تعالوا نتكلم عن كيس النوم

[حامد الغامدي]

بسم الله الرحمن الرحيم

انتم تعرفون ان أسعار كيس النوم كثيره من 70 الى 450 ريال تقريبا يمكن يكون أقل أو أكثر، فهل فرق السعر بسبب البطانه، أو نوع القماش الخارجي أم هناك سبب غير هذا.
على السريع أشتريت انا كيس نوم مبطن ببطانيه وهو دافىْ جربته في البر وكانت درجة الحراره تقريبا 10 درجات بالليل.
هناك نوع أخر بنفس السعر ومبطن فرو واكيد صناعي عند واحد خوينا يقول يدفي، انا دخلت فيه ولاحظت ان البطانه واحده أي سمكها واحد ولكن كلا الكيسين غير مريحين في النوم من ناحية ان البطانه اللي تحتك ليست سميكه مثا الطراحه، كأنك نايم على بساط أو زوليه، وانا أشوف انه غير مريح.

سؤالي هل كل أكياس النوم بنفس سماكة البطانه أم تختلف، وعموما بالمعدل العام ما هو أفضل كيس نوم، من ناحية النوعيه والصناعه وأين يباع.
أشكر لكم مقترحاتكم، وكل المعلومات الوارده منكم بهذا الخصوص. تقبلوا تحيات محبكم مهراس.

[راعي الهدد]

.

الأخ الغالي مهراس

نصيحة محب ومخلص لك

لاتشري غير فراش الدريويش بطانه داخليه فرو

غير هالفراش لاتدور

اسمح لي اسوي شوي ثرثره عن فراش الدريويش الأصلي
وليس المقلد

1 فراش الدريويش معزول بعزل قوي كذا طبقه

2 مريح مره تصدق انك اوقات تفضله على سرير البيت ههههههه اي والله

بس سرير البيت فيه مزايا أخرى ماتحصلها بفراش البر
ههههههههههههههههه

خلاص كافي عاد عياره هههه

3 القماش الخارجي تنزاني أصلي رقم 303

4 السحابات اصلية وقوية جداً

5 واسع من الداخل وبمقاسات معقوله

6 يحتوي على أربطه قوية ومتينه بعيده كل البعد عن التلف بأذن الله

7 ومن الداخل فرو متين ودافي جداً جداً

8 يوجد داخليه مكان بجانب الرأس لحفظ الأشياء المهمه

او التي تحتاجها قريباً منك كالبوك والأغراض المهمه التي تود تتخلص منها فترة النوم فقط تضعها بمكان مخصص بجانب راسك عباره عن مخبا بسحاب

9 لو تصب فوق الفراش طاستين ماء ماخر ولا نقطه

10 صبور ولا يقول لا

وش بعد وش بعد

اقول اشتره ولا تدور غيره ونخوك

واذا ماهو عندكم بالحجاز فاعتبر وصلك واحد من ابو حمد يالغلا

راس مالها عنوانك ياصل وعلى طول ياصلك الفراش يابو فهد

غداً أحاول انزل له صور بأذن الله وستقتنع منه

.
.

[سحمان السبيعي]

انا مع راعي الهدد فعلا الدرويش احسن فراش جربته يجي فرو او قطيفة ونوع ثالث مدري وشهو بس انه رائع و ثفيل و يوقي من البرد له معي الان حوالي خمس سنوات وهو رائع فعلا

[ريع الدياب]

كيف تميز الأصلى من التقليد وكم سعر الأصلى ووين نلقاه فى الشرقية أو الرياض ؟

[راعي الهدد]

