قصيده جميله اعجبتني( برق يويق )

salman_6666 · 23-10-10, 09:32 AM

السلام عليكم ورحمة الله وبركاته

بمناسبة الاجواء و تغيراتها للأفضل ان شاء الله وبعد تجلي موسم الصيف

اهديكم وانقل لكم هذا القصيده التي اعجبتني وعسى ان تعجبكم

بما تحويه من مواضيع متعدده

لاقـام خفاقـي يـتـل المعالـيـق
=====شاش وسبايـب شوشتـه واندهاشـه

برقٍ يويـق وياخـذ شـوي ويويـق
=====من فوق خط الارض يقبـس فلاشـه

وقمت اتشهل فـي علـو الشواهيـق
=====واخيـل بـراق الحيـا وارتهـاشـه

مشتـاق لـه ومعلـقٍ عنـه تعليـق
=====وشيءٍ يهاش وشي مقـوى هواشـه

الحر عـن شفـه تعوقـه مسابيـق
=====ويقيـد الرجـال مصـدر معـاشـه

وعودت مكتضٍ ضميري من الضيق
=====اصغي عـن النشـاد ماقبـل نقاشـه

للمجلـس اللـي مدهـلٍ للمطاليـق
=====مارمـدت نـاره وخيـم غطـاشـه

شبوبهـا سمـر رقـابـه مدانـيـق
=====هبط بـه الجـلاب والحـظ حاشـه

وفي جالها صفرٍ سـوات الغرانيـق
=====دنـق الخشـوم وسوطهنـه نشاشـه

مالقموها مـن رخيـص المساحيـق
=====الا يمانـيـا تـجــدع خـيـاشـه

فنجالها ينشط بـه البـال وان سيـق
===== فنجالهـا الثانـي يزيـد انتعـاشـه

شقرا شذاها مثل عطـر العشاشيـق
=====لامنهـم شالـوا غطـاوي غراشـه

يازيـن شفتهـا علـى فكـة الريـق
=====يوم الضعيّف منطـوي فـي فراشـه

شفي ولا ادري عن شفوف المخاليـق
=====وكل علـى شفـه ومشهـاة جاشـه

لاخطيت من ممشى الرياض المواريق
=====اللـي زهرهـا تـو حـوّم فراشـه

عـودت لدلالـي وحمـر الاباريـق
=====وجا للنوادر فـي سمـاي اغتواشـه

وبنيت قافن مـن جديـد الطواريـق
=====انقـا خيـاره واتخطـرى قشـاشـه

لعلـه يفـرق طــواري تفـريـق
=====وهم بنـاء بيـن المحانـي عشاشـه

والعبد ماله عـن نصيبـه مداريـق
=====يرضيه سيـل الحـظ والا رشاشـه

ولاأهل الوفاء قلطات وإلهـم مفاهيـق
=====ولاكل من هدّف علـى شـي ناشـه

اهم شي ابعد عـن اهـل التلافيـق
=====وزفر اللسان اللي عظامـه هشاشـه

اللي تزمـر لـه حلـوق المطافيـق
=====غادي وحطـوه الدراويـش شاشـه

لاهوب لايق لي ولانـي لـه اليـق
=====ولاطايع اللي قـال جامـل وماشـه

والثاني اللي يحـرق البـن تحريـق
=====لكـن فيـه مـن الدلاشـه دلاشــه

شين النباء لو يذبح الحيـل ويريـق
=====السمن فوق السمـن ماصـار باشـه

اله علي ان غـاب اصـد التفافيـق
=====اللـي لياقفـى يـبـون انتـواشـه

لوكان مارغب في مجيـه ولاطيـق
=====زاده وفي وجهه غضـب وانكماشـه

ترى الكرم يحتاج بعـض الملاحيـق
=====والضيف ماينصاك لجـل الاعاشـه

يبـي قبـول زيـن مافيـه تبريـق
=====ليّـن جنابـك والتملمـل تحـاشـه

والطيب وهبـه والمراجـل توافيـق
=====واخير خصله في الكريـم البشاشـه

**عبدالكريم اليوسف** · 23-10-10, 11:02 AM

وعليكم السلام ورحمة الله وبركاته

والعبد ماله عـن نصيبـه مداريـق
=====يرضيه سيـل الحـظ والا رشاشـه

الله عليك
اختيار جميل
بارك الله فيك
ويسعد لنا هالصباح

اخوك

حمد الجبيرى · 30-10-10, 11:08 PM

قصيده طيبه واختيار موفق بارك الله فيك

والطيب وهبـه والمراجـل توافيـق
=====واخير خصله في الكريـم البشاشـه

**ثامرالماضي** · 03-11-10, 10:05 AM

اقتباس:

المشاركة الأصلية كتبت بواسطة salman_6666

يازيـن شفتهـا علـى فكـة الريـق
=====يوم الضعيّف منطـوي فـي فراشـه

شفي ولا ادري عن شفوف المخاليـق
=====وكل علـى شفـه ومشهـاة جاشـه

.
.
.
.

والطيب وهبـه والمراجـل توافيـق
=====واخير خصله في الكريـم البشاشـه

الله الله الله عزالله إنها وافيه .. صح لسانك قايلها

أهنيك على ذائقتك الرائعه ولاهنت على نقلك وجعلك سالم وغانم يارب

وننتظر جديدك بشوق

,,,,,,,,,,,,,,, تحياتي ,,,,,,,,,,,,,,