شاهي على كيف كيفك

[ابو فراس]

السلام عليكم ورحمة الله وبركاته

استعدادا لموسم الرحلات والطلعات الخفافية نبي نأخذ ارائكم عن احسن شاهي واحسن طريقة لتصليحه

يالله همتكم بالاحباب

ورونا صنع اياديكم الخبيرة

[Abdullah K. AL-Hassan]

وعليكم السلام ورحمة الله وبركاته

هلا بالعمدة الغالي أبوفراس

الشاي الشاي !

اختلافات وامزجة .. تختلف من شخص إلى آخر

فالبعض يفضل الكيس على التلقيمة ... والبعض الآخر العكس

من ناحيتي أفضل التليقمة ( ربيع ) + ( الوزة )

وغير هذا اختلافات الأباريق ... صين .. معدن .. هندي .. كوري .. كلن وله مزاج بعد هههههه

وعن نفسي أفضل البريق الكوري والهندي جميعهم لهم طعم واحد .. وليس هناك أي اختلاف في طريقة عمل الشاي فيهم

وطريقتي ( البرية السريعة ) كالتالي :

البريق .. سواء الهندي أو الكوري الاصفر

يوضع به ماء حتى غليانه ..

ثم نضع بداخله السكر بقدر كافي ..

وبعدها بدقيقه يتم وضع مقدار كف اليد شاي تلقيمة ( بعد غسله وتسبيعه رويداً رويداً ) ... ( طبعأً لأحد يقول واجد ولا شوي ) ... كل واحد ويده وحجمه أنا m

فقط هذي طريقتي في الشاي .. وتختلف أن كان هناك أشخاص بهم مرض السكري

( اللهم أشفهم وجميع مرضى المسلمين )

يكون بدون سكر .. ويكون الوضع اختياري

..............


نأتي على الأباريق والأمازيج التي تختلف بين شخص وآخر

والصور الي تعدل الراس

1- الأبريق الكوري الأصفر من يد أبوشعلان

الصراحة شاي يصب في النخاع

( تراه أصفر .. بس هذي عمايل النار )






2- الأبريق الكوري المعروف لدى الجميع أبو راس

صورة من يد أحد الأخوان






3- الكوري المفلطح .. مالهن اسامي

وهذا احلته للتقاعد هذه السنة .. وبقى خويه إلين مالله يرزق لنا البريق الي بالبال








4- الأبريق الي ماعرفت اسمه والي طاحو به الشباب من قريب

ابريق يصب من الجهتين .. الي معجبني فيه فكرته

وهي أن هناك فتحتين له ...

الأولى : للشاي ويكون الشاي فيه ثقيل جداً جداً

الثانية : للماء ويوضع به الماء لتخفيفه حسب مزاجك

يعني تطلع وأنت مرتاح .. لاتفكر خفيف ولا ثقيل وأخوياك كل واحد يصب على مزاجه

والصورة خير برهان ...




5- الأبريق الهندي والمعروف دولياً وعالمياً

وهذي صورة له والحقيقة الهندي كل ماصغر كل ماكان طعمه أفضل

الله يجيب أيام الربيع والأمطار





...............

هنا أنتهينا من الأباريق .............

وأتمنى أنني أفدتكم يالغالي ولو بالقليل

محبكمــ عبدالله

[ابو فراس]

ابو نجم انا ما قلت عطنا موسوعة او محاضرة ما شاء الله عليك

او هذا الصيام وما يسوي

انا قصدي وشلون تسوي شاهيك بس اترك عنك اذواق الناس الثانين

يعني لو كنت لحالك وش لون تسوي الشاهي

[عبدالحميد الحربي]

أبو فراس /

وش رايك بالشاهي اللي بالملتقى ؟؟؟


إذا ما أعجبك لاترد ...........


