مساء الخير جمييعا وكل عام وانتم بخير وصحة وعافيه
وحبيت اشاركم بهذا المقناص والرحله نهاية الاجازه الاسبوع الماضي
امل ان تحوز على رضاكم
وهي مقناص جميل وعجيب ونادر ليش لان الحباري هالايام قليلة و(مجموعة ترفع )خوتهم تنشرى وشرف كبير خوتهم رغم مقناصي معهم سابقا لكن هالمقناص نادر وجميل وافتتاح موسم يبشر بخير ماشالله تبارك الله
وطبعا مجموعة ترفع او ركاب الباص ( ركاب الباص هذا موضوع بحاله لكن سوف اذكر قصة الباص باختصار باخر الموضوع) قصة ترفع كل شوي لاقين جره وما تسمع الا ترفو يا عيال عشان الطيور تشوف الحبارى وتطلع عليها وصار الكل يترفع حتى لو ما معه طير
كل من : امير المجموعه امير العدل والمساواة ابوصالح الله يحفظه
ابو على وفي روايه اخرى ابوفارس
ابوسلطان 0ابوسعيد- ابومحمد وفي روايه اخرى راعي الطير اللي كاسر خرب عينه بالسابق احب عليه انك تدعسه بالسياره ولا تهده على خرب–ابومحسن –ابو اريام- ابوقاسم –ابوفهد -راكان- وابو ريان قائد الاركان العامه وفي روايه اخرى الدكتاتوري او ((اقضب طيرك يا ابو... لاتروح الحباري على خوياك )))ويقولها بصوت جهوري كزئير الاسد بغى يفقع سمعات الاجهزه لان الطير تعب وبداء يقصر عن الخريب -وطبعا محاكيكم ابوناصر وفي روايه اخرى المتأخر دائما عن الهدد وكل حبارى يلقونها الا انا باخر الدنيا اقل شيء 20 كلم وما لحقت الا هددين فقط من السبع حباري ويا خوفي ترى الذاكره يمكن نسيت احد الربع
واليكم البداية وهي انطلاقي من مدينة الرياض حسب الاحداثية المرسله لي بالجوال وتحمل درجة عاليه من السرية تسلم لجواله وتقرمن بيده ليلة الخميس وطبعا الموقع بمكان ما بفيافي نجد الحبيبة حسب عرف اهل المقناص والا لو على انا اعطيتكم الاحداثيه
شكلي طولت بالسواليف اليكم الصور
1- كفشة لعداد السياره 555555 كلم بعد صبره على عقد من الزمان وخوته
و2 كالعاده المقناص يبداء بجرة حباري واليكم اغرب جره بالله عليكم باي اتجاه تقدر تقص هالجره وباي جهه رايحه
3 – والحبارى صارت واحده من حصى هالحزم لكن الوكاد انها جنب السماره اللي بالصوره انا ماشفتها الا يوم فقعت
5وهاذي حبارى خرب يوري طير ابومحمد العين الحمرى ويقول والله لا اوريك واغتصبك مره ثانيه واعتقد ان هذا سر كره طير ابومحمد لشيء اسمه حبارى
6- وبعد الترويض يبداء تعريف الفرخ على الحبارى بعد تخليصها من القرناس وهاهي الى حتفها محموله
7
يالله يا راكان خلها تتواجه مع الفرخ
8
هاذي جرة خرب فكه الله من الطيور ونجا بعمره وذلك بسبب خطاء مطبعي بالهدد للاسف هد احد الربع ولكن انطلق طير اخر بغير قصد لان الربع كانو يحاولون ان الطيور تطلع على الخرب ويفقع قبل المغيب وتشابطت الطيور وفرك الخرب وهو يقول اللهم اجعل حيلهم بينهم ولحق له الامير ابوصالح ولكن بعد ما ارتفع الخرب وكان باقي اقل من ربع ساعه على المغيب وطب جنبنا وامرحنا عنده وفي الصباح لم نجد الا مطيره وكان يبعد مطبه عن معشانا 1900 متر فقط
وقد طب علينا طير مثلوث ضايع وعليه حجل وريشه وسوف يتصل احد الربع على رقم الجوال الموجود بالحجل لكن حتى اليوم الجوال مغلق
((( قصة ركاب الباص احد الربع معنا حلم حلم غريب بالمقناص ان كل افراد المقناص راكبين باص وقانصين سوى وسائق الباص احد الصقارين والشعراء المشهورين وكل شوي يقول لنا قصيده والظاهر تفسيره واضح
والله العالم لو انه حلم انا راكبين طائره ركاب بويبنق كان طحنا باجوال حباري ))))
10
وبالختام غربت شمس يوم السبت 7-12-1431 معلنة انتهاء المقناص على امل اللقاء بمقناص اخر من مجموعة ترفع ومعكم بتقرير قادم افضل
وتقبلو وافر الود والمحبه وكل عام وانتم بخير واعذرونا على التقصير
الآدمـي تـكـشـف مع الوقــت خافيه
ويبين لك طـيـب الرجـل من خماله
لا طـالـت الـخــوه ظهــر كل ما فيه
وعـرفـت دقــه وقــتـها من جــلاله
أما طــلـع خــويـك الـلـي تــخـاويه
والا سـمـحــت وقــلـت مالي وماله
مقناص 5 نجوم سبع حباري مجموعة ترفع 3-12-1431هـ
العرض العادي
