===لا تتدخل فيما لا يعنيك===

[يعقوب الوهيب]

بالكشتات، عندي ربع متفاهمين نطلع على طول مع بعض، وحنا عارفين برنامجنا من حيث التكاليف المالية، او التكاليف العملية، يعني متوازعين الاغراض اللي نجيبها والاشغال اللي نسويها مثل فلان عليه العشاء، وفلان يحب يتفنن بالفطور، والغداء من تخصص فلان وعندنا عين السيح ابو ابراهيم عليه القهوة والشاي من ينزل من السيارة ماله شغل باحد كل همه يولع النار ويحمس ويدق القهوة ويزل الدلة ويخدر الشاي.
"تشربون او ماتشربون تراها جاهزة"!!.
تسلم يا بوبراهيم !
واحيانا يطلع معانا بالكشتات بعض الربع زياده على الفريق اللي قلت لكم، عاد بعض هالزيادة يصير نشمي وهب ريح لكن وين ما يقايش مع ابو ابراهيم.
وبعض الزيادات يصير ما يعرف شيء بالبر، فيكرمنا بوجودة وخفة ظله لان حنا طالعين وناسة وسعة صدر فتلقاه يسولف وينكت ويتذكر مواقف زينة واحيانا يحدث علينا بمواعظ ويشجع فلان وطبخ فلان ويشجع اللي يشتغلون،
"هاه ،، تبون فزعة؟" او عطوني اقطـّع معكم !! اواش تبون اسوي معكم، يعني يخفف نفسه ولو بالكلام.
وبعضهم اللهم يا كاااافي، تقول شايل معك رحاة، تخبرون الرحاة شلون ثقيلة يعني ينطبق عليه قول القايل: نفس خايسه بجلد معفن !!
لا يشتغل ولا يعجبه الشغل ولا يسولف ولا يتمشى ولاولاولاولا !!
(صاق صدري من ذكره وناوي اذكر صفاته ولكن هونت)
عادة نوصل مسيان، يعني قبل المغرب بنص ساعة تقريبا ونعاين مكاننا ونتواسى قبل المغيب والظلام، ونفل عفشنا ونشب نارنا عاد انا اللي علي العشاء وطريقتي اني ابعد شوي عن الربع واقعد بمكان اشتغل به بروحي بس عندي الراديو افتحه واحطة عندي واقعد اقطع واغسل واطبخ، وكل الربع يعرفون نظامي يجون يسولفون ويروحون كل بشانه. مرة كان طالع معنا واحد من اللي احبهم اللي قلت لكم عنهم خفيف ظل وحبيب.
جاء عندي وقعد يسولف والراديو مفتوح قلت له ها وش اخبارك يا بو سعد قال والله اليوم بالدوام عندنا مستخدم جاء يطلب سلفه حق غذاء جايينه ضيوف وما عنده يغديهم.
قلت وش قلت له قال كسر خاطري هالرجال وطبعا اعطيته. قلت وليش كسر خاطرك قال انه عنده مشاكل اسرية ومصاعب مادية و و و !!.
قلت له يا بو سعد تدري ليش حنا طالعين للبر؟
قال تغيير جو !!
اي جو؟
جو الديرة.!!
قلت له سلمك الله حنا طالعين نبتعد عن همومنا،
هموم انفسنا حتى نرجع وعندنا قدرة على تحمل مصاعب هالحياة اليومية لانفسنا ولعائلاتنا.
وانا بصراحة تعلمت اني ما ارمي همومي على الناس وبنفس الوقت ما اسمع منهم اي مشاكل شخصية
واذا حصل وسمعتها ما اتقمصها واعيشها يعني ما استمع لهم وادخل بالسالفة لدرجة اقول "والله لو انا بمكانك كان ...." واقعد منقهر وضايق صدري على فلان اللي قال السالفة وراح، وهو راح عني ونساها وانا بعدني متحسر عليه،
بل يمكن تكون في موضوع ربما ما اقدر اساعده فيه، ولا اقدر اسوي له شيء.
قلت يا بو سعد انا ما اقول ما نفزع اذا جانا عاني، ولكن اقول نتريث علشان نعرف متى نفزع ويكون للفزعة حدود والا تصير نوع من اللقافة.
لأن فيه بعض الناس يلتزم مع هذا ويواعد هذاك وعنده دايره مع اهله وعياله عندهم مطاليب وووو ولايكلف الله نفسا الا وسعها.
عاد ايشلك بالطلايب اغفل عن الناس وانتبه لنفسك، واذا طلب احد منك شيء وقتها تكون حاضر له ولمساعدته.
صح والا لأ؟؟

[ابو صقر]

بسم الله الرحمن الرحيم

الله يجزاك خير استاذي المربد
صراحة مواضيعك دروس نستفيد منها الله يلبسك العافية

انا جازلي ابو ابراهيم
ممكن ناخذة اعارة طلعه وحده بس

وطبعا هو الامير

مشكور يالغالي

[ابو فراس]

عاد ايشلك بالطلايب اغفل عن الناس وانتبه لنفسك، واذا طلب احد منك شيء وقتها تكون حاضر له ولمساعدته

صدقت يابو يوسف

[ثامرالماضي]

بسم الله الرحمن الرحيم

مشكور يابويوسف على هالتحفة .... الصراحة مدرسه من دون مجاملة ....

متعك الله بالصحة والعافية ...

