[ابوسعد]

بالــــي - Bali


- الجزء الثاني -


أبيكم تعذروني اليوم عن تكملة الرحلات السياحية في جزيرة بالي ، طبعاً السبب هو انه وصلني اتصال من شخص عزيز و غالي من السعودية يقولي انه توه متملك ( كاتب كتابه ) و انه ناوي اذا تزوج يروح لم جزيرة بالي و يقضي فيها شهر العسل ، انا ماني قائل لكم هو من يكون بس ترى أول حرف من اسمه ( عصويد ) ، المهم انه جاي على جزيرة بالي عشان أوديه لم منتجع سياحي أنا مدحته له ، و يبغى يتأكد ان المنتجع هذا زين و يليق بمستواه الاجتماعي ( ولد نعمه وش أقول). بياصل لم جزيرة بالي اليوم حدود الساعة 10 الصباح ، و أبطلع أنا وياه على طول للمنتجع هذا.



اسبرانزا : عصويد حبيب البي الحمدلله على سلامة وصولك ، جزيرة بالي نورت بوصولك.
عصويد : ايه.. هلا يا... ؟؟؟ مار أنت وش اسمك تراني نسيت.

اسبرانزا : افاااا ، وش دعوا يا عصويد ، أمداك تنسى اسمي ( شكله فالها في الطيارة) ، انا اسبرانزا يا عصويد.

عصويد : اسبرانزا؟؟ وشي ذي اسبرانزا ،،،، المهم ما علينا ، رح جب شناطي و حطها في السيارة بعدين قرب السيارة عند باب المطار ، تراني تعبان ولا عندي نيه امشي.
ولا أقول لك دخل السيارة جوا الصالة و جبها الي عندي هنا.





اسبرانزا : هذي أخرتها طلعت حمالي عندك ، بس ما يخالف أنت غالي و تستأهل.

اسبرانزا : يله يا عصويد أنا حطيت الشناط في السيارة ، بس تراني ما لقيت موقف قريب. و حقين الأمن ما سمحوا للي ادخل السيارة جوا المطار (واحد مصدق الموضوع)
عصويد : وش قصدك يعني تبيني امشي ،، معصي منيب ماشي شف لك طريقة توديني للسيارة مندون ما امشي لها.





اسبرانزا : (يا من شرا له من حلاله عله) ، يعني وش تبيني أنا أسوي ، اشيلك يعني على ظهري.
عصويد : تشيلني على ظهرك ، تشيلني على راسك ، هذا مهوب شغلي ، المهم انا ماني ماشي للسيارة.

اسبرانزا : طيب طيب يا عصويد ماهي مشكله ، أشيلك انا و اوديك للسياره
عصويد : أرفق ونت شايلني لا تطيحني و اتمشخ ،، ارفق ارفق شوي شوي ، لا تمشي بسرعة . طخ... طيخ... طوخ... قربع.. ، هذي أخرتها يا اسبرانزا هذي أخرت ألصداقه اللي بينا ،، تجدعني على السير حق العفش.





اسبرانزا : ابد ما كان قصدي يا عصويد أنت اللي زلقت من بين يديني و طحت،، ترى ما كان قصدي ، بس أشوفك ماشاءالله تذكرت اسمي

عصويد : خويي اسبرانزا ، انا عارف انك ما تقصد ، انا اللي اثول و طحت من بين يديك ، ماهي مشكله ، خلنا بس الحين نمشي للسيارة و نطلع من المطار.
اسبرانزا : يله مشينا ( ناس ما تجي الا بالعين الحمراء).





عصويد : خويي اسبرانزا ممكن نأكل شي ترا انا طاقني الجوع.
اسبرانزا : تدلل يا عصويد قل للي بس وش ودك تأكل وأنا اوديك أحسن المطاعم.

عصويد : والله انا مشتهي للي كبسة بخاري على لحم قعود (جمل) ، نفسي فيها من تركت بريده.
اسبرانزا : انا وش أسوي فيك يا عصويد ، الحين تجي لجزيرة بالي و ودك تأكل كبسة قعود ، صدق انك قروي قح ، انا الغلطان ولا واحد زيك اول مره يطلع من بريده يروح على طول لجزيرة بالي ، المفروض اني عارف أن الرأس هذا مهوب حق سفر من يوم ما أنت لبست جكيت و بنطلون جنز يوم اوديك معي لمزرعتنا اللي في الجعله ( عاد انا اتحدا القصمان يعرفون وين الجعله هذي فيه).
اركب اركب بس الموتر ، مالت عليك انا بروح اغديك في مطعم من اختياري ، وانا واثق انك بتنساء كبست القعود.

