%%%%....نصائح من ذهب....%%%%

[دربي صعب]

أكيـد اللي يطلع للبر محفوف ببعض المخاطر البسيطه والصعبه أبكتب لكم أدوات بنظري أنها ضروريه بكل سياره بعد ستر الله وبعض المشاكل والحلول.

الأدوات

1. الياور : أداه تستخدم لتصليح البنشر يدوياً .
2. رقعة تيوبلس.
3. تيوبات (لاساتك) حتى لو كانت كفراتك توبلس ولايوجد لها تيوب.
4. سيور أحتياطيه نفس سيور موترك بالحجم والعدد.
5. حبل شد بطول 10 متر.
6. اشتراك بطاريه.
7. ماطور هواء.
8. اسعافات اوليه.
9. اللحام بارد (اللي يخلط).
10. بالون الشكمان : عباره عن باللون يوضع تحت الموتر وينفخ عن طريق الشكمان.
11. ماء والتمر : الماء ضروري لك ولموترك حتى لو مشوارك قريب.
12. بوصله أو قارمن.
13. عده متكامله.

المشاكل والحلول

1. أذا مامعك ولاعه:
طلعت للبر ونزلت العزبه ولكن لم تجد الولاعه أو خربت.
الحل : تجيب سلك كهربائي أو معلاق ملابس أو سيم حق البرسيم وتوصله بالبطاريه واحد بالموجب وواحد بالسالب وتشغل الغاز وتقدح بطريقه سريع ويشتغل بأذن الله.

2. الاديتر أذا كان يهرب ماء:
الاديتر يهرب ماء بأي سبب كان أكيد بتعبيه ماء لكن مافيه فايده لان الاديتر مشقوق.
الحل : قبل تعبئة الماء تقوم بتفتيت ثلاث حبات من روث البعير بالاديتر (أعزكم الله) لانه بدوره سيقوم بسد الشقوق.

3. أذا مامعك عفريته:
بنشرت لكن تفاجئة أن مامعك عفريته أو العفريته تعطلت.
الحل : تضع حصاه (رضمه) تحت الدفرنش الخلفي أو الامامي أو الدنقل أذا كان البنشر قدام ولاتترك مسافه بين الدفرنش والحصاه وبعدها تحفر تحت الكفر حتى يسند الموتر على الحصاه وبعدها فك الكفر وركب الكفر الاحتياط وحرك الموتر وينزل تلقائي عن الحصاه.

4. أذا أرتفعت حراره السياره:
تمشي مع الخط أو بالبر وأرتفعت حرارة الموتر.
الحل : توجه الموتر أتجاه الهواء لاتفتح غطى الاديتر علشان أذا كان يوجد ماء مايخرج عن المكينه تصب على الاديتر ماء وأذا نقصت الحراره تطفي السياره وتشيك على السيور والاديتر والمروحه.

5. اذا غرزت بالبر:
أول شي من باب الاحتياط النفود صعبه على أصحاب السيارات اللي بدون دبل وقت الصيف لكن أذا ولابد تنزل من هواء الكفرات وأذا مافيه فايده تحفر عن الكفرات الامايه لانها هي العائق وفيه حل أيضاً تحفر بين الكفر الامامي والخلفي وتضع حجر كبير بطريقه عرضيه وتدفن الحجر بالرمل وتهز الموتر للأمام والخلف بدون تضغط على المكينه يعني على الخفيف حتى تطلع.

6. أنطلق ذراع أو ركبه أو عمود التوازن.
الحل : ترفع الموتر بالعفريته وتربط الذراع أو الركبه بمعلاق ملابس أو سيم بأذن لله تضبط.

7. أنشق تانكي بالبنزين.
الحل : تربط مكان الشق بمسمار مناسب على حجم الشق وتضع له وجه حتى مايهرب البنزين.

ودمتم بود ,,, م

ن
ق
و
ل

[أبوعبدالعزيز]

عليكم السلام ورحمة الله وبركاته

مشكور يا دربي صعب عز الله انها نصائح مفيده

[برق تميم]

الله يجزاك الف خير

[دربي صعب]

اخوي ابو عبد العزيز== مشكور على مرورك ويعطيك العافيه
اخوي برق تميم ===مشكور على مرورك ويعطيك العافيه ..
تقبلو تحياتي
دربي صعب,,

[يعقوب الوهيب]

يا كثر ما ننسى الولاعة.

مشكور يا مسهل الدروب .!!

[Abdullah K. AL-Hassan]

موضوع مهم بارك الله فيك أخي الكريم

[البجلي]

مشكور يالغالي
نصائح طيبه
تقبل تقديري

[جناح تبوك]

ونصيحة مني بعد
1- اذا طارت مسامير احد الكفرات وصار الكفر بدون ماسامير ......
ابد فك من كل كفر مسمار وركبة في الكفر اللي طاحت مساميرة وان شالله تظبط
2-اذا انقطع السير ..... ركب عقالك بداله وامش على هونك لين توصل لاقرب ورشة

[دربي صعب]

مشكورين على المرور جميعا ويعطيكم الف الف عافيه على الردود,,,,
=====
جناح تبوك ==يعطيك العافيه على الاضافه .... ولك كل الشكر
تحياتي للجميع//// ابوحمــــــود

[ثامرالماضي]

بسم الله الرحمن الرحيم

أخوي الغالي أبو حمود ...

نقل مفيد جداً ... الله يعطيك الصحه والعافيه ...

وفعلاًُ أخذ الإحتياطات ... مفيد جداً ... وخاصه للسيار ة الواحده ...

لاهنت يالغالي ... وبيض الله وجهك ...

.....................

ملاحظة :

(( الموضوع سوف ينقل لمنتدى الأجهزة وعدد الرحلات لعدم خصوصيته برحلات الصيد ))

,,,,,,,,,,,,,,,,,,,,,,,,,,,, تحياتي لك ,,,,,,,,,,,,,,,,,,,,,,,,,,,,,