جانا الوسم (تقضل ياذيب العرمة ) ولا يهونون الباقين

[ابونورة]

السلام عليكم

الله يرزقنا السيل ياكريم

قصيدة جانا الوسم لحامد الضبعان

ان شاء الله تحوز رضاكم

لحفظ القصيدة

http://abonoraah.googlepages.com/wasm.wmv


جانا الوسم يختال والديره غدت مثل العـروس *** باكر تبي تلبس من أزهــار الربيع ثيــابها

نبي نشوف رياضها اللي تاخذ العقل وتهــوس *** يـرقص نفلها مع خزامها و تفز أعشابــها

الله لا قــامت تفل الشــال مثل العيــطموس *** يــا كثر من ينشد عليها و يا كثر خطابــها

ياصاحبي والوقت يسرقنا و تشغلنا الهجوس *** دور لنا من أصحابنا اللي ما تخون أصحابها

نبي نعيد الذكريات بزحمة الوقت العبوس *** يوم النوايا البيض تفتح للقلوب أبوابها

خل ننسف الدنيا ورانا و المشاكل و الفلوس *** لين نتناسا هموم دنيانا وننسى أتعابــها

تل الدبل يا صاحبي تله ودوس الــدرب دوس *** جبها على ما نشتهي و النار من شبــابها

نبي ندوج بالفيافي و الخمايل و الطعــوس *** والأرض غدران و ريضان تفوح أطيــابها

نشرب من أنفاس السحاب ونجمع الورد ونحوس *** ونهيم بالصحرا و نستانس بطهر ترابها

يـــا صــاحبي نبي نهار ما يمل من الشمــوس *** نبي مكـان مــا مـشت به حضرها و أعرابــها

طق الخــيام بخايعٍ لاجيته يسر الــنفوس *** ياقف على جاله غدير من القطا و أســرابها

نجمع حطب ليل السوالف والقصايد والــدروس *** والغـــانمين علومهم نفخر بها ونـــزهى بها

ان شاء الله تعجبكم

في امان الله