رحلة الجنوب الخطافية 13-20-6-1428هـ

[راعي كيف]

السلام عليكم ورحمة الله وبركاته

رحلة لم اخطط لها ولم يخطر على بالي او الأهل اننا سوف نذهب في هذا الوقت وفي هذي السرعه على غير العادة .
نتغدى انا وام ناصر ودار الحوار التالي :
انا : ام ناصر
ام ناصر :يلبيه
انا :لبيت بمكة آمين
وش رايك نروح الطايف ومكة اهلي بكرة يبون يمشون نمر اهلك في بلجرشي ونقعد يومين عندهم ونرجع لهلي .
ام ناصر : والله زينه بس تقدر تأخذ إجازة .
انا : والله مدري ابدق على ابو مشاري واشوف
وين الجوال إيه هذاه رن رن دق دق رد رن .
انا : السلام عليكم
ابو مشاري : هلا هلا ابو ناصر وشلونك وشلون العيال .
انا : تمام ابو مشاري ممكن اخذ إجازة الأسبوع الجاي
ابو مشاري : توكل على الله يارجال الله يسهل عليكم .
انا : مدري انا صكيت السماعه من الفرحة قلت السلام اولا المهم قعت اناقز من الفرحة وولدي ناصر بلسان حاله يقول ابوي شكله انهبل طايرة عيونه ميدري وش السالفة .
ام ناصر قومي ولمي العفش طق طق خذ دوك هات شل حط ركب عدل بدل يالله مشينا الساعه 10 لليلاً
نكمل في الحلقة الجاية بقية القصة
وهذي هدية مني



راعي كيف
ابو ناصر

[سحمان السبيعي]

الله يجزاك خير راعي كيف على هذا الموضوع

[ولد نجد]

الحمد لله على السلامة يابو ناصر
صراحة طريقتك تعجبني .. حار بحار
وولدك ناصر الله يصلحه ويخليه لكم يذكرني صورة لبعض الناس هنا وهو جالس يناظر في الخرايط
الف شكر وننتظر بقية الحلقة

[ثامرالماضي]

بسم الله الرحمن الرحيم

الحمد لله على السلامه يابوناصر ...

الله يصلح ناصر ويرزقكم برّه يارب ...

وترانا ننتظر الحلقة الجايّة ...

,,,,,,,,,,,,,,,,,,,,,,,,,,,,,,,,, تحياتي لك ,,,,,,,,,,,,,,,,,,,,,,,,,,,,,,,,,,,,

[شايب الصمان]

الحمد لله على السلامه وسلامة دائمه

أحلى رحله ولن تنسى أبدا ..... وننتظر الجزء المتبقي

[راعي كيف]

السلام عليكم ورحمة الله وبركاتة

اخوي كان دئماً هو الأول او ابو شعلان ماشاء الله عليهم وجزاكم الله خير

ولد نجد الغالي آمين ماعندي إلا حار بحار اجل من الرس وتبيني اصير بالرد حنا هلا الحبحر ههههههه

أبو شعلان الله يسلمك من كل شر اللهم امين ويجزاك خير ويبارك فيك ومن قال طال عمرك على الطاعه وابشر بالجاي.

منهو ذا شايب الصمان صاحب القلب الكبير ابو عبد الله يهلا والله ويامسهلا هلا بالعم صحيح ماراح تنسى ابد صح لسانك والله يسلمك من كل مكروه و المسلمين اجمعين آمين وابشر بالزين والجديد والبقية .

المحب للكل راعي كيف
ابو ناصر

[راعي كيف]

السلام عليكم ورحمة الله وبركاته

الجزاء الثاني

ركبنا العفش ومشينا في تالي الليل الله لاينكسنا وعموماً انا من محبين مشي الليل مع إنه خطر شوي كانت النية اننا نصبح على اهل المعزبة في بالجرشي صارلهم يومين طالعين من مكة وراحو يم بالجرشي وجازلهم الوضع وهم اللي هيضونا الحقيقة المهم صلينا الفجر بالطايف الله يخلف طاير ابو ناصر الله يهدية وريحنا شوي وكملنا المشوار للباحه وبعدين بالجرشي وصلناهم الساعة سبع الصباح ماعلمناهم ويوم كلمنا عمي دري اننا جايين علمنا مكانهم ودخلنا على اهلهم ودورهم من الفرحة تقل لنا مية سنه ماشفناهم وكان هذ صباح الجمعة وهذي صور من الطريق بين الطايف والباحة مع العلم ان الطريق كله تحويلات وحوسة اول الخط كان زين بعدين شانت الأخلاق اخليكم مع بعض الصور

جماليات في تعرج الخطوط طوال الطريق مما اعطاه متعه

الشاحنات كانت اكتر شيئ بالخط وكانت تعطل الطريق بسبب الحمولة والسرعه القليلة في الطلوع والنزول

