رحلة الصمان والدهناء 2/2/1430هـ لفريق ذيابة العتش

فريق ذيابة العتش · 11-02-09, 07:28 AM

السلااااااااااااااااااااام عليكم ورحمة الله وبركاته ..

صباح ومساء الخير ...

اتفقنا وعزمنا على طلعة للصمااان عشان نشوف الربيع ...

واتفقنا على اننا نروح لأقرب فيضة في الصمان ... وهي القراين او ام الحمير مثل ماقال ابوي ..وهذا اسمها الاصلي ..

... المهم تجمعنا و واعدنا ابو ريوف عند مفرق الطوقي وجينا ولقينا يحترينا ..

وطبعا مثل كل روحة ..وحنا مارين عند مخيمات الثمامة .. لازم نتلفت على المخيمات .. وكل واحد منا يقول .. ان شاء الله بسوي مخيم زي ذا ... ابو لمبات .. ولا زي ذا ابو خيام كبار .. وإلا زين ذا ابو كبووووس

والي ينصب ويقول بسوي مخيم لأهلي ..

ومن هالكلام الفاضي ..

والي يقول اذا سوينا مخيم وصرنا مثل حقين العليا والتحلية .. بنبيع جيوبنا الشنبات ونشتري بانشيات ..

اللللللللله من النصب .. يارجال خلونا على جيوبنا بس الله لا يخلينا .. منها

بلا مخيمات بلا خراط ..

المهم ماعلينا ..

انطقنا من محطة حفر العتش .. على طريق الصمان ..

ويوم جينا عند اخر عرق .. عرق جهيم .. وقفنا وقلنا نريح

ونجلس ونفرش المراقد الساعة يمكن 3 الفجر .. فجر الخميس

وبعد صلاة الفجر نمنا لنا كم ساعة

... الجو ماكان بارد صراحة ...

يعني معقول ...

وذرينا علينا بالمواتر

واصبحنا .... واصبح الملك لله ..

ركب عفشك ركب عفشك قلبه قلبه ونحمي المواتر ونمشي ...

ودخلنا الصمان والمسافة من الزفلت لين الفيضة 17 كيلو تقريباً والطرق ممهدة وكلها جوااااد زينه ... لكن

لابد من الوعورة والحصى الي يشقق كفرات المواتر

طبعا الي معهم جيوب شيب الله يعينهم على البطانيج والمطبات انواع الازعاج والصجة وكنك تمشي على سكة قطار بالموتر ...

المهم ..

شوي وإلا ابو ريوف يطلب منا التوقف عن طريق الجهاز الكنود ...... ياشباب وقفوا ترى موتري مبنشر ..

لااااااحووووووووول

سلامات .. وش السالفة

حصاة شقت الكفر ... والله حسوفه .. الكفرات جديدة مالها إلا اسبوع .. تصدقون ..

الله يعوضك يبوريوف

سريع سريع وقفنا ونزلنا العدة ..

فك الكفر فك الكفر اخلص اخلص

عيت تنفك تصدقون ..

صار اليماني مخرب ام السنن حقت الصواميل ... حسبي الله عليك ...

وانكسر واحد من المسامير تصدقون .. يالله انفك .. ونركب الاستبنة ونكمل

شوي وإلا حديقة الفوطة قدامنا .. اقصد روضة القراين .. او ام الحمير مثل مايسميها ابوي .... يقول هذا اسمها الحقيقي ..

ماشاء الله ربيع طيب ومناضر حلوه وخيالية

بس زحمة مالك محل ابد ...

المهم ويتلفت ابو راشد ويلقى ذاك المكان الطيب ونجلس فيه ...

وسوالف وتصوير وتمشي وناضر ذيك الخيمة ياخيي ودوك ذاك الموتر ياصحيبي ومن هالكلام ..

هذا هو حفيد سلالة الشنبات .. الاف جي .... امحق شنب ..

