على الطاير (من يوم خذتك ماشفت خير)

[فهدالدوسري]

الاخوه الغالين
السلام عليكم

اخواني لاشك ان البعض منا يطلع الي البر حتي ولو في عز (طباخ التمر) القيظ وذلك لشي في نفسه الله يعلمه
وعند وصوله الي البر او الشعيب قام الحبيب ونزل العده من مجاميعوه واسفهل الحبيب هو والي معه لو تجي وتشتري منهم ذيك الجلسه بمال مابعوك لو تنقز
واذا جاء يوم الرجعه الي البيت ونزل العده من السياره للتشيك عليها او اي واحد في الدار نزلها مهيب المشكله في التنزيل العفش المشكله في مايحمله العفش!!
وش يحمل العفش ماتدري وش فيه ؟
لانك لاتعلم مامر علي عفشك وانت نايم او رايح تمشى او داله مع الربع وش الي دخل في شنطة العده او الفراش او اي شي حملته فربما دخلت عقرب او حيه لا قدر الله وانت غافل وعند تنزيل العفش في الليل
لكي تشيك عليه في الصباح
ولكن هذا الزائر الغير مرحب به قد يخرج من العدة الي البيت بدون اذن منك وغصب عليك.!!
طيب وش السواة معهم
هل نتصل علي شخص متخصص في صيد القوام والحيايا وقد حصلن لاحد الاخوان ذالك.
ومره وانا منسهل في المشراق في الحوش (المقدمة) والجيب قدامي والعده فيه
والي مزينها ان ذك اليوم تعيجزت عن تنزيل العده من السياره
وبدون مقدمة ولا هاك العقرب الصفراء يوم دبجة من السياره عينك عينك
افا يالله الخيره
ولا مازها الاخت احسب انها بتنكسر رجلها او بتعور ولا الاخت ماشيه ونهو له ؟؟
تبي تقضب الساس حق السور كان انقز وجيب هاك الزبيريه ورصعها !!!
ولكن ماش قمت اهوجس ودخلني الماء
ليا في الموتر شي ولايا من قبل في البيت شي ؟
وخذ هواجيس وهموم نتفت شعر راسي غدة الدمجه تقول سحلة منسفيه ياشين الهوجاس ياخوان الله ياهو يقلق الواحد ومع الهواجيس طرة علي فكره !!
تدورن وشي كان انقز لم الدكان وجيب 3 علب ريد من النوع الاصلي وابخ منداخل السياره بعد فتح شنطة العده ويا الفراش في وسط السياره واسكر القزاز واحط السياره تحت الشمس وانا مبعد بعيد عنها خوقتي تولع مع الحراره وتقب
ويوم جاء باسر وانا البس كنادر خلطة السميت ودسوس اللي بيشوفني بيقول الاخ عامل مناجم!!
تدرون وش لقيت ماتصدقون انوع الحشرات من خنافس
وعقربين غير الي ذبحتها وقبابين ومشاطت القامه غير الحشرات الطائره
كان انزل العده واحطها في السور واغطيها بشراع ازرق وارصه دار مدار ببلك واخليها في الشمس 3 ايام
لين تاكدت ان شاء الله معاد فيه شي

بلا خسارة درزن فليت

احسن من اتصال من العائله وانت برا البيت وخاصه اذا كانت ام العيال من النوع الراكد
(الو الو وانت ترد
السلام عليكم ..... نعم... ردت الحبيبه
اقول انهج ياربية الحق علينا شفنا في سطح الخزان ي
بنت الحلال وشفيك اركدي وعلميني وش السالفة ؟
وين تبيني اركد معه ماشفة لي انا شفته !!
وانت تحسب ان البيت فيه حرامي وثم تلقط روحك من العجله واذا دخلت البيت ورقيت لسطح الخزان وشفت الربع ولا كنهم يطيرون حمام
سلامات ،، وش الي حاصل ؟
ردت الحبيبه انت منتاب فاكنا من شرك انت وبرك يوم عقرب ويوم قامه ويوم خنفس تدري ودني بيت هلي معاد ني قاعده عندك ...
وتسمع الاسطوانة المكررة (من يوم خذتك ماشفنا خير)
هذا اذا فككم الله وما انقرص احد من اهل البيت
ادري ان البعض بيقول طريقك مهيب حل في عملية بخ السياره وحط العده في الشمس لمدة ثلاث ايام بعد البخ
بس وش الحل لأنكم خابرين ان بزرانا الي يحبون اي شي يشفونه يتحرك يلقطونه وين؟
على طول الي الفم
تخيل تدخل وتشوف خنفس او قبون في اثم بزرك او اي شي لأن الي يحبون الله يصلحهم مكانس البيت اذا فقدت شي تلقاه في بطنه
يعني مكاين شفط.

اخوكم
فهد الدوسري

[حمد الجبيرى]

اخوي ابو جراح كلام سليم والحل انك تحرص على التفتيش قبل التحميل ( واللى تقول من يوم اخذتك ما شفت خير والله ان ودك هي اللى تقرص جعلها ما تسلم)

[الشيخ قوقل]

بسم الله عليك يا أستاذ :: ــ عندما نأتي من البر سوي ً وانصرف بعدها لبيتي اتصل بي كي أكتل ما يزعجك لأنه من تخصصاتي


ولك في النصائح الطريفة أخي فهد والأفلام والقصص المرعبة وواضحة من شكل خطك لهذا الموضوع

ستر الله عليك وجعلك ذخراً لأبناءك







++++++++++++





++++++++++++










.
.

الكلام الصحيح


" قل لن يصيبنا الا ما كتب الله لنا هو مولانا وعلى الله فليتوكل المؤمنون "









.
.

[محمد المعارك]

اخي فهد
هذه المشاركة امتزجت فيها النصيحة بالفكاهة ... ولذا تابعت معك القصص لحظة بلحة ... فشكراً لك على هذا الإسلوب الجميل والرائع في إيصال المعلومة.

هناك الكثير من الإحتياطات التي يجب عملها وأهمها التوكل على الله.
فمثلاً لاتترك فراش البر مفتوح عند انتهائك منه فيجب إغلاقه جيداً .

أخوي الشاعر
روعتني بهالصور ... اللعب بالنار .. وخاصة ام جنيب خطر جداً ... وقانا الله وإياكم شرورها وسمومها.

بارك الله فيك.

[BASSAM]

جزاك الله خير يالغالي

نصيحه ممتازه وفي وقتها

بارك الله فيك

[ريع الدياب]

والله انك صادق يابوجراح

تتذكر يوم حكى لنا أبومروان عن الوزغة وايش سوت به؟

[عبدالحميد الحربي]

أبو جراح

الله يعطيك الصحة والعافية على هالنصيحة لأنها من أكبر المشاكل التي تواجهنا بعد الرجوع من الوناسة

ومن دون مايكون في العفش أي شيء !!!
ماتلاحظون إن العفش يصير ضرب 2 في حالة التنزيل
(( يامسهل يوم تشيل أغراضك ,,, وياكثر هالعفش وقت ماتنزلة بالمستودع ))