جاكم الشاعر يقول:
ليل الضحى في راس طعس ونيت@@@ ونة خلوجن غادين ظناها
وصبيت خمسة عشر فنجال وازريت @@ أثر الطعوس بينت لي خفاها
ويا ماحلا الفنجال مع سيحة البال @@@ وياكليب صب النار صبه
والله فاتت علي ماقلت هالشعر يوم أنا (براس الطعس) كان طبت علي قناة أبو ظبي تهايط بي بين القبايل وتلهط قروشهم بشاعر المليون .. أو قناة الساحة .. وشوي إلا أنا من ملاك المزاين أقول القسم ( اقسم بالله العظيم أن هذي نياقي ما لي شريك بها إلا عيالي){{ إذا كنت أخي القارئ سعيدا لا تتابع قناة الساحة فتجاوز هذا القسم)
ماعلينا .. نرجع لموضوعنا عن المزاين ( قال يعني حنا طلعنا منه ) .. اللي أقول وكني مغصوب التالي: أشوف بزيارتي الأخيرة الوضع يبي يزين بالمزاين ...لاني لقيت بعض (الأشياء الجميلة) موفرة في هذا التجمع المزايناتي .. شاهدت خدمات حطت رحالها في ربوع المهرجان السنوي متحدية عوامل التعرية الصحراوية مثل المطاعم والمواد الغذائية بأنواعها، والحلاقين والجزارين( وترى بالمزاين مافيه فرق كبير بين هالاثنين بالذات ).. وأنصحكم تاخذون لحيمة الحاشي من الديرة وإذا مصر الواحد منكم يحلق عليه باستخادم أدواته بعدما يتشطر بـ(راس طعس ).
وشفت أيضا الباعة المتجولين .. طبعا بدون رقابة.. أما عاد عشش البقالات هناك هذي عن نفسي ما أثق فيها خصوصا إذا شفت اللي يبيعون هالمواد الغذائية من الجنسية (إياها).. حسيت إن تاريخ صلاحيتها من سنة (راس طعس) إذا ماهو مزور.. يعني وراكم وراكم حريق بالبطحاء وحريق ببطونكم وأنتم بـ(راس طعس) بالمزاين .. أما سوء التخزين فهذا الله يعوق الشر حادث حادث .. ويمكن خلال فترة نقلها أصبحت سماً زعافا... وعلى طاري السم تذكرت المطاعم هناك وبجوار الجزارين اللي معلقين اللحم على جال حويش الغنم بالدمال اللي فيه والذبان تدودي عليه .. وين الرقابة يا ناس (اعقل بس .. حنا شفنا مراقبين البلدية بالديرة نشوفها بالبر (وعلى راس طعس).
أما من يريد أن يبحث عن مكان للمبيت أو الإستقرار (براس طعس) حول المزاينات فهذا موال طويل بطول عشرات الكيلومترات اللي ستقطعها بعيدا عن هالفوضى والمخلفات والأكياس التي تشك أنك في الدهنا وعلى أعتاب الصمان .. آآآآه.. يالصمان ياحبي لك حتى لو ما فيك (راس طعس).
وياخوفتي يجي يوم ينقلون المزاين لوسط الصمان.. هنا تصير الدعوى خراب في تخريب.
أقول: إلى أن آتيكم الاسبوع القادم من (راس الطعس) اللي بالمزاين .. أستودعكم الله.