هههههههههههههههههههه


أنا أفضل شاهي ربيع ذو العلبة الحديديه


(( مكتوب عليه .. عبىء في سريلانكا ))

هو أفضل من الربيع الكرتون الورق اللي مكتوب عليه

(( خلط وتعبئة مصنع أحمد محمد صالح باعشن .... جده ))

لأن الأول يعبأ بالمصنع والثاني سلمكم الله يجي فرط ويعبونه بجده

بس أول شيء بعد مايغلي الماء حط السكر ,, على ذوقك

وخله يغلي ,,,,, بعد ذلك حط الشاهي التلقيمه على دفعات

يعني مو كبسه واحده ... وخله يغلي ويقلب بالبراد وبعدين حطه جنب النار وخله يخدر (( يغلي على خفيف جداً ))

والله الله ....الله الله

على كاسات بادريق الأصليه

ترى الكيف حتى بالكاسات

(( ياكرهي للكاسات للمضلعه والملونه بالذهبي ))

أشوفها ماهي للكشاته ,,,,

وياسلام على البراد الهندي ... مثل اللي بعزبة العمده

وحتى البراد الأصفر (( بس الكوري ماهو الصيني ))

[ajalkam]

طبعا حنا الوحيدين اللي يصدر لنا اردى انواع الشواهي الله يديم النعمة ..
يرسلون لنا بواقي الشاهي .. شفت لا نقوة وشخلوة .. عطونا الحتات ..

لكن شاي لبتون الانقليزي ابو كرتون حمر كاتبين علية شاي الصباح أو (بريك فاست) شاي الشيووووخ ً والشيخ قوقل ابخص ..

بالنسبة للطريقة.. لا بغيت شاي يصمد الراس خله ينقع ..

ajalkam

[راعي الفكسار]

مرحبا بكم و بالعمده ابو فراس

انا لاصار مامعي احد ولحالي بالبر وياكثرها ما اطلع لحالي
ما افوح السكر ابد ، اذا فاح الماء وخرته عن الضو وحطيت شاهي ورق اما (شاهي ربيع او شاهي ابو جبل )<< هذا اللي انا استخدمه
واخليه حول الضو ليين يخدر ، واحط السكر وازوده شوي لاني ما فوحته وأرد عليه بياله او بيالتين ويطلع ياسلام يعدل مزاجك

اكتشفت ان الشاهي بدون تفويح السكر او غليانه يريحك من حموضه للمعده (حرقان) .
يعني تفويح السكر يسبب حموضة .

لكن لاصار معي شباب فوحت السكر وحطيت الشاهي ليين يخدر << تخبر لا صار معك احد وانت اللي تصلح الشاهي كل شوي يقول واحد يالله وين الشاهي _عجل علينا يبو فلان ... ومن هالكلام .

عاد علمنا وشلون تصلح شاهيك يا ابوفراس




... لكم مني أجمل تحية .

[راعي كيف]

السلام عليكم ورحمة الله وبركاته

1- الكيني
2- ابو جبل
3-الوزه
4-الممتاز
5- ربيع
6-هاي تي
......الخ

الطرق عديده منها المعروفه حمي الماء وحط السكر وبعدين الشاهي وخله الين يغلي
الثانيه بعد مايفوح الماء تصبه على السكر وتحرك السكر الين يذوب وبعدين تحط الشاهي خمس دقايق وخذلك قلبتين
الثالثه وهي الغريبه شوي لكنها فتاكه بمعنى الكلمه وجربوها ولن تندمو لكن لن يستطعمها إلا راعي الشاهي راعي المزاج ربمى لن تروق لبعض الناس لكن جربها حتماً ستعجبك
تفوح الماء وتجيبلك إبريق شاهي وتحط السكر والشاهي وتحمسهن مع بعض الين يتجانسن مع تحريك مستمر دون توقف لين تشوف السكر مسك ورق الشاهي بعدين تسكب الماء المغلي على السكر المذاب بالشاهي وتخليه يقلب كم قلبه مع تحريك مستمر الين يذوب السكر وتخليه بعيد عن النار من 3 الى 5 دقايق وخذلك بياله والله إن تدعيلي ( وهذا الشاهي اللي يلعن على قوله واحد من الشباب )

والطرق عدّه وهذا اللي عندي .

