مــمـــتر البـــران بـيـن الصمان والشمال والقارمـــن والماجــــــلان

[القطار]

بسم الله الرحمن الرحيم

موسم 1412هـ كنا برحلة صيد قميري بشعيب الحسكي ، وهالشعيب ما نعرف غيره ( وكن النزل ما يجي الا هالشعيب بس ) ، عددنا ثلاثة ومعنا هلكس مديل89 وكان فيه قميري ( كب) ومتحمسين ، المهم اننا غرزنا وغاصت سيارتنا وعجزنا نطلعه ، وفجأة ظهر لنا جيب شاص مديل92 جديد يسوقه نفر واحد ، قرب يمتنا عارضاً خدماته بكل ثقة وقال:
مساعدة ياشباب
واحد منا على استحياء:
لو سمحت!
جاء ولبق الشاص على قدام الموتر وشغل الونش وانتشلنا من براثن الرمل بسرعة وخفة.
قلت له : جزاك الله خير ووالديك.
قال: حياكم الله ، وتفضلوا عندي ، ترا عزبتي بذيك الطلحة ( وأشار الى طلحة تبعد حوالي 500متر )
لزّم علينا الرجال قلنا سم نجي يمك بعد العصر لما نخلص من الصيد ، قال زين.
كملنا صيدنا وبعد الظهر سوينا غدانا وتغدينا من القميري وغسلنا قدورنا ونظفنا كل شيء.
وركبنا ثلاثتنا يم الرجال.
ولقيناه لحاله. وسألنا عن خوياه ، قال ما معي احد هالحين وخوياي يجون الاربعاء ويقضون معي الخميس والجمعة ، وانا جالس كل الموسم .
المهم الرجال قهوانا وسولفنا لمسنا من الرجال انه خوي طيب .
لزمنا عليه بمخواتنا ، وقلنا له اما نجيب عزبتنا عندك أو تجيب عزبتك معنا، وبعد التلزيم وافق بس شرطه اننا نجي عند طلحته التي هو فيها حيث انه له اكثر من عشر سنين ما يتعداها.
المهم قضينا معه اربعة ايام هو يقنص لحاله وحنا لحالنا ونتلاقى بالمغدى والمعشى .
والحقيقة اننا استفدنا من هالشخص فوائد كثيرة ، فالرجل صاحب خبرة ويدل الارض كنها حارتهم ( ممتر البران تمتير) .
واكتشفنا انه خبير بالسيارات وبكل السيارات ، وأيضا خبير في بنادق الصيد ، كلها بانواعها مرت عليه ويعرف مشاكلها، حتى انه رهم دربيل للساكتون حقت واحد من خويانا وبطريقة عجيبة .
وبسرعة صارت رفقة بيننا اذا جاء الموسم نذهب يم طلحته اللي سميناها طلحة ابو صالح وأكيد مية بالمية نلقاه هناك ، وكلنا شغف لسماع علومه وعن المناطق اللي راح يمها.
مرة من المرات وحنا جالسين بعد العصر مع ابو صالح ، متحمسين له وهو يهرج عن الصمان وفياض الصمان والصيد بالصمان ، فجأة قطع سالفته واحد من الربع وقال:




---------- يبتع

[سحمان السبيعي]

اهلا وسهلا بك اخي القطار بالمنتدى وشكرا على هذه القصة التي نتماء نقراء تكملتها

[القطار]

