لو يعرفون غلاتهم !!!!!

[نبع الدموع]

بسم الله الرحمن الرحيم

السلام عليكم ورحمة الله وبركاته

هذا واحد من طيوري جير شياهين يوم جيت الطيور يوم الاربعاء لاقية عند الباب
يبي العلف و هد علي و ما غير يتولج بالطيور الي حولة و يلحقني يبي يعلف و خليتة اخر
واحد ربطتة بالارض و حطيتلة سمانة و طلعت و هذا المنظر الي لقيت يوم الخميس
الصباح و سمانتة جنبة ما علفها



وقتها استغفر الله صرت افكر و اقول ليت الطيور تتكلم و تعلمنا بعلتها
ولا وش قصرنا معها عشان يكون هذا ردة علينا.

[شيهانة بحرية]

يؤيؤيؤ والله منظر محزن قسم بالله
حسيت بشعوره وبشعورك
الله يعوضك باحسن منه

[سنافي نجد]

..



لا حول ولا قوة إلا بالله .. اللي الله كاتبه صار


والحمد لله على كل حال


الله يعوضك مثله او ازين إن شاء الله


..

[خالد الشريهي]

الله يعوضك اطيب منه اخوي

[محمد المعارك]

الله يخلف عليك طيرك هذا ويعوضك احسن منه.
واصبر واحتسب فإن في ذلك الأجر لك.

[خوي صقوره]

الله يعوض عليك
ويرزقك بخير منه يخوي

[مجبور]

السلام عليكم ورحمة الله وبركاته

الله يعوض عليك والطير أما يغدى أما يموت

قبل يومين طيري الفارسي مات بسبب النهيته

وهذة قصيدة لجدي رحمه الله وسائر المسلمين


الطير يافهاد غدا مني اليوم

بين الأديرع واللياح وخباريه

مانى باغناً هدته مير مقسوم

شيئاً يسويه الولي مانسويه

الله يعوضك بحسن منه وراح يجي طير ينسيك أياه

وتقبل مرور يعشق الطير حي وميت ...... مجبــــــــــــور

[الوافي عزام]

هلا ومرحبا بك يا نبع الدموع

والحمد لله على كل حال

والعوض بأطيب منه ان شاء الله

بالتوفيق يالغالي

[ثامرالماضي]

وعليكم السلام ورحمة الله وبركاته :

لاحول ولا قوة إلا بالله ...

الكل منا أخوي نبع الدموع يعرف غلا الطير عند صاحبة ...

يقول مشعل الحبيني ... عندما فارق طيره :

ما كان ودي ان المفارق فجوعي *** ليته موادعيني سوات المحبين

ولكن في آخر القصيدة قال :

ومما جرا يا حسين قلبي قنوعي *** لو كان عقبه خاطري صاير شين

هذا عندما ضايع الطير فكيف لومات

الحمد لله على كل حال ..

وأسأل الله العلي العظيم أن يعوّضك بالطير اللي ينومسك ...

,,,,,,,,,,,,,,,,,,,,,, تحياتي ,,,,,,,,,,,,,,,,,,,,,,,,

[نبع الدموع]

رحم الله والدينكم جميع و ابشركم يوم الاحد ثاني يوم كتبت فية الموضوع

رزقني الله بهالفرخ المزيون
ما شاء الله تبارك الله الراس كاشف, و طلعة ما يخطي , و السبوق الزين ,
الركادة لك عليها شوي ههههههه و به صيحة لاكن يا زينها من صيحة, و
مسرول ببامبرز ههههههههههههه

اذكروا الله



الله يحفظة و يخلية عز الله انة نساني الطيور كلها و وقت جاء حسيت ان الدنيا
ما تسوى لحظة زعل وحدة

[مجبور]

السلام عليكم ورحمة الله وبركاته

ياتربا بعزك ومبروك اللافي



ألف مبروووووووووووووووووووووك

[نبع الدموع]

الله يبارك فيك اخوي مجبور و الله يسلمك على هالمرور الجميل.

لا هنت

[يعقوب الوهيب]

الحمد لله على كل حال
ومبارك المولود
وجعله يتربى بعزك ،

[Abu Ibrahim]

الأخ الغالي
السلام عليكم ورحمة الله وبركاته
الف مبروك المولود الجديد

[جمعان الخثيمي]

معوض خير يا نبع الدومع..