نبي موقف صارلك بالبر ولايمكن تنساه ؟

[راعي ساموده]

السلام عليكم ورحمة الله ,,
لاتخلوا الرحلات من المنغصات والمواقف اللتي لم تكن بالحسبان , تعطل سياره , طين , ضياع ,وووو
وهذه المواقف تكون سيئه جدا في لحظتها ولكن ماتلبث ان تكون ذكرى جميله تقصها وتسمر بها بين فتره واخرى .

وأبدأ بقصه سريعه ( باقي واجد )

مره طلعنا للبر وكنا متشفقين على الطلعه يوم وصلنا لمحلنا وزبطنا الخيام وفلة الحجاج ( الكلام هذا يوم الاربعاء) يوم جا مسيان ويجيك ذاك السافي اللي من قوته ماتقدر تحرك من الخيمه وكل شوي نقول خلاص هانت , هانت ,, هانت تدرون متى ركد الهوا والسافي ؟
يوم الجمعه المغرب
وحنا على قعده وحده بوسط الخيمه ماتحركنا لايمين ولايسار

[عبدالرحمن المحلاوي]

وعليكم السلام ورحمة الله

أشكرك أخوي الغالي راعي سامودة .. على هذا المضوع المسلي .. بس بعض السوالف ماتقال <<< وانت ابخص..

أما عن كشتتكم .. والله من زين هالكشتة .. يالله خيرها بغيرها

عندي قصة .. بس ما حصلت معي .. لكن يذكرونها عن واحد من الشباب..

وهي ..

طلع بعض الشباب في رحلة برية .. يوم طقو خيمتهم .. وزانت أمورهم .. وشبو ضوهم.. وجا الليل .. واحد منهم جاه ظرف طارئ .. ولازم يمشي الديرة (الرياض) .. فأخذ موتر واحد من الشباب .. واستأذن ..

قالوله تدل الدرب .. قال ما يحتاج ..

يوم إن خوينا جزاه الله خير .. مشى .. ومشى .. ومشى .. عيا يجي الإسفلت ..

وهو يمشي .. فجأة يجي بعيه نور أحمر .. ثم يختفي ..

الرجال توحش .. صار كل شوي يجيه النور .. يوم انه اخترش .. مضيع .. وهالنور ذا خرشه .. قال .. أبرجع لأخوياي ..

الرجال ديور لم أخوياه .. يدور .. يدور .. ويدور بعد .. بالأخير اكتشف انه مضيع أخوياه .. بهالليل

والنور الأحمر .. مازال مستمر

من الخوف والخرشة بغى يصيح ..

بالأخير قال .. محلك قف .. لين الصباح ..

الرجال مارقد إلا الصبح من الخوف ..

قامو أخوياه من الصبح .. ما درو إلى هذا موتر خويهم اللي مشى البارح قريب منهم .. يعني يشوفونه بعيونهم ..

يوم راحو لمه .. لقو الرجال في سابع نومه .. قوموه .. قالو وش السالفة وراك ما مشيت ..

قال .. اسكتو بس .. طلعلي ذاك الجني .. إلي عيا يفارقني .. كل شوي يطلع نور أحمر ..

قعدو يضحكون عليه نص ساعة .. تقريبا..

إثره .. شاحن الجوال مكسور .. واللمبة الحمره نازلة منه .. وكل شوي السيارة ترج .. تخبرون .. بر .. وترتفع اللمبة فوق ثم تنزل .. وهو ياحول يحسبه جني ..

المهم كان درس محترم له .. عشان لا عاد يبزع ثاني مرة .. ويقول أدل ..

وسلامتكم ..

يالله تصفيق..

شكراً شكراً .. لا داعي

[ثامرالماضي]

بسم الله الرحمن الرحيم

موضوع رائع جداً أخوي راعي سامودة ... والعج معروف إنه من مخربات الكيف ...

نعم ماتخلو الرحلات أبد من المواقف مهما كانت سواء حزينه أو طريفه ...

أنا صار لي موقف لايمكن أن أنساه ...

