انا قبل مبلغ من العمر عشرين** حبيت لي في الكون ثالث حبيبه....القدس لشاعر غازي بن عون

[ابو سعد الرويس]

انا قبل ما بلغ من العمـر عشريـن=حبيتلي فـا الكـون ثالـث حبيبـه
ما حب قلبي غيرهـا غيـر ثنتيـن=ياليتهـا مثـل الحبـايـب قريـبـه
أزاور الثنتين مـن حيـن لا حيـن=ومريـم زيارتهـا عليـه صعيبـه
مقدارهـا عنـدي وعنـد الملايـن=وزنه ثقـل مقـدار مكـه وطيبـه
وحبيلهـا بخـلاف حـب المحبيـن=اللي يلاحـظ فيـه شكـه وريبـه
وحبيلها تمليـه اللأخـلاق والديـن=ولابه مـن المنقـود عيـب يعيبـه
وأنا مابا الاشوفهـا شـوف بالعيـن=وحال أبرهه بين الحبيـب وحبيبـه
شريـفـه محبـوبـت للشريفـيـن=بكف الخبيث اللـي يبيهـا خطيبـه
يالنود ياللـي فـي سنعهـا تهبيـن=اقفـي بسراهـل الهـوى وقبليبـه
اذا تكرمتـي بعـد مــا تـوديـن=علمي لها اخذي علمهـا وأرجعيبـه
وقولي محبك لايعـه لايـع البيـن=من الشوق غاديت ضلوعه حطيبـه
ومن يوم مرسولي عطاها العناويـن=من البعد زارتنـي زيـارة غريبـه
يوم الدجى الداجي زلف منه ثلثيـن=فا الحلم جتني عقب طول المغيبـه
ومن الفـرح سألتهـا وش تريديـن=قالت على أحبابي جروحي عطيبـه
ما تدري أني من ثلاثـه وخمسيـن=وطرفي من اللوعات يجري شعيبـه
واحفاد خلاني لـي اليـوم ناسيـن=وانا انسبي مثـل السبايـا غصيبـه
والله لو ان اجـداد الاحفـاد حييـن=مـا تنحنـي هاماتـهـم للغليـبـه
واحبابي اهل المجد عينتهـم ويـن=اللي لهم في ماضي الوقـت هيبـه
أقصد هل القرآن وأهل الصحيحيـن=وهل العزايم وأهل الاريا الصليبـه
واهل الحديبيه واهل بـدر وحنيـن=واهل سيوف من عداهـم خضيبـه
اللي عن السنـه ماهـم بمتحاديـن=ورجالهم في الحرب ينطـح كتيبـه
لو أن جمع عداهم اكثر من الصيـن=لاشب سـو المـوت وردوا قليبـه
ولا يرتعـون مرجحيـن الموازيـن=بمراتع الحقران لو هـي خصيبـه
ماهم هل الاعراف واهل القوانيـن=وهم مسلمين ومـن جـدود عريبـه
قلت الـذي يابنـت عنهـم تسأليـن=ركزت عليهم فا اللحـود النصيبـه
وحفادهم صارو مثل مـا تشوفيـن=ما خلصوك من الظروف العصيبـه
لو انهم علـى الكرامـه غيوريـن=ما نامـو الانـذال وانتـي صويبـه
رجالهم بالثـوب والمنظـر الزيـن=يفوق تلعـا الجيـد شقـرا الذويبـه
وأن دار فن الحرب بيـن الفريقيـن=على العـدا الرعديـد مـا ينعديبـه
يسافر من أجل العلم رخو الجناحين=وليـا لفـا للـدار بعـد تغريـبـه
ليا هو مصد عن طريـق المياميـن=ومضيـع دينـه وعيـبـه بجيـبـه
وصارت حياته بيـن كـازا وبكيـن=يـا عزتـي عـن جـادل تعتزيبـه
ولا عـم لكـن النشامـى قليلـيـن=يخط الهدف عشره وواحـد يصيبـه
وكانك تبين النصر من جيل الالفيـن=مهـمـة علىالـزلايـب تعيـبـه
صارو بسيف الحيف والذل راضين=من عقب ديد الـذل شربـو حليبـه
انتي من انجـال القـرود الخبيثيـن=مجروحة(ن) جـرح يحيـر طبيبـه
وهم في الملذات الرخيصـه مفليـن=مثل البهايم فـي الفيـاض العشيبـه
ومن جبنهم يشكون من ظلم ياميـن=على عدو الديـن الاخـر صحيبـه
اللي على نهب الديـار متواصيـن=كـل يبـي يجيـه منهـا نصيـبـه
ونداك ياللي فوق الاشهـاد تنخيـن=لا معتصـم لامـن صـلاح يجيبـه
وحنا بعد كنا علـى الضـد قاسيـن=ونثبت على ما صابنا مـن مصيبـه
اليـوم نمشـي للمذلـه مطيعـيـن=نلوى مثل خضر الغصون الرطيبـه
المسجد الاقصى تحت بطش رابيـن=ونشجب ونستنكر بعـد مـا غديبـه
والشجب في الاعلام ما يقضي الدين=ولا تستعاد بـه الحقـوق السليبـه
ان ماحصل يوم مثل يـوم حطيـن=كـل أذاعـات العالميـن تحكيـبـه
مـن دون بيـت ثالـث للحرميـن=نبيـع اللأنفـس والحيـاه بزبيـبـه
ان كان ما عشنـا عليهـا عزيزيـن=عيش المذلـه والجبـن وش نبيبـه
وياللي لتفريـج المصيبـه ترجيـن=ارجي فرج راعي الفرج وابشريبـه
مغيـر الأحــوال رب الثقالـيـن=اللي من اخلص بالعمل لـه يثيبـه
والحق شمسه تجلي الليـل وتبيـن=والظلـم مهمـا زاد ثلجـه تذيبـه
وصلوا على خاتـم جميـع النبيـن=اللي الى القدس الشريفـه سريبـه

