من البريد الأليكتروني قصه قصيره
( قالوا انه كان قديم رجل يعيش في قرية وحظه تعبان، مالله موفقه وين ماراح، النحس وراه ، راح مره الى رجل صالح وقاله عن حالته وسأله كيف يصير حظه طيب، قال له الرجل الصالح روح للقرية الفلانيه تجد الحظ على شكل رجل قله عن حالك وشوف ان شاء الله يدلك أيش تسوي، راح الرجل يمشى وفي الطريق حصل ذيب هلكان من الجوع قاله الذيب وين رايح قال رايح أشوف حظي، قال الذيب بالله شوف لي حظي معاك لي مده ما حصلت أكل ومثل ما تشوف ميت من الجوع، قاله ان شاء الله، مشى خوينا مسافه لقى جيش وعليه قائد ملثم قال له قائد الجيش وين رايح قال رايح أشوف حظي قال له القائد تكفى شوف لي حظي معاك ما قد انتصرنا ولا مره دايما مهزومين، قال الرجل أبشر، مشى الرجل وبعد فتره وصل للقريه وشااف له بيت قال ابي أدق على هذا البيت واستريح عندهم واشرب الشاي دق الباب طلع له شايب رحب فيه وقاله وين انت رايح قال رايح أشوف حظي، قاله ياوليدي أسأل لي معاك عن حظي مع هالنخله عيت تكبر وانا زارعها من مده عند الباب، قاله خير ان شاء اسألك عن حظك، مشى الرجل وحصل قدامه البحراللي يفصل بينه وبين المكان اللى فيه الحظ، كيف يعبر البحر، ايش السواة، طلعت له سمكه سألته وين رايح، قال ابا اروح أشوف حظي، قالت انا باوديك لكن على شرط قال وشهو الشرط قالت تساله عن حظي انا ما قدر اسبح مثل باقي السمك مانيب سريعه مثلهم أحس بثقله، قال اتفقنا أسال لك اياه عن حظك، ركب الرجل السمكه ووصلته الى المكان اللي فيه الحظ،، شاف الرجل الحظ على هيئة رجل سلم عليه وحكا له قصته وقصة الجماعه اللي وصوه، وأول ما حكاله عن السمكه، قال الحظ شوف يالمتعوس:
السمكه هذي بالعه جوهره وهي اللي مثقلتها خلها تطلعها من بطنها وتصير طبيعيه مثل باقي السمك
والشايب هذا راعي النخله قله يغير مكانها لأن تحتها كنز
اما الجيش فخلهم بغيرون القائد حقهم لأنه امرأه وبيحالفهم النصر ان شاء الله
والذيب خله ياكل أول انسان طمـــــــــــــــــــــاع يمر عليه وماعنده أي مشكله بعد كذا، وانت ان شاء الله حظك تحصله قدامك وهو تراه يمر عليك مرة واحده لا تخليه يفلت منك خلك مفتح، قام الرجل وشكر الحظ واستعان بالله ورجع,
أول ما حصل السمكه تنتظره قالت بشر عسى شفت حظي قالها الرجل شوفي يالمطفوقه انت بالعة جوهره طلعيها وما تشوفين الا العافيه، طلعت السمكه اللي في بطنها الا وذيك الجوهره قالت السمكه خذها قال لها لا انا حظي قدام،
تركها وراح الى ان وصل للشايب وقاله ترى النخله هذي يبغالها تغير مكانها لأن تحتها كنز، وقاموا يحفرون وطلعوا الكنز فرح الشايب قال انا بزوجك بنتي وتعيش معانا ونتقاسم هالكنز ما حد يورث البنات الحلال، قال الرجل لا ياعمي انا حظي قدام،
مشى الرجل ووصل عند الجيش، الا وهم راجعين مهزومين قال للقائد الملثم، انتم قائدكم أمرأه ولازم تغيروها حت تنتصرون ، قال القائد حسبي الله عليك كشفت سري صدقت انا كنت ضاحكه على الجيش انى رجال ويسمعون أوامري، لكن دام انك عرفت القصه ابيك انت تتزوجني وتصير القائد وننتصر بأذن الله، قال لا يابنت الناس انا حظي قدام.
وصل المنسم للذيب قاله الذيب وش السالفه عساك شفت لي حظي قاله الرجل كل قصص اللي مرعليهم من الألف للياء، وقال انت يالذيب يقولك الحظ تاكل أي رجل طمــــــــاع يمر عليك، وان شاء الله بتنحل مشكلتك، قال الذيب والله ما ظنيت اني باحصل اطمع منك وهجم على خوينا وأكله.
أشبه القصه هذي عزيزي الرحال بصغار المتداولين اللي ما يبيع يحتري الزياده وبعدين لا هذي ولا ذيك.
أبو فهد
حظي قدام
العرض العادي
