أحــــــــــــــلا طلعه بريه وأحلا تخيـيـــــــــم

[طليحه ام ذيب]

أحــــــــــــــلا طلعه بريه وأحلا تخيـيـــــــــم

في يوم ما وفي مرة من المرارير .. وفي عام 1424 .. عزّمنا نطلع للبر ..طبعا عندنا أبوي إدماااان بر .. الله لايوريك .. كل إجازة كل عيد لازم بر،، يموت عالبر.. تعرفون راعي صيد مثل خوالي بالضبط ( ترى مواصفات أبوي عكس لاتندمجون)بالعربي : بابي يكره شي اسمه بر ,,دايم مشغول بإيش مدري؟ ...

المهم .... قررنا نخاوي خوالي في طلعتهم البرية (هذا في أيام الربيع .. عيد الأضحى اللي فات) قال ايش قال نخيم !!
وماحمّسنا للروحه إلا بنات خوالي انواع التعذيب (تذكرين ذيك الطلعه وناااااااسه ,مطر وخضرة خيال ..ويازين الروضه ذيك ...الخ)
والله حفظنا أسماء البراري من دون لا نشوفها...روضة خريم ,الصمان ,ام المصران,ام رقييبه,أم الجماجم,ام المصارعه والهوشات)
حتى المصطلحات المستخدمة في البر :
(دحل,فيضه,روضه) (Kenwood.. ايكوم ..قارمن)

وبدينا نقنع أبوي .. ومد وجزر وياه ومد وجزر(وخيار وفواكه) مع أبوي .. وحنا وياه ليــــــــــــن رضا .. وطلعت الموافقة ولله الحمد وصدر القرار الملكي إن الطلعة صارت ok!!
وبدأت تنهال المكالمات.. وتنهمر التبريكات وصار جوالي يدّهر مكالمات ورسايل (عالبركه!!) (1000مبروووووك عقبال العرس يا رب) (بشري طليحه ابوكم رضا؟؟)(صدق صارت طلعتكم ok؟؟) ....الخ
لين قفلت جوالي تعبت وانا أقول :الله يبارك فيك قولي مشاالله ,الله يبارك فيك قولي مشاالله(تبون الصراحه خفت تجينا عيييييييييييييييين؟!)
وانا طول اليوم امشي واقرا آية الكرسي أخاف يجينا شي بالطريق!!

طبعا الطلعة بعد أسبوعين انشاالله ..يمديكم؟! وبدا تجهيز(عروس ما شاالله)
الموافقة من أبوي..... والتجهيز علينا!!

وكل يوم وحنا بمحل.. وما بقى مكان رحلات ما رحنا له (السنيــدي والعليان)..وما بقى سوق ما رحنا..وما بقى أبو ريالين ما رحنا (تعرفون الموقع الأخير فرض واجب ينزار لكل رحلة أو سفره)
أبو ريالين =<< كل ما يحتاجه المرء تحت سقف واحد.

المهم جهزنا أغراضنا (سليباقات بمعدل 10سليب باق)عدة الفطور والغدا البلعه بالعربي(حليب,شاهي,رز بهارات كاسات ملاعق بلاستك )اللي تبوووون.........أصلا مطبخنا فضا ما بقى فيه شي ...صرت بالأخير..افكك الدواليب أبي شي نسيناه ما لقيت!!
طبعا الأخوات السبعة الجميلات كل وحده تبدع في اختيار أغراض المؤونه..كل وحده تحاول تطلع شي جديد ما جا عالبال ((حتى يكون لها قصب السبق في الاختراع الرهيب !!))
مشط ..ترد الثانيه : تريكات (كشافات) وثالثه فرشة اسنان ,, مصحف ,, نظارات شمسيه ومظلات .. واقي الشمس وفازلين بنادول و فيفادول <<(أمي الله يخليها لنا ...الصيدليه حقتها)
باختصار..ما بقا شي بالبيت ما أخذناه .. حتى اللي ما يؤخذ ولا يستعمل أخذناه.
ولا زم ما ننسا مؤنة الحلويات ..