عصويد : هو انت وين ناوي توديني أكل فيه يا خويي اسبرانزا.
اسبرانزا : اقول انطم بس انطم ، انت ما يوخذ منك علم ، شكل الرأس هذا ما بوه شي. (شكلي عصبت على عصويد مندون داعي).





اسبرانزا : اخوي عصويد انا بوديك على مطعم من أفضل المطاعم في جزيرة بالي ، المطعم اسمه تانجونق سارا (TANJUNG SARI) ، وهو موجود في فندق تانجونق سارا ، المطعم يعد من أقدم و أفضل مطاعم الجزيرة ، الجلسات في المطعم من أجمل ما يكون خصوصاً و انه يقع على شاطئ البحر. طبعاً المطعم يقدم مجموعه واسعة من المأكولات العالمية و البالينيزيه ( المأكولات الشعبية لهل الجزيرة ) على شكل بوفيه مفتوح.

عصويد : وش ذا أعوذ بالله أنت طالب للي لحم خنزير أنت تبينن أكل لحم خنزير ، ما هقيتها تجي منك يا اسبرانزا ، ما هقيتك فاسق بالدرجة هذي.
اسبرانزا : ، وشو لحم خنزيره الله يجزاك خير يا عصويد ، انا بسالك سؤال و تكفا جاوبني عليه ، وشو الشي اللي له زعانف على ظهره و جوانبه و يعيش في الماء.

عصويد : يعني مسوي نفسك فاهم يا اسبرانزا ، طبعاً السمك.
اسبرانزا : و اللي في صحنك وشو يا الاثول ، اللي في صحنك سمكه ، ناظرها زين. ( وش أقول بس رساوي يجرح و يداوي).

عصويد : هههههه أنا داري يا اسبرانزا ، تراني بس امزح معك. مار أقول أبطلبك طلب بس لا تردني ، ترى حساب الغداء على.
اسبرانزا : لا ما يصير اخوي عصويد أنت ضيف على ، و حق الضيف غداء حتى لو الضيف هذا غثيث.





عصويد : والله ما يدفع الا انا و ترى زوجتي طالق بالثلاث اذا ما خليتني ادفع قيمة الغداء.
اسبرانزا : يا عصويد ما أمداك تزوج الا و تحلف بالطلاق ، الله يهداك بس ، خلاص سو اللي تبي ، تبي تدفع قيمة الغداء ادفع.

عصويد : الحمد لله ، ياني شبعت شبعه ، الكرشه زادت شبر من كثر الأكل. الله يسلمك يا اسبرانزا على المطعم الزين ، وش رايك تنادي الافنس (الجرسون) عشان يجيب للي الفاتورة أحاسبه و نمشي.
اسبرانزا : احمد ربي ان المطعم و الأكل جاز لك يا عصويد ، و كان ودي اني انا اللي والله ادفع الحساب ، بس يومك حلفت خلاص معاد اقدر اقول شي. يا جرسون عطنا الفاتورة خلنا نحاسب.





اسبرانزا : يااااااااااااا عصوييييييييييييييييييييييد ، عصويد عصويد ، سلامتك وش فيك... عصويد قم وش بلاك ، عطوني مويه بسرعة الرجال شكله إغماء عليه.
بسم الله ( انا قاعد أمرخ وجه عصويد بالمويه) ، الحمدلله بدا يفتح عيونه ، سلامتك ، سلامتك يا حبيبي عصويد ، اشوا انا خفت انك مت ، وش فيك وش اللي صار عسى مهوب الأكل.
عصويد : الله يسلمك يا اسبرانزا ، لا الأكل مافيه شي ، الأكل زين و يهبل ، بس مدري هي الفاتورة اللي جايبينها عشان أحاسب هي للكل ولا احني شرينا المطعم ، وهذي الفاتورة حقة قيمة المطعم ، الفاتورة مكتوب فيها 400,000 انا مدري وين بجيب كل الفلوس هذي منه ، انا لو اجمع راتبي 10 سنوات ما قدرت اجمع المبلغ هذا.