في عام 1422هــ بعز القيض طفّينا نقنص أرانب بطراف الرمله الله لايشمت بنا ... لابعد خميس وجمعة بس ...
طبعاً مقناص بندق ..
وكانت الأرض اللي نقنصها كلها صباخ ... مشينا من الرياض بعز القايله عشان التفاتيش .والمسافه بالتمام كانت 500كيلوا والعياذبالله ...
وصلنا المكان مسيان ونتقهوا ونصلي المغرب ونبدأ المقناص بعد الصلاة ... حنا كنا سيارتين شاص 98 ونيسان ربع 97 ...
بعد صلاة المغرب تحركنا حنا وجهنا غرب وراعي الربع وجّه شرق ... وبعد ماتحركنا من مكان صلاتنا بــ 300 متر سقط الشاص وسط صبخه
ويوم بدأ يغيص زر عليه السواق يحسب إنه يبي يشد عزمه ويطلع ولكن للأسف توسّط الصبخه وقال هذا مكاني ...
وعلى طول راسلنا أخويانا ولكن للأسف أيضاً مايسمعونا صار جهازهم فيه خراب السلك منجرح ...
وحاولنا فيه ولكن لاحياة لمن تنادي ... طبعاً كانت الساعة الــ 7 مساءاً ... وسحبنا فرشتنا وتسدحنا وكانت ثياتنا من الطين شي مايوصف ...
وبحدود الساعة الـــ 1 فجراً سمعنا تشويش وعلى طول تقامزنا وحاولنا نكلمهم
وأشوا سمعناهم ووصفنا لهم المكان وجو لمنا وسحبنا الموتر بسلسله 12متر وبحدود الساعة الــ3 فجراً
طلع الموتره وتفخنا كفراته ومشينا ندور لنا مراح ومن الصبح ماشين للرياض ...

الله لايعيد مثل هذيك الأيام ...

,,,,,,,,,,,,,,,,,,,,,,, تحياتي ,,,,,,,,,,,,,,,,,,,,,,,,

[شموخ]

رووووووووووووووووووعه


قصص جميلة


الله يحفظ الجميع بحفظة


والحياة تجارب


موضوع جميل


حبيت اشكر راعيه

اختكم فارسة

[راعي الهدد]

الأخ الفاضل راعي ساموده

السلام عليكم ورحمة الله وبركاته

يعلم الله المواقف كثيرة جداً وابشر مني بكل مايسرك

وسنجعل هذا الموضوع على طول في الشريط الإخباري من كثرة المواقف

أهيب بجميع الإخوة طرح مالديهم من مواقف

لأن المواقف ولاشك نأخذ منها الدروس والعبر فلا تحرمونا تجاربكم ومواقفكم

أخوي الغالي راعي ساموده سأذكر لك أشد موقفين أثرت فيني وصدمتني

وإلا هناك الكثير من المواقف سأذكرها تباعاً هنا

في موقع ومنتدى آخر من منتديات الأنترنت دفقت دم قلبي خدمةً للجميع

وتعبت وكديت واسال الله القبول والشكر منه سبحانه والمخلوق لانريد منه شيء

المهم انه في هذا المنتدى المذكور أعلاه سبق وطرحت به كذا موقف سأنقلها لك هنا بالتدريج

ففي تاريخ 3 / 6 /2007م

طرحت هذه المواقف اليك هي أخي الغالي نفع الله بالجهود

الأخ الغالي

اووووووه انت فتحت المواجع اي والله ....

وش رايك برجال قانصين وهو معنا وجينا مطلاع كايد كايد حيل ...

الى درجة أن الأخوان ينزلون تحت الربع يردفون له بالحصى

كل مارقى يردفون له وهاه ويالله السلامة

المهم ابو مناحي رفيقي على الباب الأيمن

شاف الدعوى مابه الا حمار شكمان ... واردف لاتردف ...

وانتبه ابو حمد ترى الموتر بدى يميل شوي ...

والثاني بأعلى صوته ... عدل عدل ... عدل الموتر

وهو يلتفت علي ويقول ... ابو حمد قلت هاه اصبر

مانيب بحالك خل نرقي الموتر اول خل العيارة بعدينا ...

