استمتع مع صور سيول الصمان الخميس 7صفر1434(ابوالجازي)
حي الله كلا باسمه الله يمسيكم ويصبحكم بالخير
الاسبوع الماضي كانت لنا رحله للصمان ووفقنا بأجواء ماطره وجميله ورائعه يوم الخميس
في ليلة الاربعاء كانت التوقعات تشير الى احتمال نزول الامطار على الصمان من بعد الثانيه عشر ليلا واتفقنا على ان يكون المراح ليلة الخميس في طرف عرق المغنا لان النفود افضل وقت الامطار من الفياض والحزوم والشغايا وفعلا نزلت علينا الامطار في منتصف الليل وكل واحد منا زابن خيمته
وهذي صوره لمراحنا صباح الخميس
وهذي صوره من الجهة الثانيه من اعلا والاجواء الغائمه الجميله
هذا ابو انس الفضل (صديق البيئة الاول) لايترك اي بلاستيك اوحديد او فلين الا ويحطه بكيس معه ونهاية الرحله يضعها في (حاويات الزبايل) اجلكم الله في مداخل المدن والقرى وعلى الطرق والمحطات
اما القرطاس والكراتين فيقوم بحرقها
فجزاه الله خير الجزاء
مشينا من مراحنا بأتجاه الفياض واول ماجينا الحزوم واثر الشغايا تمشي وهذي بعض صور الشغايا وهي تمشي
وهذا شلال صغير
وهذي احد الشغايا المربعه وفيها ماء
وهذي بين الفياض
حتى روس الحزوم بدت تنقع
وهذي صورة الخط وهو فيه ماء
يوم بغينا نوقف نصلح غدانا قلنا ماتصلح الحزوم والفياض لان السماء ملبده بالغيوم ونجي بذيك الرميله ونفل الشراع لكن الشرع عز الله انه مسكت لولا الاصوات مع الهواء الشديد لكن ازين مافيه انه صغير الحجم وسهل ويذري عن المطر والهواء وهذي صورة الشراع بين المواتر وبالفعل امطرت علينا
وهذي صوره من داخل الشراع وابوابراهيم السعيد يظبط النثريه الله يبيض وجهه
وهذي من جهه اخرى ويظهر بالصوره على اليمين ابو ابراهيم الصانع وعلى اليسار ابوابراهيم التركي ولاحظوا اثر المطر على ثيابهم
هذي صورة قوس الرحمه وعادتا يظهر عند نزول المطر مع ظهور الشمس في وقت واحد ويظهر غالبا بالجهة المقابله للشمس
نبداء الان بصور بعض الفياض المليانه بالماء والخباري والموقع جنوب شرق حسنا السبق بتقريبا 10 كيلو الى 4 كيلو
وهذي جزيره في وسط المياه باحد الفياض صوره طوليه
وهذي عرضيه من زاويه اخرى
مع الغروب
اثر السيل على الارض مجرحها تجريح
وهذي فرس مع الابل بدكاكة مويثل
طبعا ماصورة فيضة حسنا لان قبل المغرب قالوا الشباب نبي نطلع للدكاك نبي نفك الطيور على حمام ونمرح بالدكاك لايجينا مطروقلت ان شاء الله بكرا نكمل التصوير اثر ابو انس وحنا ندور لنا مراح بالليل طيّر حبارى وقمنا الصبح ندوره والارض ممطوره ولا تبين الجره ويوم اضحينا عجت علينا وزاد العج ولا رحنا للفياض
انتهى الموضوع وارجو ان ينال على اعجابكم واستحسانكم
ماشاء الله عليك تقرير رااااااائع وتصوير قمة في الاحترافيه
ننتظرك بكل شوق . ولقد ابدعت كثيرا و اتحفتنا بهذه
الصور التي تشرح الصدر
ههههههه نفسي اسئلك يا ابو الجازي .. كيف طلعتو من الورطه هاذي......
هلابك وغلا يالخلف
سعدت بردك
واللي بالصوره ماهوب حنا وترا لهم مطلاع من الجهة اليمنى من الصوره والماء ماصك عليهم فيه منفذ
لاهنت واشكرك على مرورك والاطراء