شنبة بلاستيك ..

ابوراشد

حاط السلوقي ورى .. والصقر في الدرج ..

تكسرت ظهورهم من البطانيج والجروف .. ... يازين الدهناء بس

المهم ومع مرور الوقت والجوع كاااااااافر ..

قطعنا البصل والطمام ..

تحت اشراف الشيف حمد والشيف ابراهيم

و احلى كبسة رز لعيون الشباب

ماااااااااااااااااااااش

راعين الشنبات بدو يتذمرون الي يقول جايبينا في حديقة السويدي .. والي يقول شايفينا غنم حاطينا في هالربيع ..

والي يقول تصدقون ماشبكت الدبل من اسبوع .. يعني يلمح ابي نفود ..

والي يقول تصدقون الصمان مافيها ارطى ...

والي يقول زحمة .. وين زحمة الله يهديك زحمة في البر ... تستهبل انت ..

قولوا نبي الدهناء وبس .. لا تقعدون تونونون عندنا .. ( طبعا انا معهم ) كبير المونونين

ربع ساعة او ثلث ساعة بالكثير والعفش محمل..

وظهورهن يارجال وندخل احداثية ابو حثول ولااااه تقريبا خمسين كيلو من مكاننا

لكن فضلنا اننا نرجع للمزفلت وندخل الدهنا من بين العروق من عند ساقان ومحطة ابو جركل مثل ماسموها العيال ..

ونصف المواتر عند المحطة العجيبة .. وكننا في افريقيا

ناقصنا واحد يدخن ويذب القطفة .. ونصير قطع فحم

الغريبة اننا نصب 91
ونصب بعده 95 في نفس البرميل

وياقلب لاتحزن ..

ودخلنا الدهناء .... محبووووووووووووبة القلب والحب الاول والاخير لذيابة العتش

اي ياااااااااااااشيخ ..

كذا من زمان ..

وتنطلق المواتر وكأن العيال مطلعين من سجن مع ان الصمان حلوه وربيع بس الله يهديهم

وسرعة جنووووووونية وكأننا في رالي حاااااايل

وتسمع السوالف في الجهاز الي يقول انطلق ياقرندايزر والي يقول انا الاول صراااااااااحة شي غريب

تصدقون ان المنبة حق السرعة يشتغل في ا لمواتر الجدية يعني نمشي اكثر من 120

بس شي مممممممممتع جداً

ونوقف ننسم الكفرات يوم بدينا في قص العروق ...

بس الضاهر اني بااااااااالغت في تنسيم الكفرات ...

لين انقرص الكفر وطلع من الجنط وصار يهرب الهوى ..

حااااااااولنا وحااااااااولنا بس مانجحت المحااااااولات ... وركبنا الاستبنة ..

صار الجنط مليان تراب ( بوجه العدو) ومابغينا نضيع الوقت

وكملنااااااا المسيرة لين ابوحثول والنقيان الي حوله والارطى الي تفتح النفس بلا الصمان بلا خراط

وننزل على ذيك النقرة ( الخبة )

ونقعد فيها ونروح نحطب على رجلينا ... كل شي قريب .. ارطى على طول الرجال .. بش اكثرها اخضر ورطب ... بس لقينا يابس وهذا مبداً الفريق اليابس بس الاخضر لأ

صراحة الجو خيااااااااالي

واتفقنا على ان ربيع الدهنا هالسنة غير كل السنين الي راحت ..

خصوصا بين العروق والذواري شي عجيب كأنك في ملعب من جد قعدنا ذيك الليلة بين الضو والسوالف طبعا لازم نجيب طاري السكن والجن ومن هالكلام..

وكل شوي رايحين نحطب على رجلينا وقهوه وشاهي وزنجبيل ( ازعجنا بدر بالزنجبيل ) من الرياض وهو يقول لا تنسون الزنجبيل .. ( بس بصراحة صلح زنجبيل ماقد شربت مثله )

أمرحنا ذيك الليلة على صوت قطرات المطر الخفيف على الناااار ..

