربع حطهن تحت سيارته عشان الظلال وقريبات من المويه ... ولا علّمه ولذلك حصل ماحصل ... ماتن ثلاث والباقي جاهن حاله نفسيه من الموقف اللي صار ههههه... وتبون الصراحه والله أنّبه ضميره بالحيل >>>>>> اللي يشوفه يقول أول مرّه يدعس شي ... (( له سوابق )) هههههه وبعد ماقنصنا بنص ساعة صوّت واحد من الربع قال أبشرو بجرّه جديده هالحين قلنا كفو جيناك ... جينا لمه وبدينا بقصها ... إلى والله الموتر اللي قدامنا يلوّح بشلو ... راح لمّه راعي الجرّه وش العلم قال الحبارى اللي تقصونها هدّيت عليها قبل شوي وراحت شمال ومابغاها طيري وألحين قاعد ألوّح له توزعنا وبعدها بشوي طلع طير واحد من الربع وهدّه ووجّه لنفس المكان اللي كان يلوح فيه الرجال إلى والله الرجال هاد على الحبارى شيهانه ... وصادتها ... لحقو الربع على الطير وردوه ... صارت الحبارى رابضه عنده ... ومايبينا نشوفها يعني صرّفنا ... (( الناس أجناس )) مالقينا شي يوم الخميس ... وأمسينا ومن بكرى ( يوم الجمعة ) لقى واحد من الربع جره ماهيب جديده بالحيل ولكن يمكن تستجد ... ... قصيناها وصارت مقصوصه قبلنا ومهدود عليها وهذا مفرسها . وترزقنا الله بعدها ويوم جت الساعة 8.30 صوّت واحد من الربع وقال عندي جرّه ... جينا لمّه وبدينا نقصها إلين إستجدّت ... قال الأمير إرتفع (يالصقار) وطيره زين ماشاء الله تبارك الله ... وكانت الجرّه جديده وتحبري عنّا ... وفجأه قال تراني هدّيت طلع ... وبدت قلوبنا ترجف بقوّه ... وفعلاً طلع طيره وساق شوي ( مطلب ) وبعدين راج وكان الطير مرتفع ... وحنا سقنا على طلعه شوي ونوطّي القشع وفجأه فقعت الحبارى ... وطبّت على طول ... وحوّل عليها من السماء وخبزها بالأرض ... وخلصنا الحبارى ويستاهل الطير حمامه كامله وبيالة مويه هههه والفرحه وقتها ماتوصف بعدها قنصنا شوي وقال الامير إجتمعوا عشان المضحّى ... وبينما حنا موجهين لقا واحد من الربع جرّه قاصينها مواتر أمس ... وفجأه لقاها توطّي على جراير مواترهم ... صوّت لنا وقال الامير تعال وبعد الغدى يجيبها الله لأن الجو إحتر ... وفعلا بعد الغدى قمنا عليها وقصيناها ... ولكن كل ممشاها ممشى ليل ... وحنا نقصّها لقيناها ذابحه عقرب موطيتها إلين ماتت ... وبعدها لقينا مطيرها ... وقطعنا على الوجهه ولكن من دون جدوى ... وقبل تغيب الشمس قال الأمير نبي نعلّم بعض الطيور على الحبارى ... درجناها لكل الطيور اللي معنا ... شوفو البراءه وشلون وأخيراً هدّينا عليها البكر بشّار ...ونشّها بالأرض ... وبعدين طارت ولحقها ... وأخيراً ذبحها ( ماشاءالله تبارك الله ) وأخيراً أقولكم ... الصراحه جت كبّة حباري ... والدليل كثرة الجراير اللي لقيناها ... والوفقه من عند رب العالمين ... وأخيراً ... كم كلمة جرّه ذكرتها بالموضوع ؟ هههههههه وفي نهاية الموضوع ... أتمنى أن يكون قد حاز على رضاكم وإستحسانكم يارب ... ولاتنسوننا من صالح دعائكم ,,,,,,,,,,,,,,,,,,,,,,,,,,,, تحياتي لكم جميعاً ,,,,,,,,,,,,,,,,,,,,,,,,,,,, |
الله يرزقكم بالرحله القادمه وجعلكم كل جره تلقونه تصيدونه والجره اللي ماتلقونه تنتظركم الين تجونه مرة آخرى وتقصون الجره ;) :rolleyes: :D :) :mad: :eek: :cool: :confused: ,,,,,,,,,,,,,,,,,,,,,,,,,,,,,,,,,,, :D |
ياملحك يابو شعلان وياملح سواليفك
والله ان تسني معكم لحظة بلحظة وبداية الصيد بهالدجاجة ، انا ودي معكم لحظات الحصار وتعتيق الجرة ،، آآآآآه صورك نادرة يابو شعلان تقبل تحيات اخوك القطار |
الغالي ابو شعلان مشكور على هذا التقرير المفصل والممتع جداً هكذا يكون التقرير ولا بلاش |
