الفيتي النجديه

[نهار]

الف اولف من كلام ظريف
في حب نجدٍ في هواه اللطيف
محلى براريها ببرد(ن)وصيف
لوكان ما به غير طلح(ن)شجيرات

والبا بلينا بالبراري نحبه
ما بين وديان وضلع(ن) وخبه
والطير ماله غير عش (ن)يربه
لو كان ماله غير ميه وحبات

والتا تليت الفرق واثره حمام
صار القميري شوفته شوفت اوهام
تبدلت هاك الفروق بجهام
الا فريقات (ن)عن الصيد حذرات

والثاء ثلاث(ن)صدتهن صرت فرحان
كن الصفن عندي من المال مليان
ونا تعبت وصرت بالحين زهقان
ولا نتوب وترك الصيد توبات

والحا حليّ لنجد ما فيه لله
خص(ن)ليا جاها وسوم تعله
ودلت عليها السحب ماها تهله
تصبح براريها مروج(ن) وجنات

والخا خاويت اقروم للبر مرات
ما هيب خوة من يعد الريالات
اهل الشبوح اللي على الدوم عليات
اهل المراجل والسنع والمروات

والدال دنت نجرك في وسط خبه
وادنيت من صافي حطبها تشبه
وحطيت بدلالك زلاله وحبه
يا زين فايحها بريح الرميثات

والذال ذود(ن)تتبعه بالفيافي
والبيت يا زينه بزين السوافي
مروبع (ن) يطرب لبدع القوافي
محلى حيات البدو محلى البداوات

والراء روابي نجد واذودهنه
يسعد مهو عايش (ن) من بينهنه
البل ما به بالوطاء مثلهنه
ملح(ن)وضح وصفر من الله عطيات

والزاء زباد السيل لشاله السيل
ودلا يتصافق بالمسايل بها يهيل
واقفى السحاب وشفت بيض الهماليل
وصوت الرعد تسمع له حنين (ن) ورجفات

والسين سال السيل في كل وادي
وتباشرو اهل الحضر والبوادي
ولبست لنا نجد(ن) اثياب(ن)جدادي
فضل (ن)من الرحمن جزل العطيات

والشين شب النار ورخ الريال
والرزق عند اللي يسوق الخيال
واللي كتبلك ما يفوتك محال
الله كتب باللوح رزق البريات

الصاد صيدي يوم اغني دياري
شفقن على هاك الفياض العذاري
ما هوب صيدي قلة(ن)بالبراري
الا لنا في نجد بسطه وسجات

والطا طبيبك لغشتك الهموم
ووجست في قلبك اسوات الغيوم
عليك بذكر الله عليها تدوم
يرحمك رب(ن)عالم (ن) بالخفيات

والعين عامل بالموده وسامح
وعرف ترا بالناس صالح وطالح
واللي يودك في مواريه واضح
بالوجه لا قابلك ارسوم (ن) وشارات

والقاف قل اللي يريد المطاريش
اياك والوحد وخل المخاريش
اللي افعوله دايم يكدر العيش
اهل السماجه والدروب الرديات

والكاف كفكفت الدموع الغزيره
وشبت بقلبي ياجماعة سعيره
لا شفت بالصحراء فعول(ن) خطيره
تصيب قلبك بالمشقى بحسرات

[شرقاوي]

صح لسانك يانهار على الالفية الجزلة

[ابو فراس]

صح لسانك يانهار وياليت يكون عندنا بالمنتدى تنسيق للشعر

[ثامرالماضي]

بسم الله الرحمن الرحيم

الغالي نهار

صح لسانك وبيض الله وجهك ... وهذي نجد الغاليه تستاهل والله ...

والحا حليّ لنجد ما فيه لله = خصٍ ليا جاها وسوم تعله
ودلت عليها السحب ماها تهله = تصبح براريها مروجٍ وجنات


الله يعطيك العافيه وماقصرت ...

ولكن باقي التكمله ننتظرها ..

,,,,,,,,,,,,,,,,,,,,,,,,,,,,,, تحياتي لك ,,,,,,,,,,,,,,,,,,,,,,,,,,,,,,,,

[نهار]

شرقاوي
ابو فراس
ابو شعلان
صحت ابدانكم اخوتي الكرام وتشرفت كثيراً بمروركم الكريم

تحيتي ،،،

[العنبري]

صح لسانك

بارك الله فيك اخوي نهار على هالفية الرائعة

اتمنى لك التوفيق

تقبل تحياتي

[خالد الشريهي]

أخوي نهار

صح لسانك على هالالفيه الوافيه

بانتظار الباقي من اللام الى الاخير

تحياتي

[ولد نجد]

والدال دنت نجرك في وسط خبه ---- وادنيت من صافي حطبها تشبه
وحطيت بدلالك زلاله وحبه ------------يا زين فايحها بريح الرميثات

آه ياقلبي هذي المنوه خاصة لاصارت الأرض خضراء وممطورة وان كان فيها رذرذ مطر ياسلام

صح لسانك ملايين ... لكن وين باقيها ترانا طماعين يالغالي
الف شكر اخي نهار

[يعقوب الوهيب]

والـ لام عـيـّا علينا "نهار" وسكت
عن وصف جزل وارواحنا شكت
اكمل عسى عيني عليكم ما بكت
واذاننا لهرج مثلك سامعات

................
صح لسانك يا خلفهم ، منظومة رائعة ومعاني جزلة ، ولا تحرمنا من ابداعاتك القديم منها والجديد.

[فهدالدوسري]

الاخ الغالي
نهار
السلام عليكم
صح لسانك يالغالي الله ينت وصفت حالتنا وصف
بهالقصيده الله يجزاك عنا كل خير
ترا نحتري قصيده مثل هذي واحسن
لكن مالومك مع حر هالقيض انك تقول هالقصيد
اخوك
خشم الحصان
............
نغزة.......... علي وزنية ابن عمار....... ترا لها طربه

[نهار]

العنبري
ثهلان
ولد نجد
المربد
خشم الحصان
صحت ابدانكم يعطيكم العافيه
تحيتي

[راعي الشاص]

صح لسانك يانهار
الالفية هذي روعة .
ما شاء الله عليك، شاعر ومتمكن
لاهنت

[نهار]

يعطيك العافية ياراع الشاص وصح بدنك

تحيتي ،،،

[حامد الغامدي]

نهار: جعل ايامك دوم أفراح، هذا الشعر ايش يسمونه، انا أشوف ناس بالحجاز يقولون مثله، وأعجبني هذالحرف

والخا خاويت اقروم للبر مرات
ما هيب خوة من يعد الريالات
اهل الشبوح اللي على الدوم عليات
اهل المراجل والسنع والمروات

بارك الله فيك على هذا الطرح المتميز.

[محمد المعارك]

نهار .. شاعر يحب الرحلات والصيد.

صح لسانك يا شاعرنا المحبوب وأبيات رائعة ومعبرة عن واقع الحال .

باقي كم حرف ياشاعرنا ... متى التكملة ؟

بارك الله فيك.