رش خفيف يجلي الهم ..

المهم اصبحنا على عج هههههههههههه

كنس عفشنا وطلعنا من الدهناء ....

وين الوعد ...
الطوووووووووقي

محاولة فاشلة لإصلاح الكفر

صورة للشباب وهم طالعين من الدهناء

ودخلنا الطوقي ربيعة زين بعد .. بس وصخ ...

صراحة الطوقي اوصخ مكان طلعت له في حياتي .. مدري ليه .. مجمع قمااااااايم

انصح الي بيروح له .. يروح للجهه الجنوبية .. يعني يطلع يسار وهو جاي من مفرق الطوقي مع الشعيب .. انظف من الجهه الشمالية

وقفنا وصلحنا فطورنا .. فطورن غدا

طبق بيض في تاوة مره وحده وشكشوكة عباد المشهورة ( المزرعة )

وطماط ومدري وش بعد ..

ويوم جت الساعة 5 وحنا نحرك للرياض ..

وسوالف وضحك في الجهاز ..

ومرينا على مخيما الدهنا .. ونفس السالفة

لو هذ مخيمي ولو هذا مخيمك..

وبنبيع الجيوب وبنشتري بانشيات

وبصلح مخيم لأهلي ومن هالكلام الفاضي والكذب

والحمد لله على السلامة ..

شارك في الرحلة 12 رحال ..

في 8 سيارات

انتظروا .. طلعتنا الاسبوع الي راح

9-2-1430هـ

حياااااااااااكم الله
نسيت اقول ان الصور كلها من تصوير السليمي .. والخط الي في الصور شعرة داخله جوى الكميرا..

المحمل · 11-02-09, 08:16 AM

عباد وشو ماسك في الصوره اعتقد في الصوره رقم 7

راشد بن ابراهيم في نفس الصورة وراه ينافخ >>> لاتكون الرحلة برعاية

المنتدى >> بصفته المدير

ههههههههههههه

بلغ تحياتي لكافة اعضاء الفريق>>> وخاصتن نفسك

ان شاء الله نلقاكم بعد شوي بالدهناء في طريقي للصمان

**محمد المعارك** · 11-02-09, 08:27 AM

رحلة ممتعة وخصوصاً مع فريق يضم الخبرة والمعرفة.
مشكورين يافريق ذيابة العتش ومبطين ما شفنا لكم شيء .

لاتقطعون تكفون.... تسجل عليكم.

بارك الله فيك.

Abu Ibrahim · 11-02-09, 08:30 AM

تقرير وفريق رائع

سحمان السبيعي · 11-02-09, 08:44 AM

شكرا لك على التقرير الممتع بارك الله فيك اخي الكريم ...........

**ريع الدياب** · 11-02-09, 08:50 AM

فريق ذيابة العتش

(( رش خفيف يجلي الهم .. ))

الا من جد سوالف وصور جميلة فى تقرير يجلي الهم
ومثل ما قال صقر لا عاد تبطوا علينا تكفون

عصا الترحال · 11-02-09, 10:31 AM

ذيابة العتش
تقرير رائع وسرد جميل وشعرة أحلى
بارك الله فيكم

هامة مضر · 11-02-09, 10:48 AM

ههههههههههههههههه
شكل طلعتكم كلها ضحك في ضحك ألا بالمناسبة كمكم أنتم شكلكم كل واحد في موتر . وسلم لي على الشنب هو الجيب بس مشلكته خراباته

عبدالرحمن الدرويش · 11-02-09, 11:16 AM

ما شاء الله تبارك الله
رحلة طيبة
واجتماع اطيب
والله لا يفرق بينكم
اما السيارات حكاية ثانية
موفقين لكل خير ان شاء الله
وشكراً على هذا التقرير
نقره لعرض الصورة في صفحة مستقلة