[ريع الدياب]

ابو سعد الرويس ... جزاك الله كل خير
وصح لسان الشاعر غازى بن عون

أنا أشهد

ونداك ياللي فوق الاشهـاد تنخيـن = لا معتصـم لامـن صـلاح يجيبـه

[ذيب برقا]

يعطيك العافيه على القصيده الرائعه
وماقصرت ياابوسعد الرويس

جزاك الله خير

وصح لسان الشاعر ...غازي بن عون

وهو شاعر معروف في قبيلتنا عتيبه الهيلا

وتقبل مروري


اخوك...ذيب برقا


ودمتمـــ...بود

[ابو سعد الرويس]

المشاركة الأصلية كتبت بواسطة ريع الدياب

ابو سعد الرويس ... جزاك الله كل خير
وصح لسان الشاعر غازى بن عون

أنا أشهد

ونداك ياللي فوق الاشهـاد تنخيـن = لا معتصـم لامـن صـلاح يجيبـه

هلا اخي الغالي ابو اسماعيل

وتشرفت بمرورك يالغالي

[ابو سعد الرويس]

المشاركة الأصلية كتبت بواسطة ذيب برقا

يعطيك العافيه على القصيده الرائعه
وماقصرت ياابوسعد الرويس

جزاك الله خير

وصح لسان الشاعر ...غازي بن عون

وهو شاعر معروف في قبيلتنا عتيبه الهيلا

وتقبل مروري


اخوك...ذيب برقا


ودمتمـــ...بود

هلا والله بذيب برقا حيااك الله

والشاعر معروف على مستوى الخليج

حياااك الله وشاكر لك على المرور

[محمد بن سيف]

يابن مروح بارك الله فيك على القصيده الجزله للشاعر غازي بن عون .

ما حب قلبي غيرهـا غيـر ثنتيـن
ياليتهـا مثـل الحبـايـب قريـبـه
أزاور الثنتين مـن حيـن لا حيـن
ومريـم زيارتهـا عليـه صعيبـه
صح لسانه
وبيض الله وجهك يالناقل
عليم العطش

[ثامرالماضي]

بسم الله الرحمن الرحيم

أخوي أبوسعد ... بكل صراحه أبدعت بنقل هذه القصيده الأكثر من رائعة ... للشاعر المبدع المحبوب غازي بن عون ...

لاهنت وبيض الله وجهك ... وصح لسان إبن عون وجزاه الله خير ...

مشكور وماقصرت ...

وننتظر المزيد ... من كل جديد ...

,,,,,,,,,,,,,,,,,,,,,,, تحياتي ,,,,,,,,,,,,,,,,,,,,,,,,,,

[ابو سعد الرويس]

المشاركة الأصلية كتبت بواسطة عليم العطش

يابن مروح بارك الله فيك على القصيده الجزله للشاعر غازي بن عون .

ما حب قلبي غيرهـا غيـر ثنتيـن
ياليتهـا مثـل الحبـايـب قريـبـه
أزاور الثنتين مـن حيـن لا حيـن
ومريـم زيارتهـا عليـه صعيبـه
صح لسانه
وبيض الله وجهك يالناقل
عليم العطش

ابو سعد ابووووه

ابن مرووح

ههههههههههههه

وش دراااك لا تكون انت من عيال مروّح

هههههههههههه

هلا حياك الله اخي علم عطيش

وبارك الله فيك

[ابو سعد الرويس]

المشاركة الأصلية كتبت بواسطة أبو شعلان

بسم الله الرحمن الرحيم

أخوي أبوسعد ... بكل صراحه أبدعت بنقل هذه القصيده الأكثر من رائعة ... للشاعر المبدع المحبوب غازي بن عون ...

لاهنت وبيض الله وجهك ... وصح لسان إبن عون وجزاه الله خير ...

مشكور وماقصرت ...

وننتظر المزيد ... من كل جديد ...

,,,,,,,,,,,,,,,,,,,,,,, تحياتي ,,,,,,,,,,,,,,,,,,,,,,,,,,

هلا يابو شعلاان بارك الله فيك

وما قصرت على التنسيق الطيب

وابشر بالجديد اللي يطربك