نبي موقف صارلك بالبر ولايمكن تنساه ؟

[عبدالرحمن المحلاوي]

الله يستر عليك يابو عبدالله .. ولا يوريك مكروه .. في نفسك .. ولا من تحب


ياشين بعض الناس لا تحمس .. يجيب الطااااااااعة


قصة عجيبة جدا .. وما قصرت .. الله لا يعيدها ذيك الطلعة

.
.
..
.
.

[ودي اكشت دايم]

قهرررر وقسم مجهزتن ردن ياطوله ..

خلاص اوب راده <<تكفيييين

لا والله الموضوع روعه والقصص والمواقف اروع

بس الصراحه حق السفينه بطل مغوار اكتشفت انه اقوى شي الله يحفظه ماشالله

موضوع روعه وممتع

[راعي ساموده]

المشاركة الأصلية كتبت بواسطة ابو سعد الرويس

مره من المرااريت كنا كاشتين لرروضه الخفس

ربيع وامطار وخير

كنا سيارتين جيب وهاايلكس وكنا مخططين نجلس ليلتين

نبي نفلها ربيع وخير ولله الحمد والله يرزقنا بالخير

طقينا الخيمه ونزلنا العربه وشعمنا النار جلسنا اول ليله

ولا اروع منها وخص لكان في حليب زنجبيل مع المغربيه وخر عني

اللمهم راعي الهيلوا اليوم الثاني جاااه ظرف وقال ابي امشي الليله ياولد

حاول يمين ويساار قال مره عندي شغل مع الوالد طيب كان علمتنا قبل هذا والله القهر

قلت انا والله ما نسير الليله نبي نفلها الليله والخيمه ننطلها في ظهر الجيب

وخوينا سعد جااي من الشرقيه وقال ابجيكم لو هي ليله قلنا مالنا مرواااح الليله

الرجال بيجنا ونبي نسمر تحت نوور القمر

اللمهم واعدنا سعد عند خزاام رحت انا على الجيب ومعي ابو ضيف الله

وراعي الهايلكس قدامنا اخذنا سعد حوول المغرب ربعنا في الخيمه لا نوور ولا مووتر

علنا بنرجع بدري لهم وما درور انهم بيلطعوون في ذا الليل القاارص

المهم وجهنا لربعنا والخفس في روضتين وحده على الخط وحده داااخل شوي

والله يوم فرقت يمين ويفترم رااسي وكثرة على الكلام هذا يمين وانا اقول يساار وكم مخيم طحنا فيه ياولد

وين نرووح لا يوم صكت الدنيا في وجهي ربعنا في خيمتهم لا نوور لا سيااره ولا حس

ولا معنا اي وسيلة اتصاال هذا والله النشبه

يمين يساار ولا وصلنا عندهم الا الساعه 12 في الليل

المهم ونتعشى عشاء خفيف وهي النومه والصبح رجعنا لريااض

لاحوووووووووووول ياشين الضيعه بالبر ؟ لا وبليل بعد
أنا بالبر ماعندك احد مامن دلوله يعني انسى يقولونلي رح جب ولا ود عارفين اني مانيب راجع ههههه
يعني انواع التبطح

[قصيمي عاشق تبوك]

السلام عليكم ورحمه الله وبركاته من اصعب الاشياء الي مرت علي بالبر هو اني مره كنت انا وواحد من

الشباب طالعين للصمان من جهه ام الجماجم فلما دخلنا البر وتعرفون بدايته حجره وتشق الكفر حصاه

ونقعد يمكن ثلاث ساعات نفك الكفر لان فيه صاموله ماسكه اكليوم ماتفتح وفكينيها ورجعنا علشان نشتري

كفر على اساس الاول انشق ما ينترقع ولا نحصل كفر الا بالحفر وحنا كنا داخلين الساعه 6 المغرب وحصلنا

الكفر الساعه 11 المهم ماياسنا رجعنا للصمان مره ثانيه ولا وصلنا نقطتنا الي نبيها الى الساعه 5 الفجر

صلينا ونمنا 3 ساعات وقمنا وكان لنا لقاء مع جيش من الذبان الله يكرمكم وهذي اعتبرها من احلى الاشياء

الي حصلت لي اذا تذكرتها ... وشكرا راعي ساموده على الموضوع الحلو وبالتوفيق للجميع.