ابو حمد ... ابو حمد ... والتفت عليه واشوف
الا والله دمعته يوم خرت ... يالله بالي فيه خير
وش فيك ابو مناحي .... ابو حمد تكفى مابي
المشاكل ... وش مشاكله يابن الحلال وشفيك
سلامات تكفى قل لي ... وطلعنا الموتر ورقينا
الظهره

واوقف الموتر على طول

وشفيك ابو مناحي ابوحمد ارجوك ابي ارجع للديرة

وتهل عبرته ...

لاحول .... طيب طيب ابشر

صبرك علي ... صبرك بس

واروح لباقي الربع بعد ماطلعوا موترهم

وابين لهم الوضع بصورة مغايره ...

من اجل سلامة الرجال من المناقيد او انه بعد يجيه كلام ...

المهم بعد يوم مقناص رجعناه .... وراحت الأيام
ومشت ... وجاء يوم وقابلته وبدى يتعذر مني
ويقول وش الي صابه ذاك الليل ... قلت وش
عذرك .... قال بالحرف الواحد اي والله ولا
ازل عليكم .... ((( يابو حمد انت داري ان
الكفر لو زل يمين او يسار انا بنموت .... قلت
طيب وبعدين ... قال انت داري اني (( الله
يكرمكم )) أني سويتها على نفسي وبلت في
سروالي ... ))) الله يكرمكم والقارئين جميعاً

قلت ايه معذور معذور اقولها وانا ميت قهر وغبن
كيف اني رافقة هالرخمة .... ووثقت منه وعديته رجل
للعلم احمد الله ان معرفتي به قليلة حدود سنه او حولها

المهم ومشيت من عنده ...

وعديته من عرض خلق الله ولا نشته
بكلمه ...

وخليته وحلفت بالله ما اصحبه ولا يصحبني في حل او ترحال .....

الغريب في الأمر ياحبيبنا راعي ساموده ...
ليس انه فعل هذا كله .... وليس انه بال في
سرواله من الخوف ....
وليس انه التفت ورآه .....

لاوالله الغريب انه يدقدق على جوالي الى فتره قريبة
يسأل يقول وين مقناصنا السبوع الجاي تكفى يابو حمد ..... ؟؟؟

ههههههههههههههههههههههههههههههههه

هذي الي مالها طب ولا لها علاج .....
استرجعت وحمدت الله ....
وقلت الله ينسيه رقمي ويكفيني شره ...

الله يحول بيني وبينه لايصير شي من غلط ولا كلام

قصة أخرى مغايره ....

وبوجه جديد ووجه غريب

على كل رجل بمعنى الكلمة

مرة من المرات كنا طالعين ايام عيد الفطر عام 1425هـ

ومحملين اغراضنا وكل شي وواحد من الربع
حالف يجيب ذبيحته معه وجاب ذبيحتين
من زود المحبة الله يحبه

وناوين نفلها ونوسع الصدر المهم وصلنا مكانا
ودقينا الخيمة

وبعد طلوع شمس اليوم الثاني قال واحد ابي
امشي .... خير ابو سعد .... وش العلم عسى خير
والله ودي امشي .... لا يقولها وبوجه شين بعد ....

لاحول وش السالفة ....؟؟؟

واوصي عليه ولد عمه ...

قلت قل له يسوي خير يصبر لو الى بكره

خلاص ماراح نجلس على اتفاقنا 5 ايام

ويحاول فيه مافيه فايده .... لاحول ...

المهم شغل موتره يبيه يسخن ....

وقبل مايمشي يوم انسحب الثاني ...

وش عذرك قال باخاويه لايضيع ....

يابن الحلال ماهوب ضايع هو الي
دالنا على المكان

وين يضيع دور غيرها تكفى يابو مطلق اجلس ....

وعقب حبة خشوم جلس ....

ابو سعد مشى .... دققنا في الأمر وسالنا منا
ومنا .... ولم يهدأ لي بال .... وبحثت الرجل
بعد مجيئنا من البر .... وجدت أن الرجل له
اربعين يوم عن اهله ...
(( منفس المره وتوها طالعه من النفاس وانتو بكرامه ))

وموقت انه يطلع معنا يوم وبكره يروح يآخذهم ....

