قصة وصورة صل لقيته خارج باب المسجد الله يكفينا واياكم شره

[راعي الشاص]

السلام عليكم

يوم الجمعة الماضية كنت برحلة يم نفود الثويرات وبصراحة الجو عج وغبار لكن وش تقولون بالمولع ، مالكم بالطويلة وانا راجع وقفت اصلي العشاء بمسجد النبقية ويوم خرجت من الصلاة واثر ذاك الجهام اللي (يبلص) <<< يعني يلمع واثره صل أسود ( أكيد انه أسود، عمركم شفتو صل احمر؟) ومعروف ان الصل اخطر انواع الثعابين ، لكن هذا يثبت ان المنطقة لاتخلو من الصللة

[أحمد العريني]

أخي راعي الشاص الحمد لله على سلامتك
وش مصير الصل

[محمد المعارك]

الحمد لله على سلامتك ياراعي الشاص
الصل خطر جداً وسريع الحركة ... والله يكفينا شره .
بارك الله فيك.

[راعي الشاص]

هلا بك اخوي قلم رصاص والف شكر لك.
الصل رضحت راسه وواضح بالصورة انه صريع

[فهدالدوسري]

الاخ الحبيب
راعي الشاص
السلام عليكم
اخي الغالي الحمدلله علي سلامتك اولآ
ثانيآ الهوام قد خرجت من جحورها نسال الله السلامه ولكن الحذر وابدا الاسباب واجب
ولدي نقطه مهمه الا وهي لبس الاحذيه ام رقبه طويله (بسطار) كرمكم الله جميعآ
فهي ان شاء الله واقيه بعد الاتكال علي الله
اخوك
خشم الحصان
..............
نغزه....... ول مستغل الغبار اشون انك مادنقت تاخذه تحسبه لي

[ثامرالماضي]

بسم الله الرحمن الرحيم

الحمدلله على السلامه أخوي راعي الشاص ... وفكك الله من هالبلية ...

وش الوضع اللي لقيته فيه ... واقف وإلا ملتوي ...

ماننتظر لامزيد ... ولا أي جديد ... من هالاشياء

,,,,,,,,,,,,,,,,,,,,,,,,,,,,,,, تحياتي لك ,,,,,,,,,,,,,,,,,,,,,,,,,,,,,,,,,,

[عاشق النحم]

اعوذ بالله من شره ومن شر كل من به شر

هذا مرة كنا نتقهوا من هالخادر عقب العشا(شوي) واخطأنا بأنا حلتنا العضامة والبواقي حول مكان قعدتنا
ولعله شم الريحه الماخوذ وجا

والله و يلبط على الزوليه

والنتيجه كالعاده يرضخ راسه

لكن المشكله الا منك ما شفته

لذاك احرصو على اذكار المنزل و قراءة المعوذات والله خير حافظ

[النداوي]

الحمد لله على السلامة يا راعي الشاص

أخوك أبو عبدالله

[محمد الديحاني]

الحمد لله ياراعي الشاص
والله يكفينا واياكم وكل مسلم شرها

[عبدالكريم اليوسف]

الحمد لله على سلامتك
وزين ماسويت
الله يفكنا من كل شر

اخوك

[راعي الشاص]

خشم الحصان، ابو شعلان ، عاشق النحم، النداوي، راعي اللاند، راعي الذوق.
كل الشكر والتقدير لكم على ردودكم واأسف على تأخر الرد.
ولاهنتو.

[نهار]

الحمد لله على سلامتك وزين انك ذبحت هالاقشر الله يكفينا وياكم شره
تحيتي ،

[راعي الشاص]

الله يسلمك اخوي نهار
الحمد لله على العافية
وجزاك الله خير ياشاعرنا

[Abdullah K. AL-Hassan]

اخوي راعي الشاص

ألف الحمد لله على السلامة

والله يكفينا شرور الثعابين والمسلمين أجمعين

و

أحرصوا على الأذكار يأخوان

تحياتي أخوكم أبومحمد

[هزيم الرعد]

الله يستر
حتى شكله سبحان الله يخلي الواحد يخاف منه
هاللون الأسود تحس إنه شرير << صار هذا شرحبيل اللي مع السنافر مهوب صل
الحمد لله على سلامتك والورد الورد