لايكاد الخط يخلو من المطافيق وكأن الخط لهم لوحدهم فهم يسرعون سرعه جنونيه في هذه الخطوط ولسان حالهم يقول شف سيارتي اسرع واخف من سيارك بالطلعات والنزلات ( ايه الله يستر عليك وهلى من اخطيت عليه)

تابع
V
V

[راعي كيف]

القرود وما ادراك مالقرود دورهم الصبح مالين الأرض وناصر طايرة عيونه اول مرة يشوفهم الله يصلحة آمين

بيوت اهل الجنوب الحجرية ذات الطابع المعماري الفريد والهندسي البديع

ويستمر الطريق

تابع
v
V

[راعي كيف]

وصلنا بالجرشي بحمد من الله ومنه وكان بستقبالنا ابو المعزبة الله يجزاه خير اخذتلي لفة في بالجرشي وشوفلك ذيك الدبابات اللي كوم ومعهم دورية
وهاذي صورة من موقعهم ماصورتهم الحقيقة


وهذا الرابط حقهم
http://www.ubtksa.com/vb/showthread.php?t=2923

رحت البيت واخذتلي غفوة لساعه 12:10 الضهر رحت انا وعمي ندور مسجد جامع واثرية قريب من الشقة على رجولك تاصله المهم دخلت المسجد وادور الناس ماحولك احد قدامنا هندي فتح المسجد وشغل اللمبات اية استحينا نطلع خاصة انه فية ناس بعدنا جو تسننا وقرينا قرآن المهم ويجي الإمام ويكلم اللي جنبي مادريت إلا وهو يعتذر منه ( اللي جمبي هو اللي اعتذر ) ويتجة الإمام لمي وقالي ......؟
نكمل في الجزاء الجاي إن شاء الله جتني ام الركب هههههههههههه

اخوكم المحب راعي كيف
ابو ناصر

[احمد الثقفي]

أكمل اخوي راعي كيف، وكثر لنا مالخطفات
ولاتنسى الأكثار من الصور

تحياتي

[أبوعبدالعزيز]

الحمد لله على السلامه اخوي راعي الكيف مشكور على الصور

ضاق صدري يوم قلتا ان الخط بين الطائف والباحه تحويلات من العام وانا جاي معه وهم يشتغلون فيه
وش هالطريق السياحي الله يعين ويسهل الامور

بارك الله فيك واصلح الله لنا ولك النيه والذريه

ننتظر التكمله

[راعي كيف]

السلام عليكم
هلا ابو اشرف هلا وغلا صحيح الخطافيات لها طعم خاص
ابشر بالصور توي باقي كوم

ابو عبد العزيز الله يسلمك ويبارك فيك واللهم امين يارب العالمين
بسم الله على صدرك انا جاية قبل العام وهم يشتغلون ويبيله من خمس الى 80سنه علشان ينهونه

اخوكم المحب راعي كيف
ابو ناصر

[راعي كيف]

الجزاء الثالث

السلام عليكم هلا بالربع كلهم الجالسين والقاعدين والوافقين والمنسدحين مستانس

وقالي الإمام ممكن تأذن الإمام غايب اليوم
قلت ابشر وبغيت اروح ااذن قبل مايطلع المنبر اشوى انتبهت لنفسي يم سلم وانا اذن الله اكبر الله اكبر ----لا إله إلا الله ودورني مدري اذنت مدري اقمت والعرق يصبصب والركب حدث ولا حرج مع إني متعود والحمد لله إني ااذن لأن الوالد الله يغفرلة ويرحمة كان مؤذن وكنت دئماً اذن عنه لكن المرة مدري وشي اللي صار المهم مالكم بالطويلة .
صلينا وطلعنا قالي عمي فية منتزهين واحد اسمة الشكران والثاني البعيد شوي وهو ازين القمع وشرايك قلت القمع القمع توكلنا على الله وكانت تلك الصور من ذلك المنتزة الجميل النظيف البارد ذو الجو العليل

اريد تعليق على هذه الصورة دقق فيها الله يهديم بس

دكات في كل مكان مع مكان لشواء

دورات المياة واماكن النفايان متوفرة اكرمكم الله وتمتاز الدورات بالنظافه وتوفر الماء الحلو

سيارة الرحلة بجانب الدكة

تابع
v
V

[راعي كيف]

منظر اعجبني من اعلى الجبل من الدكة وقت العصر

عزبة الشاهي المختصرة الى ابعد درجة الذراية بس اللي داخلة عرض


العربات والجمال والخيول موجودة والدبابات ةالألعاب يالله لك الحمد والمنه

رجعنا البيت بعد العشاء وبيتنا النيه اننا نروح يم ابها وعمي يبي يرجع الرياض


ونكمل بقية الرحلة في الجزاء الرابع

اخوكم راعي كيف
ابو ناصر

[أبو مروان]

السلام عليكم ورحمة الله وبركاته

مشكور أخي الغالي راعي كيف على هذا السرد الممتع لرحلة الجنوب ، ونحن بشوق لمتابعة بقيتها

وجزاك الله خير