[وراط]

السلام عليكم اخوي راعي سامودة مشكووووووووووور على هالموضوع
مرة من المرات امطرت علينا في ثادق كل الصبح و هي تمطر مطر طيب ... الله يغيثنا
يوم جا عقب الظهر قلت لاخوي تخاويني ؟؟؟ قال وييين قلت ما بدهاش نبي نشوف الشعبان
وش مشى منهن و خابرن لك محل تبي تشوف فيه انواع الشلالات
قال لي قدام
و الله و اشغل الددسن و ايمم وجهي نحو غار مصيدير <<< تجلس فيه تشوف انواع الشلالات يالله من فضلك
يوم انتصفنا في الخط و هي تهل علينا تقل شق من السماء لا اله الا الله
انا ماسكن سكة قوية بس كلها طين الموتر ما قوى يمشي معها و اتشطر عنها شوي
الا يوم هبك وجه الموتر يالله الخيره
و نحاول فيه يجي ساعة و المطر كل ماله يزيد و حنا في وسط شعيب .... يالله سترك
الحمد لله كان فيه شبكة و ادق على اخوي و يجي يتلنا بالجيب
قال لنا انتم منتب كفو طلعات روحوا بس للبيت
حنا طمنا روسنا و قلنا ما يخالف
لكن الحمد لله رحنا وشفنا هاك الشلالات اللي عمري ما شفت زيها
ونطلع معودين يوم مسكنا الخط و يدق اخوي اللي طلعنا يقول نشبت هيتوا طلعوووووووني و انا اضحك عليييييييه قلت دور غيرنا هماك تقول منتب كفو
الضعيف نشب في هاك الشعيب الين دخل الماء عليه في الموتر و بغى يقلب موتره وهو يزبن الضلع يالله امداه
عقب ما خف المطر رحنا وطلعناه .......
الفائدة من هالقصة
لا تطلع من بيتك و هي تمطر مهب ضارك الا صبرت شوي.......
و سلامتكم

[حمد الجبيرى]

عام 1412ه طلعت انا واحد من الربع على جيب شاص ابو شنب 84لدهنا وقت براد ونمرح فى هاك النقره ويوم اصبحنا وعينا من الله خير اجى ابا اشغل الموتر الا ما حولك احد لا حيات لمن تنادى ولا وفى هال النقره لاتقدر تدف وتنتع ولاغيره احول منا ومنا مافيه حيله وتوفيق من الله انى توى قارى فى كتاب عن الصحرا لظابط فى الحرس الوطنى اسمه الشريف بانونه انه فيى هذه الحاله تقدر ترفع واحد من الكفرات الخلفيه و تبرم الكفر تد يره وتعد كل دوره من و1 الى 15 ثم تقول الخويك ينتع الموتر تمت التجربه بنجاح ولله الحمد والمنه

[هزيم الرعد]

سنة القاز
إيه
قبل سنوات عديدة ...ومديدة ...كنا مخيمين في البر ...عائلة تحب البر ..ومتفاهمة ...ومتوائمة ...وكلن يخاف على الثاني ويحبه ... أنواع السلهمة بنا من المواقة ...
نمنا بالخيمة << أجل طاقينه ونيمين جنبه ؟
قمت أول واحد ... بعيوني غمص بري ....قلت ياولد تأخرت على صلاة الفجر ... طلعت من الخيمة ... رحت لم السيارات عشان أتوضأ ...قبل السيارات كان بوه جراكل بهن سائل ... على بالي إنه ماء ..... رحت ...وفتحت الجركل ...ولأني لحالي ..حطيته بين رجولي عشان أصب لي ... الجو كان بارد ...ويوم صبيت ...أثره دافي .. جاز لي قلت والله الفلة ... دافي بعز هالبرد
أخذت ملئ يديني الثنتين ...وغسلت يديني ...وتمضمضت وإستنشقت ...وغسلت وجهي
المهم
وش
صار ؟
صار مهوب ماء
صار قاز
إشتبن عيوني ...وبلعت ربع القاز ...وصرت ما أشوف ...وأنا مغمض أتوجس دربي عشان آصل لم توانك السيارة ...ووصلتهن ...غسلت ...وعيوني عجزت أفتحهن ...مافتحتهن إلا عقب برهة من الزمان ...وصرت أشهب هكاليوم