* * *

طبعا بدأ الطفيليون في الانضمام إلى ركبنا الجميل,وانضم إلينا البقرات الثلاث قصدي بنات خالاتي الثلاث (قال ايش قال جمعة بنات ووناسه!!) ,واتصلت اختي الكبيره وهي تصيح : أنا أتمنى أروح معكم , لكن أنا محتاره-او تسوي نفسها محتاره- أين تضع شيخة العشيرة بنتها ؟؟ طبعا العائلة الكريمة فزعت كلها .. وحلفوا أنها تنضم إلينا هي وصفارة الإنذار بنتها .. وبصوت وااحد : الضيق بالأنفس!!!
أنا أحتاج أرجع للقاموس عشان افهم معنا: الضيق بالأنفس !! يعني يركب الواحد وعشرين نفر أو أكثر في ثلاث طبقات ويقولون :الحمد الله السيارة وسيعه,والله إن الجمس زينه مهما تملا فيها ما تقول شي !

وجا اليوم الموعود..

طبعا من الفرحة مواصلين...يومين يا عمري ما نمنا (سهرانين جدا )
وركبنا في السياره الساعة 12 ظهرا .. قال ايش قال الفجر بنمشي ..يعني كعادة كل عائله إذا قالت الفجر يعني بتمشي الظهر , وذا قالت العصر يعني آخر الليل بتمشي ..
وركبنا الأغراض ..وتم تربيط السيارات ... عائله واحده طلع تحميلها سيارتين !!( جمس وهايلوكس) .. وركبت العائلة المحترمة ..

طبعا أبوي تفاجأ ..!! كل بنت معها شنطه ياكبرها ..تخرّع وش هذا ؟؟! وبدأ بالتفتيش ..كل وحده تركب لا زم مطلع نص اللي بشنطتها (كان من ضمن الأغراض الممنوعة أو المحظورة التي تمت مصادرتها : بلاي ستيشن ==> أخواتي الصغار , قصص وروايات ==>أخواتي المثقفات )
وجا دوري ... طلع أبوي شي خطير .. بغيت أكنسل الروحه عشانه ..ليه يا يبه ؟ طلع اللاب توب حقي وخلاه بالبيت !!!! (كان ودي آخذه معاي عشان اكتب في منتدانا المبدع يومياتي ,, واعلمكم عن كل يوم قضيته في البر مع الخرفان والبعارين )

وشغل أبوي السيارة ولله الحمد .. تعرفون صوت الطرّاد حق الجمس..بدأ يعج في أنحاء البيت مودعا جدرانه !!
أمي : عساكم ما نسيتوا اسطوانة الغاز ههههههه لقد نسيناه .. يالذكائنا !! شلون نطبخ ما ادري؟
ركبناه بعد ما نزلنا نص العفش (الأغراض) , قال ترتيب قال .. وفكينا الكراج (افتح يا سمسم على غفله !!) وطلعت السياره .. كل وحده الكشره ماليه وجهها .. وأحس الخشش لا توصف من ورى الغطا ( دايم احمد ربي إننا نتغطى عشان ما تطلع الفضايح والوجوه المعبّره .. الضحكات اللي ماليه الوجه من الفرح)

ومشينا على بركة الله بعد إلحاح بالسرعه .. عشان ما نتذكر شي ثاني ..لأننا كلما قعدنا طلع الإبداع !! وها نحن نمشي .. وجا اقتراح خطير من أختي الصغيرة العصفورة يمه .. ليش ما نسحب البيت معنا؟؟) خوووش اقتراح؟! هذا اللي باقي عشان ما ننسى شي !!وعاد بنات خالتي ما صدقوا .. أصلا من الصبح وهم ضحك و تطنز : تحسون ناااااس عمرهم ماطلعوا بر –لا ياشيخه احمدي ربك ضافينك بالسياره –

مشينا ووجهتنا لأم المصارين ما ادري أم المصران ..

وحنا بنص الطريق .. وبدأت تظلم الدنيا ..

مشينا ساعتين تقريبا, وتعدينا الرماح ومرينا على شويه مابينا وبين المخيم شي..وأبوي الله يطول بعمره طووول الطريق معصب كاره الروحه هذي !!!

لبقنا في أمان الله نصلي المغرب .. وفجأة ..اكتشفنا إننا نسينا شي خطييير؟؟


اتحداكم وشو ؟؟
.
.
.
.
.
.
توقعــــــــــوا ؟؟

.

.

.

.


