بسم الله الرحمن الرحيم
هلابك أخوي الليل ... طبعاً الضبان ماحد يحرص عليها إلا إذا جانا ربيعٍ زين ... زي هالسنه يالله لك الحمد ...
ووقت صيده يكون ..بكنّة القيض .. يكون الضب ماخذ كفايته من الشحم ...
وطرق صيده :
1_ الرمي وهذا مايلجأ إليه الكثير من الناس لصيد الضب ...
2_ نحبل له (( تكاكه )) وهي طنب وحبل ونحطه على شكل دائرة واقفه على فتحة الجحر ... ثم نربط الحبل بالطنب ... بحيث إنه إذا طلع الضب من جحرة يدخل وسط الحبل ويبدا يشد ... إلين يتمكن منه الحبل ...
طبعاً نحطها ونروح ونرجع له بعد ساعة حتى ناخذه ...
3_ نجي للضب بعز حر اليوم يعني الساعه 11 أو 12 ونلقاه معاكر يعني إذا وقت بجحره تشوف العكره ... على طول إمسك العكرة ... وقتها الضب يشد ظهره على جدار الجحر ويكون سحبه صعب جداً ... عشان كذا نجيب (( ليور )) وندخله بين ظهره وبين جدار الجحر ... ونسحبه بقوه ...
4_ التغريق ... نصب الماء على فترات حتى أن نسمع صوت الضب يحاول الخروج ... ونعاكس فتحة الجحر .. وإذا طلع نمسك به ...
..............................................
وطبعاً الضب من الحيوانات اللي يبهذلها ويذبحها المطر ... عشان كذا إذا سمع صوت الرعد وسطع البرق طلع من جحره على طول عشان مايجيه الماء ويذبحه ...
فيه واحد من الربع سوى طريقه جديده بس متعبه ... يحيب طال عمرك :
ماء .. كشاف .. إشاعة مستشفى ..
طبعاً يجي بالليل ... ويبدأ بتحريك الإشاعة شوي شوي عند جحر الضب كأنها رعد ... ويكّبس بالكشاف على إنه برق ... ويبدا بصب الماء ... بعدها الضب يجيك يمشي طبلونه ...
هذا مالدي أخوي الليل عن صيد الضبان ...
أحس إني طولت عليك ... لكن معليش ...الموضوع شيّق
لاهنت يالغالي ... وبيض الله وجهك ...
,,,,,,,,,,,,,,,,,,,,,,,,,,,,,,,,,,,,,,, تحياتي لك ,,,,,,,,,,,,,,,,,,,,,,,,,,,,,,,,,,,,,,,,,,,,