المشاركة الأصلية كتبت بواسطة ريع الدياب

كيف تميز الأصلى من التقليد وكم سعر الأصلى ووين نلقاه فى الشرقية أو الرياض ؟

بسيط تمييز الأصلي من المقلد

الأصلي واضح جداً من نظرتك له متين وتحس ان قدامك فراش

ثاني شي يوجد عليه ختم خاص بالدريويش عند مربط حبال الفراش

الختم جاي بشكل طولي على عرض الفراش وبقدر كف اليد

مكتوب عليه الدريويش ومواصفات الفراش ومكتوب احذروا التقلدي وهكذا

لون الختم أزرق وأحمر

عموماً هو واضح وسعره قرابة 370 ريال فقط لاغير

وببلاش والله خلك تنام فيه شرط تقول لابوك 370 على ابو من جابك

وستغط في سبات عميق عميق عميق

هههههههههههههههه


أماكن بيعه المأمونه بالرياض

وجدته قبل فتره عند برق الحيا بالرياض مخرج 15

صاحب المعرض أنسان ملتزم وفيه خير وقابلته بنفسي فنعم الرجل ابو سليمان

ولايمكن يسوق بضاعه مغشوشه او مقلده

او تجده في محل واحد بالغاربي في قيصيرية الخيام عند اليمني الي قبل الكردي

بس ترى خبري بهذا قديم مره ولا ادري وش حالهم الآن

عموما سأطرح رقم تلفونهم الموجود على الفراش

واستمتع بالدق عليهم واستمتع بنطل الدراهم لهم

هههههههههههههههههههههههه

صباحكم عسل ياعسل

[ولد نجد]

مرحبا ابا فهد
السليب باق تختلف أسعارها باختلاف الخامة وجودتها
طبعا الافضل الصناعة الامريكية خامة بلوستر وبعضها يتحمل إلى درجة -30
سبق ان اشتريته من الغرابي من احد الموزعين قابلته بالصدفة هناك ولا اعرف له محل لان هذا حصل قديم جداً
عموما ان وجدت مثل هذا فانصحك باقتناءه ... وان لم تجده فاماكم خيارين
ان تقوم باختيار القماش " الخامة " بنفسك وتخيطه على طربال تنزاني
أو تقتني فراش الدريويش الأصلي كما قال اخونا الغالي ابو حمد ... والله يوفقك

[راعي الهدد]

المشاركة الأصلية كتبت بواسطة ولد نجد

مرحبا ابا فهد
السليب باق تختلف أسعارها باختلاف الخامة وجودتها
طبعا الافضل الصناعة الامريكية خامة بلوستر وبعضها يتحمل إلى درجة -30
سبق ان اشتريته من الغرابي من احد الموزعين قابلته بالصدفة هناك ولا اعرف له محل لان هذا حصل قديم جداً
عموما ان وجدت مثل هذا فانصحك باقتناءه ... وان لم تجده فاماكم خيارين
ان تقوم باختيار القماش " الخامة " بنفسك وتخيطه على طربال تنزاني
أو تقتني فراش الدريويش الأصلي كما قال اخونا الغالي ابو حمد ... والله يوفقك

أحسنت أخوي ولد نجد

والفراش الأمريكي من أطيب شي من ناحية الدفا

لاحظ من ناحية الدفا

وسبق وأهدي لي نوعية منه بولستر ومحشي جوا بريش طيور

لكن عيبه أنه ضيق جداً يالله تقدر تنقلب فيه ويتكك تك

وإلا هو دافي ووذف وخفيف جداً جداً لكن عيبه فادح

أما عن انك تفصل لك على مزاجك فأنا معك

لكن أول شي بيلزخونك مع علباك وفي رواية هامتك بالسعر

ولن تجد كجودة الدريويش والله اعلم

لي تجربة طويلة ربما تكون خاطئه لكن أطرحها للأمانه

ربما أقول

أمتكلت اكثر من 5 أنواع من الفرش البعض منها قلت للمحرقه

والبعض الآخر تركته عندي لمن يريد يستعير من الأخوان والأحباب

وتدرجت فيها ولم أجد افضل من الدريويش كجوده ودفا

وقوة تحمل وصبر وكتقسيم داخلي

وهو الآن في نظري الأفضل في السوق

البعض يقول أن الدريويش كبير حجمه

أقول نعم كبير شوي

لكن عليك بكثر المقانيص والطلعات وستجد أنه أنظغط وانرص

فلازم مع جدته يكون منتفش مثل اي شي جديد هههه

عموماً أشتر دريويش ولا تشاور هذا رأيي والله اعلم

[حامد الغامدي]

راعي الهدد:
يابو حمد الف شكر على شرحك الوافي وأسلوبك في بيان مزايا هذا الفراش، وانا أعتبر انه وصلني الله يحييك ويكثر خيرك، والصوره تكون كملت جميلك لو عند صوره.
ولو أحتجت المزيد من التفصيل ما تقصر رحم الله والديك.، تقبل خالص تقديري.