.
نسينا (( الخيمه )) بكبرها !!!!!!!!!!!



ههههههههههههههاااااي .. وين بننام مدري؟! وين بنسكن مدري ؟! (الظاهر اللي ما ركب الخيمه يحسب في فنادق بالبر)
أبوي :الشرهه موعليكم عاللي يوديكم للبر ؟!! قال تخييم قال .. انتم مو وجه بر ..(شكيت أنا بنفسي هو الغلط علينا ولا عليه ؟؟؟؟؟؟ يا حرااام حنا البنات دائما انواع التحطيم , كأن البر مكتوب للرجال فقط .. وحنا ما لنا رب ؟؟ )
تهئ تهئ .. تهؤ تهؤ ............ (وجه يبــتسي)


وبالأخير ....
رجعنا إلى قواعدنا خائبين.. رجعنا لبيتنا الجميل .. آآآآآه .. وكانت أحـــــلا طلعة برية.. وأحــــــلا تخييم ....................... ودمتم سالمييييييين


واسفه عالإطاله .... وعسى اعجبتكم رحلتنا !!

(طبعا القصه 70% حقيقه .. وابشركم عشان ماتضيق صدوركم حيل من بكره رحنا للصمان أصلا مانزلنا العفش من الصياره)

[عبدالكريم اليوسف]

الحمد لله على سلامتك اختى
ومن طول الغيبات جاب الجرابيع

الحمد لله اذا عوضت الرحله فلا باس
اسلوب جميل في الطرح

وعساك على القوة

اخوك

[ثامرالماضي]

بسم الله الرحمن الرحيم

أختي الغالية إم ذيب ... عليكم طلعة ... قسم بالله أقراء القصة وأنا أتخيل الجمس حق طاش ما طاش ههههههههههههههه

والله يحفظكم من العين

أهم شي إنكم طلعتوا وإستانستوا ... والصراحة الحريم طلعة وحدة يسولفون فيها أربع سنين ... عشان كذا طلعة وحدة تكفيهم ...ههههههه

وعموماً مشكورة على هالإسلوب اللي قطع تسبدي من الضحك ... وعلى هالسرد الرائعة ... ولكن الصور تبقى هي الأساس ..

وننتظر المزيد ... من كل جديد ...

,,,,,,,,,,,,,,,,,,,,,,,,,,,,,,,,,,,,,,,,, تحياتي لك ,,,,,,,,,,,,,,,,,,,,,,,,,,,,,,,,,,,,,,,,,

[ولد نجد]

الحمد لله على سلامتكم
من رأيي انكم تطلعون عصرية وتخب عليكم ... تبلعون لكم كم بسكوت مع ببسي وتردون احسن لكم من وجع الرأس
ومشكورة على التقرير الكتابي الجميل

[محمد الديحاني]

اولا الحمد لله على السلامة والله طلعه احسدكم عليها

وانا "متنح" ومتابع القصة وقلت هذا والله النشميات والنشاماء تجهيز واترتيب واخرتها الخيمة يفتح الله"""بس اختي اقولش شي هذي بكل بساطة عين وحدة من ربعكم


الجايات اكثر وخيرها بغيرها

[بن سعيد]

اختي طليحه/ يعطيك العافيه على هذا الطرح والاسلوب الرائع
وما عقب نسيان الخيمة شي خيرها في غيرها اختى
اخوك
.................... بن سعيــــــــــــــــــــد.....................

[طليحه ام ذيب]

اعزائي المارين بموضوعي ....

شكرا عالمرور ...

أولا ترا ذي السالفه مر عليها 4سنين وكانت اول تخييم لنا في البران وفيها من المبالغه الشئ الكثير
ولايخفى عليكم المواقف التي تحصل في اول طلعه ..
وابشركم صرنا نمون عالبر وصار بيننا عيش وملح وبعران وخيام وتعودنا عليه وتعود علينا وتطورنا ..
وابوي صار يتحمس يطلعنا مع انه الى الحين وده يعرف المتعه اللي نشوفها في البر ؟؟!!!

تحياتي الكم ..

بنتكم

طلوحه

[سهيل]

اختي ام ذيب


صراحة يوم شفتي هاذي الصورة




قلت طالعين على احد الشواطي مهيب كشته

مشكوره اختي