عيب والله الي يصير

ياناس عيب والله ...

ذليت ربعك .... وحست طلعتهم .... ورجعت
قبل الحل .... وانحاسو عقبك .... لعشان
ويش ....

ما اقول الا خير

ابو سعد رحمه الله توفي قبل اشهر اسأل الله ان
يغفر له ويرحمه ويرفع درجاته في اعلى عليين
وينزله منازل الشهداء

يعلم الله كم كنت احبه رحمه الله

ولعل المآخوذ كان مشغله ومعذور الله يجعله
الحين يتندح مع الحور آمين ياكريم

ياناس هلت عبرتي .... ياناس هلت عبرتي ....

ياناس هلت عبرتي وفاض كل مكنون .... يوم الفراق الي به القلب محتاس

الله يرحمك يابو سعد ...

ياراعي ساموده ... جيت ابي اطرح
ماعندي .... وابي اعطي الربع بعض المواقف
وجاء موقف ابو سعد عارض وتسببت علي
بالبكا والله المستعان ...

رحمك الله يابو سعد

0000 يا أخوان الشاهد 0000

تكفون لا احد يلتفت ورآه

وخل مشيتك مشيت ذيب لايهاب

وارفع راس خويك

وخلك معه في الزينه والشينه

ان ورد حوض الموت فخلك معه

وان ورد حوض الحياة فخلك معه

وافهم معنى خوي ورفيق قبل كل شي

ولا تعطيه قفاك

وافرح لفرحه

واسعد لسعده

وأن اعسره شي من الصوادف فشله بيمينك يامال الشحم

اخوي راعي ساموده المواقف كثير

وش رايك اوقف او بعد

ترآك غالي حيل جعلك تسلم

واشكر لك هذا الموضوع القيّم

وخذ في راسك ان اكثر من يرجع للديرة ويفركش ربعه انه من النوع الي

يعشق اللحاف حدر المكيف والباقي كلام مشفر هههههههه

والله انها غبنه يرجعك رفيقك لعشان هالأمور

محبك ابو حمد

[ابو سعد الرويس]

مره من المرااريت كنا كاشتين لرروضه الخفس

ربيع وامطار وخير

كنا سيارتين جيب وهاايلكس وكنا مخططين نجلس ليلتين

نبي نفلها ربيع وخير ولله الحمد والله يرزقنا بالخير

طقينا الخيمه ونزلنا العربه وشعمنا النار جلسنا اول ليله

ولا اروع منها وخص لكان في حليب زنجبيل مع المغربيه وخر عني

اللمهم راعي الهيلوا اليوم الثاني جاااه ظرف وقال ابي امشي الليله ياولد

حاول يمين ويساار قال مره عندي شغل مع الوالد طيب كان علمتنا قبل هذا والله القهر

قلت انا والله ما نسير الليله نبي نفلها الليله والخيمه ننطلها في ظهر الجيب

وخوينا سعد جااي من الشرقيه وقال ابجيكم لو هي ليله قلنا مالنا مرواااح الليله

الرجال بيجنا ونبي نسمر تحت نوور القمر

اللمهم واعدنا سعد عند خزاام رحت انا على الجيب ومعي ابو ضيف الله

وراعي الهايلكس قدامنا اخذنا سعد حوول المغرب ربعنا في الخيمه لا نوور ولا مووتر

علنا بنرجع بدري لهم وما درور انهم بيلطعوون في ذا الليل القاارص

المهم وجهنا لربعنا والخفس في روضتين وحده على الخط وحده داااخل شوي

والله يوم فرقت يمين ويفترم رااسي وكثرة على الكلام هذا يمين وانا اقول يساار وكم مخيم طحنا فيه ياولد

وين نرووح لا يوم صكت الدنيا في وجهي ربعنا في خيمتهم لا نوور لا سيااره ولا حس

ولا معنا اي وسيلة اتصاال هذا والله النشبه

يمين يساار ولا وصلنا عندهم الا الساعه 12 في الليل

المهم ونتعشى عشاء خفيف وهي النومه والصبح رجعنا لريااض

[راعي ساموده]

المشاركة الأصلية كتبت بواسطة عاشق النداوي

وعليكم السلام ورحمة الله

أشكرك أخوي الغالي راعي سامودة .. على هذا المضوع المسلي .. بس بعض السوالف ماتقال <<< وانت ابخص..

