احلي قصائد المقناص ؟؟؟

[جلمود الثقفي]

يا موتري لا تضايق من مشــــاويري = يوم أن راعيك جا المغباش له عــــاده
مااظن يصلح يسوقك واحدٍ غيــــري = أصايدك من الحصا وأرفق بك زيــاده
جيب بدفعٍ رباعـــي نقلــــة القيـــري = ما ودك أنه يشوفه بعض حســـــــــاده
كم مرة في السهل نمشي مـــــداويري = وكم مرة قد مسكت طويق وشــــــداده
أحيان نسري وحينٍ نمشي اعصيري = واحيان قبل الفجر والناس هجّــــــــاده
يوم ان بعض العرب يهوى المصافيري = يجيه وقت الضحى والظهر في رقـاده
أهوى المغابيش قبل ايصوُت الطيري = يوم ان بعض الشباب يكبّر وســـــــاده
العين عافت لذيذ النـــــــــوم يا طيري=أبغى المقانيص يوم القنص لي عــــاده
معنا اشقرٍ ضربته للخرب تمــزيري = أفدغ وحرشٍ اكفوفه ويل من صــاده
مع هدّة الطير يذهب كل تفكيـــــــري = أنسى مماتي وكِنّ العمر بزيـــــــــــاده
يا زِين شوف الحباري بالمناظيــري = في خايعٍ مابعـــــــــــــد زاروه رُوّاده
ويازِين شوف العشاير و المظاهيري = لا روّحت مع رقاق الحزم منقــــــاده
يا ماحــــــــلا شرْبك لـــدرّ المباكيري =أخير من نيدوٍ به سكر زيـــــــــــــــاده
وماكول قرص الجمر مع تمرٍ وضيري = أحسن من البيتزا والشورمـــا زاده
وجذبك بدلوٍ به الماء من جبا البيري =أخير من ماي صحه وســـــــط برّاده
البر يســـــــوى مسلسل سالم الزيري = وأحلا من مشاهد الكوره مع استــــاده
شوف البراري ولا شوف المقاصيري = أو شوف نخلٍ ظمايا واجد عيـــــــاده
في روضةٍ غاديٍ للعشب تنــــــويري = يازِين شوف الخضار وزِين مقعـاده
معك نشاما مخاوينك منــــــــاعيري = رجّالهم منوة للقلب واسْعـــــــــــــــاده
حولك ادلالٍ بها البُنّ المباهيـــــــري = بهارها الهيل والمسمار هو اقنـــــــاده
أحسن ولا رفقة اربوع ٍ معاثيــــري = هرج القفا عندهم هو ثالث اعْيـــــــاده
أحباب وأصحاب بقلوب المثابيري = تضحك وهي لشذبة العرقوب معتاده
يقفونك الهرج بألسنةٍ مناشيـــــري = واحَدْهم إلى نصحته زاد في عْنــــــاده
هذاك كُبّه فلا به نفعٍ وخيـــــــري = ما يتّعظ في الكلام الزين وارشـــــــاده
نومك بجو خلا مافيه تكديــــــــري = يسوى الفنادق وقصرٍ قلَّوا أجــــواده
ما حولك ألا الطيور أم المناقيـــــري = امنفّضة ريشها للجـــــــــــــو رَوَّاده
ورزقك على اللي رزق لدباش والطيري = اللي فرض ركن حج البيت واجهاده
الرزق عند الولي رب المقاديــــري =اللي جعل للخلايق ذكر وعبـــــــــاده
وصلاة ربي عدد وبل الشخاتيــري = على نبي جعل يثرب هي بـــــــــلاده

قائل القصيده للاسف لم اعرفه

[عبدالكريم اليوسف]

ورزقك على اللي رزق لدباش والطيري=اللي فرض ركن حج البيـت واجهـاده
الرزق عنـد الولـي رب المقاديـري=اللي جعـل للخلايـق ذكـر وعبـاده

سبحانه
كل الشكر لك على هذا الاختيار
لاعدمناك يالامير

اخوك

[حمد الجبيرى]

اخي جلمود الثقفى الله يعطيك العافيه قصيةٍ طيبه مشكور

[ثامرالماضي]

سم الله الرحمن الرحيم

أخوي جلمود الثقفي ... حيالك الله يالغالي ...

أول مشاركه لك ... رائعه رائعه جداً... وننتظر باقي المشاركات ... والإبداعات ...

وصح لسان الشاعر على هذه الرائعه ماشاءالله تبارك الله ...

العين عافت لذيذ النـوم يـا طيـري *** أبغى المقانيص يوم القنص لي عـاده

الولع مصيبة ...

لاهنت أخوي جلمود وبارك الله فيك ...

وننتظر جديدك ...

,,,,,,,,,,,,,,,,,,,,,, تحياتي ,,,,,,,,,,,,,,,,,,,,,,,,,,

[ريع الدياب]

الغالى جلمود الثقفى
حياك الله فى منتدى الرحلات
بدايتك قوية ومدوية بالشعر الأصيل
القصيدة عن المقناص ولكن أيضا
أعجبنى أول أربع أبيات عن الموتر
جزاك الله خير

المشاركة الأصلية كتبت بواسطة جلمود الثقفي

يا موتري لا تضايق من مشــــاويري = يوم أن راعيك جا المغباش له عــــاده
مااظن يصلح يسوقك واحدٍ غيــــري = أصايدك من الحصا وأرفق بك زيــاده
جيب بدفعٍ رباعـــي نقلــــة القيـــري = ما ودك أنه يشوفه بعض حســـــــــاده
كم مرة في السهل نمشي مـــــداويري = وكم مرة قد مسكت طويق وشــــــداده

[Abdullah K. AL-Hassan]

وعليكم السلام ورحمة الله وبركاته

كل الشكر أخي جلمود

قصيدة رائعة

وصح لسانك ولسان قايلها

أخوكـ عبدالله