مليار مسلم .. !!

[رحال بريدة]

.
.
.
.

ياموت زرني مرحبا فيك وأهلين=ماعاد في دنيا الهوانات عزة
كاس المذلة ذقت أنا منه كاسين=ياما شربت الذل مزة ومزة
وأنا الذي من قوم ناسٍِِ عزيزين=تاريخٍ أبيض عن سواده منّزه
تشهد لنا اليرموك وبدر وحطين=معارك في كل حينٍ وحزة
لوصاح مسلم بآخر الهند والصين=سارت جيوش الغوث لأجله بفزة
الجيش راياته على نصرة الدين=ماهوب تلميع وحفلٍ ورزة
واليوم شفنا ماحصل في فلسطين=الجرح غاير والمشاهد بغزة
جرحى وقتلى والدما بالميادين=ماتسمع إلا صوت ثكلى وهزة
أطفالنا تصرخ بليا مجيبين=يروعها صوت القنابل بنزّه
مليار مسلم في عددهم كثيرين=يكفي بني صهيون بالعين خزة
يارب نصرك للجنود الميامين=راس العدو في كل شبر تجزه

.
.
.
.
.

رحال بريدة 17/1/1430هـ

.
.
.