أما عن كشتتكم .. والله من زين هالكشتة .. يالله خيرها بغيرها

عندي قصة .. بس ما حصلت معي .. لكن يذكرونها عن واحد من الشباب..

وهي ..

طلع بعض الشباب في رحلة برية .. يوم طقو خيمتهم .. وزانت أمورهم .. وشبو ضوهم.. وجا الليل .. واحد منهم جاه ظرف طارئ .. ولازم يمشي الديرة (الرياض) .. فأخذ موتر واحد من الشباب .. واستأذن ..

قالوله تدل الدرب .. قال ما يحتاج ..

يوم إن خوينا جزاه الله خير .. مشى .. ومشى .. ومشى .. عيا يجي الإسفلت ..

وهو يمشي .. فجأة يجي بعيه نور أحمر .. ثم يختفي ..

الرجال توحش .. صار كل شوي يجيه النور .. يوم انه اخترش .. مضيع .. وهالنور ذا خرشه .. قال .. أبرجع لأخوياي ..

الرجال ديور لم أخوياه .. يدور .. يدور .. ويدور بعد .. بالأخير اكتشف انه مضيع أخوياه .. بهالليل

والنور الأحمر .. مازال مستمر

من الخوف والخرشة بغى يصيح ..

بالأخير قال .. محلك قف .. لين الصباح ..

الرجال مارقد إلا الصبح من الخوف ..

قامو أخوياه من الصبح .. ما درو إلى هذا موتر خويهم اللي مشى البارح قريب منهم .. يعني يشوفونه بعيونهم ..

يوم راحو لمه .. لقو الرجال في سابع نومه .. قوموه .. قالو وش السالفة وراك ما مشيت ..

قال .. اسكتو بس .. طلعلي ذاك الجني .. إلي عيا يفارقني .. كل شوي يطلع نور أحمر ..

قعدو يضحكون عليه نص ساعة .. تقريبا..

إثره .. شاحن الجوال مكسور .. واللمبة الحمره نازلة منه .. وكل شوي السيارة ترج .. تخبرون .. بر .. وترتفع اللمبة فوق ثم تنزل .. وهو ياحول يحسبه جني ..

المهم كان درس محترم له .. عشان لا عاد يبزع ثاني مرة .. ويقول أدل ..

وسلامتكم ..

يالله تصفيق..

شكراً شكراً .. لا داعي

بصراحه موقف مضحك لنا بس مخيف لخويك

وياليت تكون القصص صارت لراعي السالفه فقط

[محمد المعارك]

راعي سامودة مشكور على هالموضوع

أتذكر قبل أكثر من عشر سنوات كنا طالعين للصمان لصيد القميري ومعنا شاص موديل 1977م قديم ابو ثلاثة غيار وبنشر علينا خمس مرات وكل مرة كنا نرقعة برقع من عندنا وكانت خبرتنا بالبر أقل من الان وفي عز الصيف ... وبالاخير بنشر الأخيرة قلت لخويي اجلس وانا بروح للإسفلت واطلب النجدة ووجدت أحد الرعاة الذي نقلني حتى ام الجماجم لجلب رقع ولستك وثم رجعت لخويي وصلحنا البنشر ورجعنا ومن زود المشقة يوم اقبلنا على بريدة بنشر الكفر واضطريت اني أأشر واركب مع احد المسافرين الى البيت وعندها وصلت البيت واحضرت معي كفر ورجعنا متعبين ومنهكين .... ولله الحمد .