راعي كيف
ابو ناصر

[أبوخالد التويجري]

هلابك ابوفراس


احس ابونجم احبط

انواااع الرد عليك ههههههههه

ياحول والله ياهو إنمحن اصابعه من كثر ماكتب بس خله هذا اللي عجل ولا يقرى الموضوع زين << وراه قلب .!؟



الشاهي برأيي نوعين فقط وفقط لا غير ( ابوجبل , الربيع ... وبعده خذ يا شيخ ليبتون خلاص ما عاد ينفع << يسمع بالكيف )


والطريقة نوعين .. اول بريق يبي يروح وطي في ثانيتين لأن الربع شفقين ع الشاهي

لذا تحط ماء لين يفوح وبعدها تحط السكر وتجلس دقيقة وبعدها تحط التلقيمه وتخليه يقلب له شوي وبسم الله بس لا يجلس اكثر من خمس دقايق لأنه يبي يعقد

والبريق الثاني اللي عادةً يطول ما يخلص يعني ع السعه كل شوي صاب لك بياله


تحط في البريق السكر والشاهي بدون ماء ... ثم تجيب لك ماء من الفواح وهو يصيح من حر مايوجس وتصب فيه ربع البريق وتحرك البريق عشان يختلط السكر زين ثم تغلق البريق زين من الفواح وتبعده شوي عن الضوية عشان ما تقرصه ويعقد اهم شي لا يبرد واتركه ربع ساعة وبإذن الله 5 ساعات ولا احلى



لاهنت يابوفراس وانا اشهد إن ابوفهد راعي كيف بعد شاهيه اللي بالملتقى ماشاء الله عليه


ابوخالد

[االجباب]

افضل شاي عندي هو شاي ( رد ليبل ) بروك بونت وهو شاهي هندي علبته حمراء

الي بيجربة وخاصة التلقيمة بيدعيلي والطريقة تنفع معه كل الطرق الي قالوها الاخوان













تحياتي للجميع

[الشمري الأردني]

الله عليك يا بو فراس طلع نص شباب المنتدى مندوبي مبيعات شركات الشاي و الأباريق. أحسن شاي تعمله في البر على نار حطب الفرس و العجرم و لا سويته على نار شيح عيونك يمتلن دخان و الشاي بعده ما سار. بالأردن و خصوصآ أحنا أهل الباديه عندنا شاي الغزالين شاي الشياب و اللي يحب يمخمخ بعد رحلة قنص أو حفر دفائن ما له غير شاي الغزالين. يعدل المخ و يحرك بستونات الماتور.

[ابو عبدالعزيزز]

موضوع حلو

الشاهي نفس

يعني يرجع للي يصلحه

عن نفسي

شاهي الضو

افوح الماء واخليه دقيقتين يفوح وبعدها اضيف السكر واخليه يقلب كم قلبه الين يذوب ثم ابعده عن الضو شوي واضيف الشاهي واخليه يقلب من بعيد والفوح يكون من جهة الضو على الخفبف ولايطول الفوح يعني قلبتين ومن بعدها يبدا الورق يسقط في قاع البريق

عند سقوط الورق بقاع الريق يبداء الصب لان الشاهي دخل مرحلة الخدران ولو خليته في حدود ال10 دقايق بعد سقوط الورق يكون افضل


ومن الافضل ان يكون البريق بعد ذالك الى جانب كم جمره بعيد عن الضو(نسبيا) علشان مايبرد وفي نفس الوقت مايفوح ويقلب لانه اذا كان جوار الضو مباشره راح يقلب ولو ببطئ ويغير طعم الشاهي بسرعه


افضل شاهي الربيع وخاصه العلبه المعدنيه لان ورقها كبار ونخب اول واذا خدر وتفلل في البريق يصير شكله كنه ورق جرايد من الكبر

وابو جبل فيه ميزه للي يستخدمه وهي عدم تغير لونه بسرعه يعني مايثقل ويصير اسود ومر في تالي البريق

والبريق هو الكوري الاصفر لانه مايهجر بسرعه وعندي كل مقاساته ومن عرفته معد استخدم غيره


شكرا ياصاحب الموضوع

[الشيخ قوقل]

وعليكم السلام ورحمة الله وبركاته

الشاهي الزين مثل اللي انت تسوّيه يالعمدة
جزيل الشكر على إثارة المواهب

دمت لنا ذخر

[الفارس نت]

انا بشاهي لي مزاج عندي في عزبتي بريقي المفضل في الرحلة الي هو بريق العزبة الصفر اول شي اغسل البريق لين ينضف ثم اعبية ماء ثم احط الورق شاهي وسكر ثم احطة على انار اخلية شوي لين يغلي والسكر احط فية شوي ماكثر

[محمد العبدالسلام]

يا ابو فراس كل شاهي مقبول بس بشرط لا يكون في زمزميه

[PAJERO]

الشاهي ابو جبل
الابريق الاستيل او الغضار