[يعقوب الوهيب]

طلعت رحلات كثيرة وسفريات عديدة مع اناس مختلفين وما مر علي منهم واحد يكون مرتاح ومستانس طول الرحلة.!!
دائما يكون عنده رغبة يغير شيء من طريقة تصرف الاخرين اثناء الرحلة، وبصراحة من عدة تجارب عرفت ان أي شيء تبي تسويه على رايك بطريقة معينة غير اللي هي عليه اعتبر نفسك راح تخسره. غصب ماكو فايده هذي هي الدنيا.

طُـبعت على كدر وانت تريدها *** صفوا من الأكدار والاقدار

يعني ما راح يرتاح بالك، ليش لأننا بطبيعتنا ما نقتـنع ولا نرضى عن حالتـنا واللي حنا به وبس نقعد ندور وين العيوب وشلون نغـّيرها << لاتقولون من علامات الكبر
وماهو شرط تكون عيوب كبيرة، بعضها فينا انفسنا العزبة ما مرتبة، او السيارة يبيلها شيء او في ربعنا فلان ما قطع اللحم او فلان ما شب الضو أو ناسي البصل، حتى طريقة الجلسة او حطة الرواق تلقانا بس عيوننا على النواقص او العيوب.
هذي النظرة هي اللي ما تخلي بالك يرتاح.
انا ما اقول ان الواحد - يطنش- ويترك كل شيء !!، لا لا
ولكن ما نقعد نترصد للنواقص والعيوب والتقصير والمشارهات
ترى دائما نقول (اغفل يا فلان)
بصراحة بديت اعود نفسي عليها دليت اغفل ارتحت وعرفت اننا نقدر نعيش ونتعايش مع النواقص - وليس مع الرفاله، لأن ما احد يرضى بالخمال- ولكن صرت اتفهم واتقبل الأشياء بنواقصها بالرغم من انه يوجد طرق لإصلاحها او انها يمكن تعديلها علشان تكون بشكل افضل.
عاد الشيبان ما يقدرون يضبطون انفسهم ويغفلون عن الشباب وتصرفاتهم، اما اللي يقول انا شباب ويقدر يضبط نفسه ويتقبل اللي معه فهذا هو اللي بـيرتاح وينبسط.
اهم شيء يجب ان نتذكر ان الدنيا باقي فيها خير وما راح تزول اذا ما تصلح هذا العيب/النقص ايا كان، بل يمكن يوم من الأيام تعرف ان ما كنت تشوفه عيب صار هو الصحيح.

طولت عليكم

سامحوني.