(((مكشات القوايل وبرادشاهي على هشيم الطلح))) .. سعود الراشد

[سعود الراشد]

اليوم هو الخميس التاسع من شهر رجب 1430 وهو أول يوم بعد انتهاء الاختبارات. كنا في بيات اجباري داخل المدينة التي تعج بالرايح والغادي في زحمة الناس وضوضاء المدينة والحر الشديد الذي أنهك قوانا . وبعد خمسة عشر يوم من العمل المتواصل خارج الدوام في الفترة المسائية أردت أن اكسر هذا الروتين في هذا الوقت وفي هذا الحر الشديد اشتقت لشوفت البر والشعبان والله إنها أحسن من المدينة بكثير.. بعد الفطور كنت احك راسي في يدي اليسرى وأتناول فنجال القهوة باليد اليمنى وأقـــــــــــــــول وين ألوجهه ياولد... أكيد ربعي ماراح يكشتون معي ودرجة الحرارة الساعة 10 صباحا 40 درجه مؤيه .. قمت الملم بعض أغراضي وكان هناك عيون تراقبني من احد زوايا الصالة باستغراب ودهشة وفجأة اسمع صوت ابني انس يقول وين يبه قلت البر ياولدي قال ابهالحر قلت ابهالحر .. قال يبه ليش ماتروح بالليل على شان البراد . قلت ياولدي الصقورماتكفخ الابالنهار والليل للبوم والخفافيش ياولدي
قال معك ماصدق انه ايخلص اختبار المتوسط قلت مشينا .. غادرنا بريده الساعة 11.30باتجاه الشماسيه وكانت النية شعيب الحسا وه بالمستوي
توكلنا على الله

قبل الوصول إلى الشماسيه مرينا على مشروع فاطمة اليحيا رحمها الله وادخلها فسيح جناته
وتقبل الله هذه الصدقة الجارية.. وتوصينا من المسجد وعبينا تانكي السيارة من الماء المفلتر

وانطلقنا باتجاه الشرق إلى الشماسيه

ومررنا بهذا الشارع الرائع المنظر مع آذان الظهر وكانت هذه اللقطة

وكان هدفنا بيير شعيب الحسا وه طبعا شي بالخاطر لازم اشرب من ألبير وآخذ منه ماء للشاهي والقهوة لأنه ماء سيل وبراده يسمر الرأس وكان هناك شرقا من البير بعض الكشاته يعني فيه ناس مثلنا ابلوا هيب القيض كاشتين

على طول وصلنا قمنا بتجميع الحطب المتساقط على الأرض من هشيم الطلح طبعا أجمل شي إننا توقد الحطب من نفس البيئة ألي كاشتين فيها وهذا أكيد كيف والا حطب الارطا والسمر موجود بالبيت صارله ثلاث سنوات

الصراحة لم أتوقع الجو بهذه الروعة الجميلة مثل مايقولون ابعز القوايل
كان الجو بالمدينه حار وبالبر جميل جداحيث هبت نسانيس باردة لطفت علينا الجو
وأترككم مع باقي الصور تتحدث وتترجم لكم ماتبقى من الرحلة

وجلسنا في شعيب الحسا وه حتى بعد صلاة العصر وتقهوينا وغادرنا
وفي الطريق قابلنا هالمخلوق سلمنا عليه وقلنا له ياحليلك اركب معنا

وفي الختام ارجو انكم تقبلتوا هذا الطرح المتواضع
وعلى الخير نلتقي
من مواضيعي
رحلتي الى نقوش ورموز اوثال
هنا

[الشيخ قوقل]

السلام عليكم ورحمة الله وبركاته

هلا بخوي سعود والحين عرفت وين أنت رايح آآآآآآآآآآه

طيب وراك مادقيت علي بالجوال يومك تقهوى وتحك راسك باليد اليسرى يعني قضوا ربعك
ياخي أنا فاضي وأدوّر الضبان لو تاصل درجة الحرارة 43647528 خاويتك

أسلوب ممازحة

على العموم الحمد لله على سلامتك ولا شك أن الأصحاب تختلف أطباعهم ومبادئهم فمنهم من يكون بياته صيفي ومنهم من يكون بياته في فصل الشتاء وكل شخص له ظروفه ولا يرتبط الرحّـــــــــــــــال القوي بأحد

دائماً انتظر منك الجديد ياراع المعاميل والبريق الحديد

موفق بإذن الله ... لك مني أجمل تحية .

.

.

[الضاحي]

وعليكم السلام ورحمة الله وبركاته

ما تلام يا اخوي سعود على الطلعة بعز القوايل وعلى قولتك القوايل والحر بالديرة ماهو بالبر

طلعة موفقة انت والاسد انس الله يخليه لك ويخليك له

وامتعتنا بالصور الجميلة خاصة صورة الشبة

[أبو مروان]

لك حق في هذا الشوق ، وهذا طبع كل رحال وهاوى للطلعات البرية شوق ومحبة لها وعدم الخضوع للجلسة والراحة

أمتعتنا بهذا التقرير

فجزاك الله خير

[Abdullah K. AL-Hassan]

وعليكم السلام ورحمة الله وبركاته

الغالي سعود

بارك الله فيك وجزاك الله كل خير

أمتعتنا معك بهذه الصور الجميلة

وأيام الصيف لابد من الطلعات الخفافية وتوسيع الصدر والبعد عن أجواء المدينة ومشاغلها

خالص الود والتقدير والمحبة

أخوكـــ عبدالله

[محمد المعارك]

اللي يحب البر مايستغني عنه بالشتاء او الصيف
لكن التأقلم مع الحر في هذه الأوقات أمر طبيعي وماهي الا لحظات حتى يرضى الانسان بواقع (( الحر الشديد)) وينبسط.