[ابو صقر]

بسم الله الرحمن الرحيم

يامل العافيه ياخوي راعي ساموده

موضوع جيد ممكن نكتسب منه بعض التجارب والخبرات
ونتحاشى السلبيات ونركز على الايجابيات
((الذكرى تنفع المؤمنين))

ابي اورد هالموقف حصل لنا مع واحد من ربعنا في الاستراحه

كانت الاجواء ممتازه وكان علينا مطر وكل الظروف مواتيه لرحله بريه
وكنا في وسط الاسبوع فا بدأت الاراء والمشاورات والمداولات
الجميع اتفقو (قدااااام) يعني موافقين
بدأنا بتوزيع المهام لين عرف كل واحد ايش المطلوب منه وكان صاحبنا موجود وتسلم واحده من المهام وكان متحمس حماس شديد.
المهم جا اليوم الموعود وتجمعنا نحمل الاغراض وجا صاحبنا وهو مكمل مهمته على اكمل وجه وكان هو اللي ينط فوق السيارات ويحمل ويربط كان شعله من نشاط
لين قبل نركب بشوي

قال
يالله ربي يوفقكم ويساعدكم
وش السالفه يابو فلان
قال والله ماقدر اروح وكان عندنا ضيوف (ملكه) محدد وقتها من زمان
بس خفت اقولكم ذاك اليوم اكسر مجاديفكم
وهو للأمانه من الناس المحبوبين اللي يخللي الواحد يجزم يطلع

طبعا اكبرنا فيه هالشي وربي يجزاه خير
يارب ماتكون ممله
ومفيده عن خدمة الخوي لخويه والايثار

[عبدالكريم اليوسف]

الغالي
راعي ساموده

كل الشكر لك على هذا الموضوع التفاعلي
ولي عودة باذن الله بعد ان استمتع

الله لا يخلينا منك ومن ابداعك المعهود

اخوك

[راعي ساموده]

المشاركة الأصلية كتبت بواسطة أبو شعلان

بسم الله الرحمن الرحيم

موضوع رائع جداً أخوي راعي سامودة ... والعج معروف إنه من مخربات الكيف ...

نعم ماتخلو الرحلات أبد من المواقف مهما كانت سواء حزينه أو طريفه ...

أنا صار لي موقف لايمكن أن أنساه ...

في عام 1422هــ بعز القيض طفّينا نقنص أرانب بطراف الرمله الله لايشمت بنا ... لابعد خميس وجمعة بس ...
طبعاً مقناص بندق ..
وكانت الأرض اللي نقنصها كلها صباخ ... مشينا من الرياض بعز القايله عشان التفاتيش .والمسافه بالتمام كانت 500كيلوا والعياذبالله ...
وصلنا المكان مسيان ونتقهوا ونصلي المغرب ونبدأ المقناص بعد الصلاة ... حنا كنا سيارتين شاص 98 ونيسان ربع 97 ...
بعد صلاة المغرب تحركنا حنا وجهنا غرب وراعي الربع وجّه شرق ... وبعد ماتحركنا من مكان صلاتنا بــ 300 متر سقط الشاص وسط صبخه
ويوم بدأ يغيص زر عليه السواق يحسب إنه يبي يشد عزمه ويطلع ولكن للأسف توسّط الصبخه وقال هذا مكاني ...
وعلى طول راسلنا أخويانا ولكن للأسف أيضاً مايسمعونا صار جهازهم فيه خراب السلك منجرح ...
وحاولنا فيه ولكن لاحياة لمن تنادي ... طبعاً كانت الساعة الــ 7 مساءاً ... وسحبنا فرشتنا وتسدحنا وكانت ثياتنا من الطين شي مايوصف ...
وبحدود الساعة الـــ 1 فجراً سمعنا تشويش وعلى طول تقامزنا وحاولنا نكلمهم
وأشوا سمعناهم ووصفنا لهم المكان وجو لمنا وسحبنا الموتر بسلسله 12متر وبحدود الساعة الــ3 فجراً
طلع الموتره وتفخنا كفراته ومشينا ندور لنا مراح ومن الصبح ماشين للرياض ...

الله لايعيد مثل هذيك الأيام ...

