لقيت الشاص مركوب و منظـر=خفيف الوزن و عزومه قويــه
على السكـــه كما الهملول إلى امطر=وبالصحـرا كمـــــا وحش بليـــــه
مهــوب إليـــا نطح عقــــم تدبـر=ولا رده شعيـــب أو ثنيــــــــــه
وسـواقــــه كريــمٍ مــا تكبـــــــر=على غيره عقب صفـــق برديـــه
نـــــخاه اللي بمكشاته تحســــر=ونشب مـــــويتره بالعكرشيــــه
تزهل له ورحب مـــا تعـــــــذر=وتلـــه تل دلــــو من ركيـــــــه
وذود العيـر لا سنــــد و حــــدر=لزوم الشــاص يبــرا للمطيــــه
عليه من الحمل طنين و أكثــــر=من أصناف العــزب الموسميـه
وللمقنـــاص شاص و لا تحير=ولا قد شيف بالمقناص زيــــه
ولا عنـــه و عــن الظبي المذير=بخبـــات الدهن و المهمهيـــــه
أشوف البعض بــالأقيام يغتـــر=ولا ينشد عن أفعــال و مزيـــه
وزود السعر للجهـــال مظهــــر=وصنع الفنس فــاق الجرمنيـــه
بعضهم يشري الموتر و يخســـر=إلى باعه عقب ممشى ضحويــه
وشاري الشــــاص شراي للأصفر=لبـوس و سلعــة بالســوق حيـــه
لانيبــــــه راعي نيــــاق ولا بــر=ولا صاحب دعــايــه أو بغيـــــه
وقول الحق مثل الصبح إلى اسفر=تشوف التلعــــه و قــاع الهبيـــه
ومن لا شــاور إبخيص تبغـــور=وطــــاح بسلعــــة قشراً رديـــه