لسلام عليكم ورحمة الله وبركاته
مع نسيم البراد والجو الرائع المبشر بقدوم الشتاء
احببت ان انزل هذا الموضوع لتجهيزاتي المتواضعة وعزبتي للطبخ والشاهي والقهوة
واتمنى من اخواني التفاعل بهذا الموضوع وابداء النقد الهادف والمشاركة بصور لتجهيزاتهم لكي نفيد ونستفيد
واحب ان اذكركم ان المؤمن اذا راى من اخية مايعجبه فل يقل (مشاء تبارك الله)
نبدا بسم الله بالصور
اولا صورة شاملة للعزبة
بعدين حبيت اوريكم تجهيزات الاضائة
هذي اللمبة حطيتها بهالمكان تحت الوطاية لي يكون غسيل المواعين سهل
وهذي صوره توضح لمبات الكبوت
بعدين نجي للكهرباء تم تجهيز السيارة ببطاريتين
وهذي افياش تم وضعها للشاحن وما شابه وتم وضع فيش اخر في الخلف حتى اتمكن من وضع الثلاجة بسرعة
وهذي صوورة توضح الونش بمقدمة السيارة
بعدين نجي للأدوات والعزب وهذي صورة لبعض الاغراض اللتي لاتخلو منها سيارة اي راعي مكاشيت وطلعات
وهي عبارة عن عيار هواء وسكين ومسن صغير وقداحة ومقص مفيد جداً للحم
بعدين نجي للعزبة الشاهي والطبخ
وهذي عزبة الطبخ وهي عبارة عن بريق فواح كبير وطاسة وعلبة بهارات وملح ومس واصياخ شوي وشبك ومركب ضو ومشخال وكاتم سب فرنسي وصحن استيل ابو رجلين تحت
بعدين نجي لعزبة الشاهي والقهوة
وهي عبارة عن شنطة فناجيل ذرا صغير دافور صغير سطل غسل فناجيل طاسة ماء صغيرة فواحة قهوة دلة قهوة ابريقين شاهي كبير وصغير شنطة سكر علبة ورق شاهي وقهوة وهيل ومسمار
وبعدين نجي للعدة
وهي عبارة عن ماطور هواء واير سحب كريك صغير بطارية صغير بعض المفكات المهمة
وما ننسى حبيب القلب قز البريموس الاصفر والدبة ونسيت اصورة للاسف
اتمنى يكون موضوعي نال على اعجابكم واتمنى من اخواني التفاعل
واذكركم بقول مشاء الله تبارك الله
ما شاء الله تبارك الرحمن .... لكن يد قدر الضغط السب مكسوره انتبه ممكن تسبب لك وقت شغل الكبسه اذى في اليد
من الصور يبدو ان السياره برادو ارجو تزويدي بانطباعك عنها من حيث مناسبة سعتها الداخليه و قوتها و تحملها للبر لانني من المعجبين بها واود استخدامها خاصه موديل 2009
غريبة يا اخوان ماعرفتو السيارة واضحه من مكينتها وديكورها ع العموم السيارة لاند كروزر والونش قمة في الروعة والاداء
ونبي تفاعل من الاخوان حتى نفيد ونستفيد