ارشيف راعي كيف( 1 )^&^

[راعي كيف]

السلام عليكم ورحمة الله وبركاته
ودي انفض الغبرات عن بعض الصور القديمة وانزلها بين حين واخر إن شاء الله

اليوم جايبلكم صور اول سيارة كانت معي وتوي طايح بالبر متحمس مديل 1988 غمارتين نيسان في نفود روضة مساعد ( عنيزة في رمضان من سنه 1413هـ )
الصور من كميرة عادية تحميض مدري وشي لأن كان عندي يجيلهن 30 كميرة بسم الله نبداء الحلقة الأولى

لاتحرموننا من تعليقاتكم

اخوكم المحب راعي كيف
ابو ناصر

[سحمان السبيعي]

شكرا اخي راعي الكيف على هذه الصور والمشاركة بها

[ابو فراس]

ابو ناصر ايه ذكرتنا ايام رمضان كان شتاء قارص كنا بين يوم والثاني نفطر بالمصفر او ورا العوشزية

[ريع الدياب]

الغالى راعي كيف

هذه الصور لازم تضاف الى مهرجان الجنادرية التراثى

[ثامرالماضي]

بسم الله الرحمن الرحيم

الغالي أبو ناصر ...

الله المستعان ... والقدر الكاتم يوم شفته ضرب شوط مخّي والله ياهو قديم ...

والله ياأنت قديم صدق ... والدليل شف الزيت والبساط هههههه

لاهنت يابوناصر ... والله يحسن خاتمتك ...

وننتظر المزيد ... من القديم والجديد ...

,,,,,,,,,,,,,,,,,,,,,,,,,,,,,,,,, تحياتي لك ,,,,,,,,,,,,,,,,,,,,,,,,,,,,,,,,,,,

[ولد نجد]

ايه يابوناصر
واضح ان لها ذكرى جميلة عندك
لكن ليش الكشتة جنب الخط

[ابو صقر]

بسم الله الرحمن الرحيم

يامل العافية يابو ناصر
اثرك من زمان بري
بس شويات الصور زود يامل الغنيمه

مشكور يالغالي

[يعقوب الوهيب]

اسم الله علي
اسم الله علي
سنة 1988 ؟؟؟
اثريك قديم !!
راحت علينا حنا الشباب ما لحقنا على قدور الضغط الايرانية !!

ابو ناصر بانتظار بقية الحلقة الـ ((88)).

[راعي كيف]

السلام عليكم

هلا هلا والله بالربع كلهم

اخوي كان
كان زمان حياك الله وياهلا وغلا .


ابو فراس لاتصير بس من شيبان عنيزة وانا مدري بس صحيح كانت برد موتوكانت ربيع بعد كنا نطلع الظهرية ونفطر ونعين من الله خير ونتعشاء ونرجع للديرة ننام وعلى الحاله كل رمضان الله يجيبة يجيلة اكثر من 15يوم على الحاله فاضين الله مستعان ياهلا ويامسهلا بك .

ريع الدياب هلا وغلا ويسعدني مرورك وتعليقك تصدق عاد ايام الجنادرية كنا نمشي حافين صحيح ليه ماتصدق عموماً اهم شيئ انك امبسطت

[راعي كيف]

السلام عليكم

أبو شعلان بسم الله عليك لو اني داري مانزلت الصور اهم شيئ سلامك يابعد قلبي يابو شعلان ( والله ياشكلك جلف شعلان ) البساط طال عمرك ربعي تأمرو علية إلين اخفوة عني طالعمرك وكانت فية فكرة حلو والحين طوروها الهي مشقوق من النص علشان النار الله يكفينا شرها ( امين )
ولاندمت يابو شعلان وتراي صغير عمري 23سنه قبل عشر سنسن ههههههه وابشر بالزين .

اخيي ولد نجد اكيد لها حنين وسط القلب اااه بس الله يعيد ذيك الأيام و من ناحية الخط اخبر ان الخط عنا 20او 25 كيلو طال عمرك والخط الأزرق هذ طلع من الكنار الله يجيرك من النار سعدت بزيارتك.


ابو صقر الغالي وازيدك من الشعر بيت بحري بعد هههههه ولا اكل إلا بربري وخوياي كلهم راعين بربرة ( يعني سواليف)لاتروح بعيد وابشر بالصور هذا يسمونه الهدواء قبل العاصفة شف رد المربد بعدك عارف متى اخر حلقة ههههههههه


محبك راعي كيف
ابو ناصر

[راعي كيف]

السلام عليكم


المربد هلا والله وغلا من زمان ولا رساله ولا شيئ ماغير ارسلك من الرسايل من الجوال ولا ترد قلت شكل الرجال حاط على حظر هههههه هلا وغلا هلا بالغالي ولا يهونون الربع .
خابرك ما تفوت شيئ تقنص لكن المرة هذي ماهيب ماشية هذي موديل السيارة طال عمرك لاتحاول تقلبة علي وكانك ملزم نجيب خشم الحصان تفتح افامنا عندة ونشوف منهو الأكبر انا خابرك تقول بيني وبين خشم الحصان 55سنه وانا بيني وبين خشم الحصان 48 سنه بس يعني لاتصغر نفسك يعني انت لاحق على قدور الحجر و النحاس وبعدين ليه تطلع الفضايح استر ومن اللي علمك ان الحلقة الأخير 88 ههههههه
الرجاء تقبل تعليقاتي مع اني عارف انك مبسوط تبي احد تشب علية مسكين ابو جراح مابقيت علية شئ

اخوك المحب راعي كيف
ابو ناصر

[نقا خريم]

الله الله الله على الشغل السنع

هاك الايام توّني حليل .. أهلي يخافون عليّ أطلع من عتبة الباب:d

لكن أتذكر هالشداد وهالفرشه الحنبليه زيــــن

لو لقيت مثلهن أشريهن بغالية الاثمان

راعي كيـــف .. إسم على مسمّـــى

اللي عندك من التحميض انثره لنا كلّـــه تكفى :d

عسى عمرك طويــــل

[حامد الغامدي]

ماشاء الله ذكريات داعبت فكري وظني، يعني تشوف 88 قديم أجل 66 ايش تقول عنه، ياعمار كان عمري 9 سنين.
ايام صور التحميض، وترجع بكره تاخذها، سبحان الله الأن الف صوره تصورها في ساعه ولا تحميض ولا بطيخ مبسمر، والا الفلم انحرق.

شكرا على هذه الصور القديمه، وياليت تنثر كل التحميض اللي عندك على قول تقا خريم.


مهراس

[عبدالكريم اليوسف]

لاعدمناك يالامير
موضوع جميل
الكاتم شكله ايراني

اخوك

[محمد المعارك]

ايه ياراعي كيف
ددسن ، كاتم ايراني شنطة عزبة قديمة ... بوقتها آخر صرعة ههه
الرس = ددسن

انا بهالفايت جيت يم الرس ودورت هيلوكس مالقيت ... هههه ...

مشكور يابو ناصر على هاالصور المتعرفطة بس وين باقيهن يابو ناصر ... ترانا متلهفين لقديمك .

بارك الله فيك.