كان:
يعطيك العافيه على الرد، وانا مرتاح كلش من كلام أبو حمد.

ريع الدياب:
يعني ولو ان السؤال ماهو مباشر لي، لكن كثر خيرك على هذه النقطه المهمه، كملت الموضوع يابو اسماعيل جزاك الله خير.

ولد نجد:
الله يبارك فيك على المشاركه بالمعلومات الجديده عن الفراش الأمريكي، وانا قد سمعت انه يدفي أكثر من الوطني، ان شاء الله أحصله موجود في جده علشان نفسي تقنع منه اذا هو حسن شريته واذا كان غير ذلك خليته، يرعاك الباري.

راعي الهدد:
دعواتي لك على التوضيح مرةأخري، الله لا يحرمنا من توجيهاتك وخبرتك الطويله.

[ماجلان]

هذا فراشي



عمره أربع سنوات وشوي وسعره كان في ذلك الحين 360 ريال على ما أتذكر

[ودي اكشت دايم]

تعالوا نتكلم عن كيس النوم

جئنا لنحتسي عن فراش النوم

لاتشري غير فراش الدريويش

وش بعد وش بعد
اقول اشتره ولا تدور غيره ونخوك
واذا ماهو عندكم بالحجاز فاعتبر وصلك واحد من ابو حمد يالغلا
راس مالها عنوانك ياصل وعلى طول ياصلك الفراش يابو فهد
غداً أحاول انزل له صور بأذن الله وستقتنع منه

احلف قل قاا ان موعايلتك الدريويش ولا لك علاقه فيهم
ياخي على هالدعايه تستاهل وسام الدرجه الاولى لتسويق ومدير مبيعات لهم
بس ماش غير هالسليب باق مااغير

[الروضة]

أخوي أبو فهد
أنا مسوي لي واحد طربال تنزاني ومحشي صوف ( غنم نعيم ) طبعاً عند صاحب المحل مندفة وهو جاب الصوف وخلط معه بولستر وخاط فوقة أيضاً بطانية وتكلفته 400ريال تقريباً
وتصور قبل أمس درجة الحرارة 6تحت الصفر بصراحة ماشعرت بالبرد
وربعي يقولون برد

[كساب2002]

السلام عليكم يالربع
انا جربت فراش الرميح عند الرمايه سعره270خفيف الوزن ودافى وعليه غطاء خارجى للحمايه ممتاز
وفراش الدريويش لايعلى عليه ولكن يعيبه الحجم..........وسلامتكم.

[حمد الجبيرى]

كلام الجماعه 100% وابغى احذر من الفراش الى معبا داخليه من الريش لأنه يجذب الثعابين الله يحفظنا وياكم

[ابو صقر]

مرحبا بك يابو فهد

ماشاءالله الشباب ماقصرو في الموضوع كفو ووفو
رغم ان في طلعتنا الاخيره كان واحد معه فراش القاضي مشتريه في مبلغ خيااااااالي

انا عندي اضافه بسيطه ماتتعلق بنوع الفراش

في الفراش عندي مشكله ازليه مادري تعانون منها ولا بس انا
الا وهي برودة القدمين لاتقولي دبل الشراب او الشراب ابو اصابع حتى بدون شراب
كلهم جربتهم بس مافيه فايده (قوالب ثلج)
بس جربت الكماده حط فيه مويه حاره وقبل تنام حطها بفراشك
وراح تشوف الفرق
انا اول مره اجربها يوم السبت 13/12/1428هـ في النفود الكبير وكانت درجة الحراره -6
وجابت نتيجه جيده
هذا والله اعلم

[محمد المعارك]

هل كل أكياس النوم بنفس سماكة البطانه أم تختلف،

الإجابة عندي : لا
تختلف ... لكن أغلب أكياس النوم طبقة واحدة فقط

أنا أستخدم فراش الخليج من السنيدي سعره على ما اعتقد 390 0 العام الماضي. وهو عندي منذو أكثر من عامين وهو دافيء بصراحة لكني أستخدم خيمة صغيرة للنوم واعتقد ان فيه مزايا

أخي مهراس ... في مثل برد هذه الأيام لابد من استخدام الفروة أو بطانية داخل الفراش حتى تشعر بالدفء فدرجة الحرارة في الشمال وصلت الى أكثر من سبع درجات تحت الصفر.

أتمنى لك التوفيق.