اخوي كان المهلي مايولي وخذ عندك التكملة ومشكور




-------- تابع

يابو صالح ودنا نروح حنا معك للصمان .
نظر اليه ثم نظر الينا جميعاً بعين كلها استعلاء وقال
- الصمان ؟؟؟؟؟؟؟؟ صعب تروحون !
- ليش؟
- يبغى لكم استعداد وسيارات .
- والهلكس ؟
- ما تنفع.
اطبق علينا الصمت ، وصدقنا ان الصمان ارض صعبة المنال .
قلت انا : طيب بنروح معك يم الشمال !
قال: انا مزحوم ومواعد الرجاجيل ( أجل حنا بزران)
استمرت رحلاتنا معه ( أو التقائنا به في الحسكي ) لحوالي سنتين ،
ومرة من المرات وافق بعد الحاح على اصطحابنا للصمان ( لخميس وجمعة فقط) وكان الوقت شتاء ووقت صيد القطا والجوني.
ضبطنا الشد على الهلكس وكملناه من المقاضي والخيرات وركبنا ثلاثة بالهاي وهو لحاله على الشاص وكان يرفض ان احد يركب معه.
مشينا الاربعاء بعد العصر وتوقفنا عند ام رقيبة ، عبينا بنزين وتزودنا بما ينقصنا واتجهنا يمين المحطة ، وهناك كان يمشي وحنا خلفه ، ولقينا صيد كثير ( كان الجوني مالي الصمان) صدنا حق عشانا وغدانا وامرحنا اول يوم بالنفود وكنا مذهولين من دلولته للأرض وكيف كان يمشي بارض مالها اخر ويصيد لحاله، وكان صيده أكثر منا ( عجزنا نسقط عليه).
ويوم قعدنا نسولف على ضو الارطى بالليل يوم الخميس قلنا له المناطق الي مريناها وصيدنا فيها وش اسماءها؟
قال هاذا غربي الصمان ولا له اسم محدد.
- طيب وين الشعبان ؟
- الشعبان داخل
- الذئاب اللي تذكر بالصمان ماشفناها.
- الذئاب داخل.
- طيب ودنا ندخل ونشوف هالاشياء.
- مايمديكم الصمان طويل عريض.
رجعنا وكل مزهو بذهابه للصمان وصرنا نتنطع بهالزيارة للصمان وكأننا ذهبنا الى بلاد الواق واق، والمشكلة اننا زهدنا بالحسكي واللي حوله وصار مايسوى شي عندنا.
جاء الاسبوع الثاني اتصلنا به قلنا ودنا نروح واياك.
اعتذر لنا انه لن يذهب للبر هذا الاسبوع لارتباطه بشغل خاص.
الاسبوع التالي جتنا الاخبار انه طالع يصيد بالشمال ( عيال ديرة وحدة).
قلنا له عدة مرات وكان يعتذر مرة بلبقاقة ومرة بجلافة ، وعرفنا ان خوينا يمن بنفسه علينا .
المشكلة اننا ما ندل الارض ووجود هالشخص مطلب لاستمرار الرحلات لمناطق مانعرفها ، فنحن وقتها صغارسن وما ندبر انفسنا بالحيل . وصار بالموسم الواحد يتلطف علينا بطلعة او طلعتين ، وحنا ننتظر ونتمنى اننا نكون مثله أو قريبن منه.

ظهر القارمن في حياة الناس وصاروا يتناقلون اخباره ، وفي الحقيقة انني من غير المؤيدين ، لأن أبو صالح قال: ( لازم تعتمد على نفسك بالدلولة والا لن تتعلم علوم البر) .
أصغرنا ( هاني ) تنكر على افكار ابو صالح واشترى الجهاز وبعد فترة قصيرة جداً قال وين تبون نروح ؟؟؟
استهترنا به اول الامر وقال ياجماعة انا اوديكم الصمان والا الشمال بس عطوني فرصة اسبوعين اجيب احداثياتهن واتعلم على الجهاز ومالكم الا اللي يوديكم ويجيبكم سالمينن غانمين.
رحنا ولا اخفيكم اننا متخوفين ( لأننا طلعنا عن طوع ابو صالح) وغامرنا بالذهاب للصمان.
وبالفعل كانت رحلة مرينا خلالها فياض نسيت وشي بس المهم ان القارمن ودّانا وجابنا مع نفس الطريق.
استمرت الرحلات يم الصمان وصرنا نروح ونجي بيسر وسهولة واتجهنا في ايام الشتاء الى الشمال ووصلنا لينة ولوقة وزهوة ورفحاء وقيصومة فيحان .
وحتى عام 1418هـ سنة الربيع كنا شلة وحدة نروح ونجي جميع ، فجأة دخل علينا ابو صالح باستراحتنا اللي بالديرة وكان نادراً ما يجي الا بعزيمة وتلزيم ، لكن هالمرة هو جاء من نفسه. وحسينا انه جادع نفسه علينا .
قال وين تروحون ؟
أحدنا وبصوت خافت:
- شمال
- شمال وين ؟
- والله ما ندري لكن حنا نبي نطرد ورى الجوني .
- قال تراني خوي ن لكم .
وبرضه بصوت خافت
- الله يحييك.
لا أعلم مالذي غيرنا الى هذه الدرجة ،
هل هو أنانية فينا واستغناء عن خدماته؟
أم أن هذه ردة فعل على طريقته معنا ورفضه المستمر الخروج معنا ( يوم كنا بحاجته).
والغريب ان هالمشهد تكرر اكثر من مرة ، فمرة لقيناه سابقنا على الاستراحة قبل الاجازة الاسبوعين بيوم من شان ما تفوته الرحلة ومرة لقيناه بمحطة ام ارقيبة ينتظرنا وانضم وخاوانا للرحلة .
بالايام الأخيرة صار ابو صالح هذا لايعدو كونه فرد عادي ، حتى لو حاول فرد عضلاته علينا ( بالدلولة) وذكر المناطق البعيدة ، فبمجرد ذكره لإحدى المناطق يرد عليه هاني بسرعة ويقول ( هذي قريبة ورحنا لها العام او قبل العام).
وبدأ ينتابنا شعور غريب عندما يخرج معنا برحلة وهو انه لم يعد ذلك الشخص الذي يشع بريقاً ( برياً) عندما تجده يتكلم أمامك أو تتكلم أمامه.
بعدها قررت أشتري قارمن واضعه وقررت انه ما يفارق رحلاتي.
ذهبت الى دار موجة واشتريت جهاز بلص تو وكان توه طالع وجبته يم الشلة. ووضعته بينهم ، وبعد المباركة من الشلة سألني أحدهم :
- انت سميت الجهاز ؟
- نعم!
- وش سميته؟
- أبو صالـــــــــــــــــح !