أبو شعلان..:) ما شاء الله تبارك الله تقرير جميل ورحلة ولا أحلى من كذا والجميل فيها الصحبة الطيبة والإلتزام والإنتظام بالإضافة إلى طول مدتها>>>>> حتى آخر الأسبوع عندي فيه علل :D ما قصرت وبيض الله وجهك والله يعطيكم العافيه أخوك.. ابو فهد... بصراحة أعجبتني هذه الصورة.. وما أقول إلا ما شاء الله تبارك الله والله يرزقكم الخير ويبارك لكم فيه http://www.alrahlat.com/vb/uploaded/27_1193549903.jpg :).. |
جبتها يالذيب يابو شعلان
انا بكل صراحة اندمجت بالقصة وتذكرت زمان مضى ، والله يعيده على خير. لاهنت يابو شعلان. |
كثر الجرر يدل على كثرتها وان شاء الله توفق انت وربع في الايام الجاية
ومشكور يابو شعلان على امتاعنا في هذا السرد الرائع |
السلام عليكم
ابو شعلان لقيت جرّه ( جرّه عطر هههههههههههه ) امزح هلا ببو شعلان رحله موفقه والله يباركلكم بصيدكم وطيوركم وتراني استنى منك الوعد تسير علي . اخوك راعي كيف ابو ناصر |
اقتباس:
يامرحبا يابوعبدالله ... اللهم آمين والله يتقبل منا ومنك ... يامال العافيه ياراعي الدوج ... من اليوم ورايح أبمدح الدوج علشان هالدعوه الزينه هههههه:D مشكور يابوعبدالله على ردك الجميل ... اقتباس:
هلا وغلا بخوي القطار هلا بالملح كلّه ههههه ولحظة الحصار وتعتيق الجرّه منهو اللي يدري عن نفسه عشان يصور :confused: النادر والله ردك الجميل ... وإسلوبك المملوح ... :D مشكورأخوي القطار على مرورك الكريم ... اقتباس:
يامرحبا يابونواف ... تو مانوّر الموضوع ... الله يشرف مقدارك ... على هالكلام الحلو ... مشكور يابونواف وماقصرت ... مرورك أسعدني يالغالي ... ,,,,,,,,,,,,,,,,,,,,,,,,, تحياتي لكم جميعاً ,,,,,,,,,,,,,,,,,,,,,,,,,, |
ابو شعلااان :::
ماشاء الله مقناص طيب وخوه طيبه ........ الله يرزقكم بعدد ماقلت جره بهالموضوع يا بو شعلان :D (14) مره وتراي احتري الجائزه ولازم التوصيل للبيت :cool: (قمزه ) اعجبتن الصوره :":" http://www.alrahlat.com/vb/uploaded/27_1193547899.jpg ـــــــــــــــــــــــــــــــــــــــــــــــ سلا1111111111111111111م |
اقتباس:
هلا وغلا يابوفهد ... وهذي الساعة المباركه ... صدقت والله أهم مافي الرحله هو الخوّه الطيبة شرواكم ... مشكور يابوفهد على الإعجاب ... لاهنت على مرورك الرائع وردك الجميل ... اقتباس:
أخوي راعي الشاص ... ياخي أحس إني مبطي عنك ... مدري أنا اللي منقطع أوأنت ... على العموم مشكور على هالإندماج ... والله ودنا إن الموضوع أفضل لكن الجود من الماجود ... والله يعيد الأيام الحلوه علينا وعليك وحنا بصحه وعافيه يارب ... مشكور أخوي راعي الشاص وماقصرت .. اقتباس:
هلا بخوي ولد نجد ... الله يجزاك خير على هالدعوه الزينه ... عزالله إنها تسوي شيٍ كثير عندي ... لاهنت وبيض الله وجهك يابعدي ... مرورك أسعدني يالغالي ... ,,,,,,,,,,,,,,,,,,,,,,,,,,,,, تحياتي لكم جميعاً ,,,,,,,,,,,,,,,,,,,,,,,,,,, |
وانا اقوووووووول وين ابو شعلان مبطين ماشفناه ؟؟؟
طبعا كنت متأكد انك حول هالمقانيص :D منتب بعيد (HAPPY LANDING) ابو شعلان , ونبي من هالمواضيع الدسمه :eek: |
الحمد لله على السلامه يا ابوشعلان صايد يا ابو العوايد وماشاء الله رحله موفقه وتقرير مصور ومفصل ممتع جدا ..... جعلتنا نعيش معكم خلال رحلتكم الجميله وبالتوفيق ان شاء الله |
بسم الله الرحمن الرحيم يامل العافيه يابو شعلان ماشالله تمشي وصيد والحمدلله الاجواء بدت تتحسن والطيور تجهر بس ان شاالله هالسنه ماريات خير نسمع عن صيد وافر لله الحمد مشكور يابو شعلان ولايهونون ربعك يالغالي ملاحظه: اذا صرت قانص شيك على قناة المنتدى كودنا نتصادف ونضحي ولا نتعشى جميع بالتوفيق |
ماشاء الله تبارك الله يبو شعلان صايد وفايد يا علها تعود عليك بكل عيد |
| الساعة الآن 12:00 PM |
Powered by vBulletin® Copyright ©2000 - 2026, Jelsoft Enterprises Ltd. TranZ By
Almuhajir