في خدمة احساس المشاعر .

[محمد بن سيف]

السلام عليكم ورحمة الله وبركاته

طابت اوقات الجميع بالمسرات..

واسف لمزاحمة .. روائعكم .. بهذه المتواضعه ..

لشاعر

سيف السيف ((عكاشه))
.
.
.
.
.
.
اذكروا الله ..
.
.
.
.
.
.
وصلوا على النبي..
.
.
.
.
.

في خدمة احساس المشاعر(تطوعت
............... ذاتي ) .. ولذات .. النوايا .. حميده

الشعر يامرني ..وانا لـ آمري طعت
............... طوع.. القناعه .. مالحقني .. نقيده

ابلغ (حقيقة.. نشوتي).. لا.. تربعت
................ فـ اعذب مجالات .. الخيال الفريده

واذا تجلى الفكر .. ودعت.. ودعت
................ مدار .. كـوكبنا .. برحله .. مجيده

عندي .. ثقه فالنفس.. منها تطبعت
............... على .. نقا .. دمٍ .. يضخه.. وريده

ما اعبد وجيه الخلق .. ولا تنطعت
.............. مؤمن .. بربي .. كافرٍ .. في عبيده

شاعر وفي مضمون الافكار نوعت
.............. واطرق مجال ..الدارسه والجديده

ومن تجربة غيري فهمت.. وتقنعت
................ ومشوار غيري..ملك غيري مااعيده

المشكله .. بيتين ..منهن ..تروعت
............... بيت التراث .. وبيت .. ما احدٍ يشيده

يامل قلبٍ ..مع .. شفوفه .. تنازعت
................ وقداسته .. إيحاء ..سقطه .. وحيده

والبارحه ..من جور همي .. تمزعت
................ وتأبـينها.. تابوت .. روحٍ ..مديده!!

ثلثين ضاعوا بينهن.. بس ما ضعت
................ على نظام.. اهل .. العقول .. الرشيده

وعلى .. ذريعه .. واهيه .. ماتذرعت
................ السالفه .. اصـلاً ..وفصلاً .. مريده

لو ضقت من بوح .. القصيد وتشبعت
................ مايحتويني .. شي غير .. القصيده!!

والحزن .. شكلني .. بعد .. ماتلوعت
................ مرآة ..تسرق صورتي ..من رصيده

واذا صدفت .. اهل اللكاعه .. تلكعت
............... وحطيت .. في بطن النشيده ..نشيده!!

وان جا الهجا ياكثر ماجرمت واوجعت
............... وشبيت .. بـ اهداف المعاني .. وقيده

والمشكله .. ماهيب في صيغة النعت!
............... رغم إختلاف الفكر .. بـ أوجه عديده

ناسٍ تقول ابدعت..! لو كان ما ابدعت
............... يقرووون لكن .. قالبـيـن.. الجريــده!!

ياللي .. تقول.. انك .. بعلمك توسعت
............... الله .. يوســع لك .. بحـاجــه .. مـفيده

والنزل .. باشه .. وان تفرنكت ربعــت
............... ولاعاد .. يبقى .. من (خوالك) شريده

عذرك تقول إنك نسـيت وتسـرعت!!؟
............... قـد قلــت لك خـلك مـع الـدرب ســيده

وبالله روووووقنا تــرى إن ماتسنعت
............... فكيييت لك .. مخــك .. حديده .. حديده

حتى لو اني .. من قــصيدي .. تشبعت
............... اموت ما اخدش .. جوهري .. والعقيده

وســلامتــكم ,,

[عبدالحميد الحربي]

ماشاء الله تبارك الله

صح لسان الشاعر ،،، وسلمت يمينك الكاتب

[حرمل]

لاإله الا الله

مشاء الله

صح لسانك ولسان قايلها

[محمد المعارك]

صح لسانك ولسان الشاعر يابو عبيّد
بارك الله فيك.

[عبدالكريم اليوسف]

وعليكم السلام ورحمة الله وبركاته

اشهد شهادة حق اني تشبعت=من سيدة كل القصيد الجديده
يابو عبيد بالحنايا تربعت=لاهنت ياللي جبت زين القصيده

لاعدمناك
وبلغ سلامي للامير

[حمد الجبيرى]

ما اعبد وجيه الخلق .. ولا تنطعت
.............. مؤمن .. بربي .. كافرٍ .. في عبيده

الله الله يطول في عمرك وفي عمره على عمل صالح صح السانك والسانه ملايين

[راعي الشاص]

صح لسانك ولسان الشاعر
لاهنت يامحمد بن سيف

[محمد بن سيف]

المشاركة الأصلية كتبت بواسطة عبدالحميد الحربي

ماشاء الله تبارك الله

صح لسان الشاعر ،،، وسلمت يمينك الكاتب

صح بدنك يالغالي