اسبرانزا : (ما قلت الكم قروي ، شكله ما يدري ان المبلغ بالروبيه مهوب بالريال) ، لا ولا يهمك يا عصويد خل الحساب على المرة هذي ، هم الاخويا وشم له.
عصويد : والله اني خجلان يا خويي اسبرانزا ،،، ماشاءالله لا و معك ورق امهات 100,000 ،، اثرك منت بسيط ، انا كنت سامع انك ولد الراجحي بس ما كنت مصدق.





اسبرانزا : يله يا عصويد خلنا نحرك للمنتجع اللي بوديك تشوفه ، ترى المشوار طويل ولا ودي ان احني نتاخر.
عصويد : قدام ، بس ما قلت للي يا اسبرانزا وين ناوي توديني.

اسبرانزا : ابوديك يا عصويد لم منتجع على الساحل الشرقي لجزيرة بالي في قرية صغيره اسمها مانقيس ( Manggis ) ، المنتجع اسمه اليلا مانقيس ( Alila Manggis ). يله خلنا نحرك على بركة الله.




الخط الأزرق يوضح خط السير من عاصمة الجزيرة الي القرية.


اسبرانزا : قبل ما أنساء يا عصويد ، اذا جيت انت و حرمك المصون خذ لك تكسي من المطار و على طول للمنتجع ، تكلفة التكسي بتكون حدود 40 دولار و المشوار حدود 90 دقيقه.

اسبرانزا : هذي مدينة كلونق كونق (Klungkung) ، ابخذ من وقتك يا عصويد 15 دقيقه ابوريك شي عجيب في قصر العدالة القديم الموجود في المدينة .


اسبرانزا : هذي يا عصويد عبارة عن رسوم تاريخيه ، اهل بالي القداما قاموا و رسموها بيديهم على سقف و جدران القصر.






هذي الرسوم اللي على سقف و جدران القصر.


عصويد : و بس يا اسبرانزا ، موقفنا و مسحبني على وجهي عشان توريني خرابه جدرانها مشخبطن عليها شخابيط بزران ، و تقول للي هذي رسوم تاريخيه ، الله بس يهداك.

اسبرانزا : ايييييييه ( يا من شراء له من حلاله عله ) ، ما اقول الا الله بس يخارجنا. هذا حني وصلنا يا عصويد للقرية و هذا المنتجع اقبلنا عليه.




احد مداخل المنتجع.


اسبرانزا : خلنا الحين ندخل للمنتجع و ناخذ لنا غرفه و نلف على الفندق و نتفحصه.




منطقة الاستقبال في المنتجع.




احد الغرف العادية.




مسبح المنتجع.




مطعم المنتجع.


اسبرانزا : قبل ما أنساء يا عصويد تراني أخذت لك منهم خصم يحبه قلبك على الغرفة ، و حط في بالك ترى لو اني منيب معك ما عطوك الخصم هذا ، الغرفة بتطلع فليك بسعر 150 دولار في الليله.
عصويد : الله يخليك للي يا خويي اسبرانزا ، انا عارف اني مندونك كنت بضيع و بينصبون على الفنس هذول.

اسبرانزا : افا بس عليك يا عصويد انت خويي ، لو ما افزع معك من افزع معه ( بيني و بينكم بس لا يدري عصويد ، ترى سعر الغرفة بس 120 دولار و الباقي عمولة للي من الفندق ، وش أقول من عاشر قوم اربعين يوم صار مثلهم).














و هذي الأراضي التابعة للمنتجع و المناطق المحيطة به.









اسبرانزا : عصويد ؟؟؟؟... عصويد!!! وش انت قاعد تسوي؟؟ ، اطلع من المويه ، الله يهداك هذي ماهي للسباحة هذا مستنقع ...!!! يا عصويد انت انهبلت ، اطلع بسرعة لا يشوفك احد و تفضحنا..؟؟؟؟.
اثرك يا عصويد مهناش ،، الحين طاب في المويه عشان تاخذ الوردة ،، الله بس يرزقنا عقل.
عصويد : وش فيها يعني ،، اذا أخذت الورده ، الورده هذي انشاءالله هديه لزوجتي الحبيبة ، عشان تنبسط أول ما ارجع و تضبط الامور.



(يتبـــــــــع)