بسم الله الرحمن الرحيم
حبيت أعرض لكم بالصور مثبت السرعة والبوصلة ودرجة الحرارة اللي ركبتهن في موتري الباترول 2002 فتك
ركبتهن عند فلب بورشة الفايز في السحابين اللي بجنب رياض الخبراء 3 كيلو فقط
قبل كل شي اتصلت في فلب 6 آلاف مرة 
كل أشوي أقول له لقيت كذا أجيب كذا وش باقي وشلون كيف ... ولا عنده مشكلة يرد ولا يتضايق منك أبد
حتى تأكدت ان كل أغراضي جاهزة وهي كالتالي
1- زر مثبت السرعة حق ماكسيما موديل 2003 سعره بعد الخصم من الحمراني 170 ريال
وللمعلومية هو نفس زر الباترول بس زر الباترول سعره قرابة 350 ريال والقطعة هي هي (لعبة الوكالات)
2- مراية يوكن من موديل 2000 وطالع بالوكالة غالية جدا 1500 ريال 
لكن تلقاها بالتشاليح مليانه وانتبه لابد انك تاخذ معها الفيش حقها وكذلك الحساس حق درجة الحرارة
أنا أخذتها من تشاليح الحاير بفيشها وحساسها بـ350 وقالوا لي ما نعطيك الفيش والحساس لأنها ظفيرة كاملة (ونفس السالفة حصلت مع أخونا بالمنتدى أبو مسفر وأنا استفدت من موضوعه جزاه الله خير)
قلت أجل ما أبي مرايتكم خلوها عندكم قالوا أجل خلاص بنعطيك الفيش والحساس
وقال لي الهندي ترا ما أحد يقص لك الفيش والحساس بأسلاكهن بس علشانك قلت إيه هين هاتهن بس , ولو كاسرتهم زيادة يمكن تاخذهن بـ300 وتراه أول تشليح بالحاير على اليمين قدام شيخ التشاليح
وبعدها اشتريت غرا بخمسة ريال من حقين قطع الغيار الأمريكي لتثبيت المراية بالقزازة
المهم رحت لفلب وحطيت موتري عنده من الساعة 8 الصباح وأخذته منه حول العشاء
وهذي الصور
ركب لي جهاز أمريكي في الكبوت للمثبت وهذا هو الأسود الكبير في وسط الصورة
وهذا الزر مثبت بالدركسون
وهذا الحساس حق الحرارة ورا الشبك
وهذي المراية تشتغل تمام
ملاحظة : شغل اليد لتركيب المثبت مع الجهاز 1400 ريال
وشغل اليد لتركيب المراية 200 ريال
المثبت يشتغل تمام مثل شد البلد ويولع لك لمبه خضرا في الطبلون إذا ثبت السرعة
أي سؤال أنا حاضر
ضروري
العرض العادي