النهــــــــايـــــــــــــة

[سحمان السبيعي]

احيك اخي القطار على هذا الموضوع الشيق الذي جعلتني اتخيل كل لقطة
فيه حتى اني احسست انه فلم ....... اخي الكريم اكتب الكثير لنا فنحن كلنا عيون
شاخصة للشاشة لقراءة المزيد.

بارك الله فيك قد تكون انت كاتب المنتدى استمر في سرد يومياتك لنا ففي اسلوبك الساخر
الراقي انت رائئئئئئئئئئئئئئئئئئئئئع .

[يعقوب الوهيب]

جعله قطار ما يوقف يا خلفهم
وقصة معبرة صحيح يا كثر السواقين والخريـتـين اللي انقطع رزقهم ومكانتهم مع القارمن .
وهي حال الناس مع كل علم يتعلمه الانسان ينبغي ان يتطور ويطور نفسه مع العلم والتقنية
والا فسوف يفوت عليه القطار
شكرا يا قطار

[محمد المعارك]

أولا حياك الله اخي الفاضل القطار في منتدى الرحلات
ونشكرك على التسجيل والمشاركة

من اولها قصة رائعة وهادفة وتقريباً تجري على كل الرحالين .... مع فوارق بسيطة .

التعليق ... خله لخشم الحصان ....... حيث انه ذهين بالحيل .

بارك الله فيك

[عبدالكريم اليوسف]

اخوي الغالي
بيض الله وجهك يالامير
على هذا السرد القصصي الجميل
ومرحباً بك بين اخوانك
والحقيقة انني اندهشت
من جمال وروعة الاسلوب
بارك الله فيك
اخوك

[ثامرالماضي]

بسم الله الرحمن الرحيم

يامال العافيه أخوي القطار ...

قصه رائعه وهادفه ... وفعلاً القارمن مهم بالحيل ... بس لابد أن تستغني عنه بعض الأحيان وتشغل راسك ...

مشكور وماقصرت ...

وننتظر المزيد ... من كل جديد ...

,,,,,,,,,,,,,,,,,,,,,,,,,,,,,,,,, تحياتي لك ,,,,,,,,,,,,,,,,,,,,,,,,,,,,,,,,,,,,,

[القطار]

أيّه الإخوة جميعاً
أرجو وأتمنى ان يسمى حرفي لمستوى ذوقكم العالي.
تشجيعكم يطير بي لأكتب وأكتب وأكتب بإذن الواحد الأحــد.
وما أنا إلا تلميـــــــــــــــــــــــــــــــــــــذ يتعلم من الكبار.
وفر التحية والود.

[راعي الشاص]

ألف شكر اخوي القطار
هل القصية صدق والا من تأليفك؟
لاهنت

[حامد الغامدي]

أخي القطار:
قصتك حلوه وفيها الكثير من العبر والمواقف اللي تزيد الأنسان خبره ودرايه بعلوم البر ومخاواة الرجال وفيها ايضا تقييم للشخص نفسه كيف يتعامل مع كذا رأي وانسان مثل أبو صالح، اتمنى لك التوفيق في رحلاتك القادمه ولا تحرمنا من سردك الممتع,


مهراس

[أبو مروان]

وعليكم السلام ورحمة الله وبركاته

مشكور أخي الغالي القطار على هذه القصة المعبر والمشوقة

فجزاك الله خير

المشاركة الأصلية كتبت بواسطة القطار

تشجيعكم يطير بي لأكتب وأكتب وأكتب بإذن الواحد الأحــد

ونحن

نقرأ ونقرأ ونقرأ ونشكر ونثني ونشجع

[القطار]

راعي الشاص وش توقع ؟ الا أذا انك سمعت قصة مشابهة
مهراس انت تدور حول الحمى ولكن در على الفرت لك شوي وتوصل ربعك
ابو مروان : تشجيعك ياريس يلزمن بتلبية الطلب .
كل الشكر والتقدير والود لكم