مشكور اخي سعود وامتعتنا بهذه الرحلة... وبودي ان تضع احداثية البئر لأني اول مرة اسمع عنها ..

بارك الله فيك.

[عروق المظهور]

وعليكم السلام ورحمة الله وبركاته ,

رحلة جميلة والذي زادها جمالا انها تحمل روح التحدي


وصدق من قال الحي يحيك

[ابو فراس]

سعود ما تخاف ان ينحتونك بعض الناس

والله بعض الناس يبي يقولون اكشفوا عليه لا يصير به جني بري مهب مدني

بس ما الومك تجين بعض الاحيان خمة ولو لحالي

المشاركة الأصلية كتبت بواسطة يوسف الخليفة

ناسن يقولون الخلا للمهابيل=يا حيف قولن ما عليه الدلايل
وش البلا قالوا سموم وغرابيل=حتى الهوا ثاير بروس النثايل
قلنا لهم يا ناس ما فيه تحليل=هذا ولع ما يرمى بالطبع مايل
باحساسنا حدر الطلاح المظاليل=مثل براد جنيف لفح القوايل
قالوا يجينا الذيب لعسعس الليل=واليا عوا يمكن بالانجاد صايل
قلنا لهم سرحان خاوا الرحاحيل=الذيب هتاشن بالاقفار جايل
اليا استلج بخالياتن مطاويل=نطرب لصوته مع صياح الثعايل
قالوا حيايا والعقارب مخاتيل=معها الخنافس والقعر والنمايل
قلنا لهم من يقرا بالورد ما نيل=فلا ينوشه في مساريه طايل
قالوا بعيدن ما يجي فيه كوكتيل=ولا نشوف الا النياق الهمايل
قلنا لهم مشروبنا البن بالهيل=على لهيب الرمث والدعب سايل
ومطعومنا صيد الجبل والغراميل=يا حلوها تسوا من الضان حايل
قالوا عديم من الكنب لرتخى الحيل=حتى السرير سليب هاي وظلايل
قلنا الكنب جرفن على جاله نقيل=والا السرير براس طعسن تهايل
قالوا ديارن ما بها قال مع قيل=ولا نشوف من المخاليق دايل
قلنا فضول الهرج ما فيه تفضيل=غير النميمه والمكر والحبايل
يكفي عزيف الريح بين الجناديل=والطير لغنا وابو فلان شايل
قالوا نريد سلومكم يا رجاجيل=اليا نزلتوا خاليات الدهايل
قلنا الكرم والخير ما فيه تمهيل=ومقدرين اهل الفعول الصمايل
وانريد حامل دين زين التماثيل=صميدعن مبداه طيب الفعايل
ونزرا على اللي بالخلا يلوي الذيل=مشاكس ربوعه سويد العمايل
قالوا خلصنا ما نقول المخابيل=الا رجالن من قروم القبايل
لاصارت علوم الخلا ما بها ميل=يسلم هواكم يا عيال الحمايل

( يوسف الخليفة )

[سليمان عبدالله]

شـكــ وبارك الله فيك ـــرا لك ... لك مني أجمل تحية .

[عبدالحميد الحربي]

أخي سعود
والله ماالومك (( ترى البر به وناسة مايعرفها إلا من يجربها ))

وسعت صدورنا الله يجزاك بالجنه

وشديت فينا العزيمة للخروج للبر بهذة الأوقات

رغم إنخفاض مؤشر العزيمة بسبب موجة الحر

سعود / شبة النار حركت فيني مشاعر الله العالم بها

[راعي ساموده]

والله ياسعود انك راع الاوله ,,,,,,,,,, ولا من يتخيل ان الشعيب بهالزين عز الصيف, لا وشبت الضو شي ثاني.
(تصدق انه طقت براسي اخت لحدى هالشعبان اجرب حظي) واغدين اخذ عبدالله مثل انس توه قاظي من اختبارات المتوسط .

[أبوخالد التويجري]

راعي الوله ما يرده شمس وسموم = شبـة النــار بعــز القيــض يحــلاله


الله يلوم اللي يلومك يالغالي

والبر ينومس راعيه حتى بعز القيض





ابوخالد

[عبدالكريم اليوسف]

لاعدمناك يالامير
والله يسعد قلبك
على هالصور الجميلة
عساك على القوة

اخوك

[محمد بن سيف]

السلام عليكم ورحمة الله وبركاته
مسكه حلوة بها القوايل الله يرجك هيضت الولد بعذره توه
مخلص من الاختبارات وزهقان .
شبت النار غير توسع الصدر.
يقول ابن عون:
هات الدلال وهات من نقع الاوداق"-" وقم شق يانياف للنار مشقوق
واروج تراي لشبة النار عشاق"-"لعلي اسلى عن غثا البال واروق
كود يتوسع خاطري عقب ماضاق"-" تراي اشوفه من ضحى اليوم مخنوق
نار سناها في دجا الليل شعاق "-"يجذب لها الحطاب من رمث ساحوق

رحله ومسكه من غير تخطيط احلى شيء.
لاهنت

[حمد الجبيرى]

البر بريره والغثاء بالديره صيف او شتاء - موفق بارك الله فيك