والله يخليلكم أبو إبراهيم ماشاءالله عليه

وننتظر المزيد ... من كل جديد ...

,,,,,,,,,,,,,,,,,,,,,,,,,,,,,,,,, تحياتي لك ,,,,,,,,,,,,,,,,,,,,,,,,,,,,,,,,,,,,,,

[يعقوب الوهيب]

ابو صقر
رفع الله قدرك يا بعدهم
اما ابو ابراهيم فعملة صعبة

[يعقوب الوهيب]

ابو فراس
ما عليك زورد ياعمدتـنا

ابو شعلان
ما عندنا الا من بعض ما عندك يا غالي.

[الشيخ قوقل]

وعليكم السلام ورحمة الله وبركاته

يعني متوازعين الاغراض اللي نجيبها والاشغال اللي نسويها مثل فلان عليه العشاء، وفلان يحب يتفنن بالفطور،

جميل هذا الموضوع ولي تعليق على هذا السطر
أقول وبالله التوفيق
أحنا متعوّدين والنشاما اللي مثلكم وشرواكم ::: ــــ كل شخص يسد الثغرة إن وجدت بحيث أن كل عضو في الرحلة يرا نفسه فاضي ... يقوم بمساعدة المشغول فلا يجلس حتى ينتهي الجميع من العمل كي يكون الإنجاز بأسرع وقت


جزيل الشكر على إثارة مهام الرحّالة وننتظر الفوائد القادمة

[القطار]

كلام من ذهب

مثل هالمواضيع يايعقوب دايم طازجة وتحصل في أكبر الكشاتين والرحالين
أعجبت بطريقتك بالكتابة (بداياتك جميلة يابو يوسف) مدام الفكرة موجودة تتسهل دروبك باتجاه توصيل الفكرة.
تقبل مروري العطر .

[محمد الملحم]

الغالي / يعقوب . . .

عاد ايشلك بالطلايب اغفل عن الناس وانتبه لنفسك، واذا طلب احد منك شيء وقتها تكون حاضر له و لمساعدته .صح والا لأ ؟؟

صدقت بقولك ، والإنسان إذا كان يريد المساعده فأفعلها و لاتخبر أحداً بفعلك

و لا تشتكي للناس همومك ، وعش ليومك فقط لا للغد . .

وانتم مدرسة تعليمية في أطروحاتكم الله يخليك يالغالي و يحفظك من كل

سوء و مكروه . .

أخوك / أبو تالا . عاشق عيون الجواء

[يعقوب الوهيب]

المشاركة الأصلية كتبت بواسطة الشيخ قوقل

يسد الثغرة إن وجدت بحيث أن كل عضو في الرحلة يرا نفسه فاضي ... يقوم بمساعدة المشغول

مساعدة يا خلفهم !!
لكن ما يقعد يدبــّـر ،(( وراك ما سويت وراك ما تحط ؟!!))
ثم بعدين تخرب الطبخة
القصد اكبر من اعمال الرحلة يا خلفهم
القصد تعامل خياة يا جعلك تسلم
ومشكور على النبش بالفلكلور

[يعقوب الوهيب]

المشاركة الأصلية كتبت بواسطة القطار

كلام من ذهب

مثل هالمواضيع يايعقوب دايم طازجة وتحصل في أكبر الكشاتين والرحالين
أعجبت بطريقتك بالكتابة (بداياتك جميلة يابو يوسف) مدام الفكرة موجودة تتسهل دروبك باتجاه توصيل الفكرة.
تقبل مروري العطر .

بل حضورك كنز !!
وما عندنا الا بعضا من ما عندك
فلا تطل حبل النوى ....!!

[يعقوب الوهيب]

المشاركة الأصلية كتبت بواسطة عاشق عيون الجواء

عاشق عيون الجواء

عشق العيون ،، وارد
ولكن عشق الجوى ؟!!

الغالي ابو تالا
تمنيت لو طال المقام بقربكم
ولكن القادمات اكثر ان شاء الله
والف شكر على قراءتك لخربشاتي

[عبدالحميد الحربي]

ياحبي لك ولمواضيعك يابو يوسف

ذهبت ........ فأصبت

سؤالى /
(( هل نقبل بالواقع ونرضى به ... رغم إدراكنا للحقيقه )) ؟؟

أم أنّ الطَبع يَغلُبُ التّطَبُع !!!

[يعقوب الوهيب]

المشاركة الأصلية كتبت بواسطة عبدالحميد الحربي (( أبو فهد ))

(( هل نقبل بالواقع ونرضى به ... رغم إدراكنا للحقيقه )) ؟؟

أم أنّ الطَبع يَغلُبُ التّطَبُع !!!

الحبيب الغالي ابو فهد
اسعد الله اوقاتك
نعم ادراكنا للحقيقة (ولو كانت مرة) هو نصف الحل وعلينا تذكير انفسنا بوجوب التعديل حتى نتعدل شئنا ام ابينا.

ولا صحة للقول بان الطبع يغلب التطبع

ومن مارس البرمجة العصبية (nlp) يعرف تماما انه بامكان الانسان ان يغير اي طبع من طباعة وبكل يسر وسهولة.

مرور واعي
وتعليق راقي يا بو فهد

[PAJERO]

الله خلق وفرق وكل واحد له طبع
الحظيظ اللي وسيع صدر ويرفق بالناس