,,,,,,,,,,,,,,,,,,,,,,, تحياتي ,,,,,,,,,,,,,,,,,,,,,,,,

انا ابي ادري هالارانب ماعنده مخ ؟ يعني تاركتن كل هالنفد وقاعده بصبخه ؟ ( الله من الربو)
وبيني وبينك مقانيص الصيف كله تدبل التسبد الا اذا صارت بمزرعه

[راعي ساموده]

المشاركة الأصلية كتبت بواسطة فارسة العتيبي

رووووووووووووووووووعه


قصص جميلة


الله يحفظ الجميع بحفظة


والحياة تجارب


موضوع جميل


حبيت اشكر راعيه

اختكم فارسة

هلا ومسهلا

[عمار السفينه]

خذو موقفي

قدر الله علي في يوم من الايام قبل تقريباُ 7 سنوات أن أخرج أنا وبعض الشباب إلى مزرعه للاستمتاع والصيد.
وقبيل مغرب يوم الخميس كان واحد من الزملاء يصيد (ببندقيتي من نوع فايروخ المانيه (85)) وكنت جالس على دكه أتقهوى .
المهم كان هو ورى الشجر وبيني وبينه تقريباُ (15) متر , صدفه طلع له طير وكان من جهتي , وخويي ذا تحمس وطلق الرصاصه , وقدر الله وضربت في صدري عاد الشباب تناقزو علي وقالوا يله المستشفى وأقرب مستشفى كان في المجمعه على بعد (70)كيلو.
وصلنا المستشفى بعد ساعه تقريباُ عطوني أبرة الظاهر أنها مسكن , المهم وسوو أشعة عشان يحددون مكان الرصاصه .
بعد ربع ساعه تقريباُ جاني الدكتور يقولي أنت قد طقتك رصاصه قبل ؟؟؟؟؟

قلت لا

قال تذكر

قلت متأكد

المهم بعد شوي أكتشفو أن الرصاصه ضربت في القفص الصدري وانحرفت للاسفل تقريباُ عشره سنتي .


جلست في المستشفى إلى صباح الجمعة ثم طلبت الخروج للذهاب إلى الرياض رحت الرياض وذهبت لمستشفى الملك فيصل التخصصي قسم الجراحه.

سوو اشعة ثانيه وعطوني موعد بعد يومين , جيت بعد يومين قال الدكتور وهو (بريطاني) أنت مخير بين أننا نشيلها أو نتركها .

قلت أبد أتركوها بلا بربسه .


.. وهنا أنتهت القصه ..

[ابو سعد الرويس]

المشاركة الأصلية كتبت بواسطة عمار السفينه

المهم بعد شوي أكتشفو أن الرصاصه ضربت في القفص الصدري وانحرفت للاسفل تقريباُ عشره سنتي .

جلست في المستشفى إلى صباح الجمعة ثم طلبت الخروج للذهاب إلى الرياض رحت الرياض وذهبت لمستشفى الملك فيصل التخصصي قسم الجراحه.

سوو اشعة ثانيه وعطوني موعد بعد يومين , جيت بعد يومين قال الدكتور وهو (بريطاني) أنت مخير بين أننا نشيلها أو نتركها .

قلت أبد أتركوها بلا بربسه .

.. وهنا أنتهت القصه ..

يالله سترك والله انك غلطان يبو عبد الله

كان طلعتها وافتكيت اخاف يكون لها اثر عليك مع الوقت

اما البرطاني قصبني انا وخلص مني من زمااان

[عمار السفينه]

المشاركة الأصلية كتبت بواسطة ابو سعد الرويس

يالله سترك والله انك غلطان يبو عبد الله

كان طلعتها وافتكيت اخاف يكون لها اثر عليك مع الوقت

اما البرطاني قصبني انا وخلص مني من زمااان

يارجااااااااااااااال الحافظ الله

وبيني وبينك أنا مااداني شيء اسمه مستشفى

الله لايجيبنا واياك وجميع المسلمين لها

وهي ولله أعلم ماتصدي يعني ماتأثر بالجسم

لاني مسوي أشعه قبل كم شهر وشفتها سبحان الله ما تغير فيها شيء أبد